ކުޅުންތެރިންނާމެދު ފުރިހަމައަށް އިތުބާރު އެބައޮތް: ސުޒޭން

ރާއްޖޭގެ ފުޓްބޯޅައިގެ ހާލަތު ރަގަޅު ނޫން ދަނޑިވަޅަކާ ދިމާވި ނަމަވެސް، ކުޅުންތެރިންނާމެދު އިތުބާރު އެބައޮތްކަމަށް ރާއްޖޭގެ ޤައުމީ ޓީމުގެ ކޯޗު، ޢަލީ ސުޒޭން ބުނެފިއެވެ.

ސުޒޭން މިހެން ބުނީ، އިންޑިއާ އާއި ރާއްޖެއާ ދެމެދު މިއަދު ކުޅުމަށް ހަމަޖެހިފައިވާ އެކުވެރިކަމުގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައެވެ. މިއީ ސައުދީ އަރަބިއްޔާގައި 2027 ވަނަ އަހަރު ބާއްވާ އޭޝިއަން ކަޕް ކޮލިފައިންއަށް ތައްޔާރުވުމުގެ ގޮތުން މި ދެ ޓީމުން ކުޅޭ މެޗެކެވެ.

ރާއްޖޭގެ ފުޓްބޯޅަ ސީޒަނެއް ވެސް ނެތި އަހަރަކަށް ވުރެ ގިނަ ދުވަަހަަކަށްވެފައިވާއިރު، ގައުމީ ޓީމު ގޮވައިގެން މިހާލަތުގައި، އިންޓަނޭޝަނަލް މެޗުތަކެއް ވެސް ގިނައިން ނުކުޅެ، އިންޑިއާއާ ކުޅެން އުނދަގޫވާނެތޯ ސުވާލު ކުރުމުން ސުޒޭން ބުނީ، ރަނގަޅު ކުޅުމެއް ދައްކަން ތައްޔާރު ކަމަށެވެ.

"މި ކުޅުންތެރިންނާ އެކު އަހަރެން ވަރަށް ގިނައިން މަސައްކަތްކޮށްފިން. އެ ކުޅުންތެރިންގެ ރަނގަޅު ކަންކަމާއި ބަލިފައި ވެސް އަހަންނަށް އެނގޭ. އެ ކުޅުންތެރިންނާ އެކީ މަސައްކަތް ކުރާނެ ގޮތް ވެސް އަހަންނަށް އެނގޭ. އަހަންނާ މެދު އެ ކުޅުންތެރިންގެ އިތުބާރު އޮންނާނެ. އަހަންނަށް އެ ކުޅުންތެރިންނާ މެދު ވެސް އިތުބާރު އެބައޮތް،" ސުޒޭން ބުންޏެވެ.

މި ބައްދަލުވުމުގައި ސުޒޭން އިތުރަށް ބުނީ، މިއީ ދިވެހީންނަށް ވަރަށް މުހިންމު މެޗެއް ކަމަށާއި، ރާއްޖެއާ އިންޑިއާއަކީ އަދިވެސް މި ސަރަޙައްދުގައި އެންމެ މޮޅު ދެ ޓީމު ކަމަށެވެ. 

"އިންޑިއާ އާއި ރާއްޖެއަކީ މިވަގަތު (ވެސް) މިސަރަހައްދުގައި އެންމެ ވަރުގަދަ ދެ ޓީމު. މި މެޗު އަހަރެމެންނަށް އަދި ދިވެހި ރައްޔިތުންނަށް ވެސް ވަރަށް މުހިންމު،" ސުޒޭން ބުނެފައިވާކަމަށް އިންޑިއާގެ މީޑިއާތަކުން ރިޕޯޓްކޮށްފައި ވެއެވެ.

ދިވެހި ކުޅުންތެރިންނަށް މި މެޗަށް އޮތް އެންމެ ބޮޑު ގޮންޖެހުމަކަށްވީ ދިގު ދަތުރެއް ކުރަން ޖެހުމެވެ. އެގޮތުން މެޗު ކުޅޭ ޝިލޮންގަށް ދިއުމަށް ދަތުރުމަތީގައި ދެ ދުވަސް ހޭދަކުރަން ޖެހުނެވެ. ނަމަވެސް މިހާރު ޓީމު ހަމަޔަކަށް އެޅިފައިވާކަމަށް ސުޒޭން ވަނީ ފާހަގަކޮށްފައެވެ. 

ޝިލޯންގްގެ ޖަވާހިރުލާލު ނެހެރޫ ސްޓޭޑިއަމްގައި ކުޅޭ މެޗު ފަށާނީ ރާއްޖޭގަޑިން މިއަދު އިރުއޮއްސި 6:30 ގަ އެވެ. ޔެސް ޓީވީން މެޗު ގެނެސްދިނުމަށް ހަމަޖެހިފައިވާ ކަމަށް ޕީއެސްއެމުން ވަނީ ބުނެފައެވެ.

އިންޑިއާއާ ދެކޮޅަށް ރާއްޖޭން މެޗަކަށް މި ނުކުންނަނީ ތިން އަހަރަށް ފަހު އެވެ. މި ދެ ޓީމު އެންމެ ފަހުން ބައްދަލު ކުރީ އޮކްޓޯބަރު 2021 ގައި ރާއްޖޭގައި ބޭއްވި ސާފް ޗެމްޕިއަންޝިޕްގައެވެ. އެ މެޗު އިންޑިއާއިން ކާމިޔާބުކުރީ 3-1 އިންނެވެ.