ޢަދުލުއިންޞާފުގެ ކުރިމަތީގައި މޮޅެއް ދެރައެއްގެ ތަފާތެއް އޮވެގެން ނުވާނެ: ހުކުރު ޚުތުބާ

ޢަދުލުއިންޞާފުގެ ކުރިމަތީގައި މޮޅެއް ދެރައެއްގެ ތަފާތެއް އޮވެގެން ނުވާނެ ކަމަށް މިއަދުގެ ހުކުުރު ޚުޠުބާގައި ބުނެފިއެވެ. 

“ޒިއްމާދާރުވުމާއި މަސްޢޫލިއްޔަތު އުފުލުން” މި މައުޟޫއަށް އިއްވި މިއަދުގެ ހުކުުރު ޚުޠުބާގައި ބުނެފައިވަނީ ޢަދުލު އިންޞާފުގެ ދާއިރާއަށް ބެލިޔަސް، އަހަރެމެން ކުރެ ކޮންމެ މީހަކީ ޒިންމާދާރު މީހަކަށް ވާން ޖެހޭކަމަށެވެ.

އަދި އެއީ ވެރީން އެކަނި ނޫން ކަމަށާއި، ޢާންމު ރައްޔިތުން ވެސް އެކަމުގައި ހިމެނޭ ކަމަށް ޚުޠުބާގައި ބުނެފައިވެއެވެ.

“ޢަދުލުއިންސާފުގެ ކުރިމަތީގައި މޮޅެއް ދެރައެއްގެ ތަފާތެއް އޮވެގެން ނުވާނެ، ކުށެއް ކޮށްފި ނަމަ ކޮންމެ މީހަކަށް ވެސް ޙައްޤު އަދަބު ލިބޭން ޖެހޭނެ، ކުށްކުރާ މީހާ ކުށަށް ޒިންމާވާން ޖެހޭނެ، އެއްވެސް މީހަކު ނުޙައްޤުން ކުށްވެރިއަކު ސަލާމަތްކުރާން މަސައްކަތްކޮށްގެން ނުވާނެ” ޚުޠުބާގައި ބުނެފައިވެއެވެ.

އަހަރެމެންގެ ތެރެއިން ކޮންމެ މީހަކު ވެސް، އަދާކުރާ ވަޒީފާތަކާއި މަސްއޫލިއްޔަތުތަކަކީ އަމާނާތެއް ކަމަސް ޚުޠުބާގައި ބުނެފައިވެއެވެ. ވަޒީފާ އަދާކުރުމުގައި ތެދުވެރިވެ، އިޚްލާޞްތެރިވާން ޖެހޭ ކަމަށާއި، ކަންކަން ކުރުމުގައި ރައްޔިތުންގެ ޙައްޤުތަކަށާއި ޤައުމީ މަޞްލަޙަތަށް އިސްކަންދޭން ޖެހޭ ކަމަށް ޚުޠުބާގައި ބުނެފައިވެއެވެ.

“އަހަރެމެންގެ ވަޒީފާތަކާއި، ރައްޔިތުން އަހަރެމެންނާ ޙަވާލު ކޮށްފައިވާ އެންމެހައި މަސްއޫލިއްޔަތުތަކަކީ، ބޮޑުވެގެންވާ އަމާނާތެއް، އެހެންކަމުން އެ އަމާނާތްތައް އަދާކުރުމުގައި ފަރުވާކުޑަކޮށް، ފަރުދުންނާއި މުޖުތަމަޢުގެ މަޞްލަޙަތަށް އިސްކަން ނުދޭ ނަމަ، އެއީ ތިމާގެ ދީނާއި ޤައުމަށް ވެވޭ ބޮޑު ޚިޔާނާތެއް” ހުކުުރު ޚުޠުބާގައި ބުނެފައިވެއެވެ.

ތެދުވެރިކަމާއި އަމާނާތްތެރިކަމަކީ، އަހަރެމެންގެ އީމާންކަމާ ގުޅިފައިވާ ދެ ސިފަކަމަށް ހުޠުބާގައި ބުނެފައިވެއެވެ.

އަދި ޒިންމާއާއި މަސްއޫލިއްޔަތު އަދާނުކުރުމަކީ ނަޒާހަތްތެރިކަން ގެއްލި، ޢަދުލުއިންޞާފާ ދުރަށް ގޮސް، އަނިޔާވެރިކަމަށް މަގުފަހިވާނެ ކަންކަންކަމަށެވެ.

“އަމިއްލަ މަޞްލަޙަތު އިސްކުރުމަކީ، ތިމާ އަދާކުރާން ޖެހޭ މަސްއޫލިއްޔަތަށް އުނިކަން އަންނަ ކަންކަން، ފުރިހަމަ މުސްލިމުންނަކީ ތިމާގެ އަމިއްލަ ފައިދާއާއި މަޞްލަޙަތަށް ވުރެ ބޮޑަށް، އަނެކުންގެ މަޞްލަޙަތަށް އިސްކަންދޭ މީހުން، އަނެކުންނަށް ޓަކައި، ތިމާ އަދާކޮށްދޭން ޖެހޭ ވާޖިބަށް އިސްކަންދޭ މީހުން، ތިމާގެ ޙައްޤުތައް ލިބެން އެދޭ ފަދައިން، މީސްތަކުންގެ ޙައްޤުތައް ލިބިދެވޭތޯ ބަލާ މީހުން” ޚުޠުބާގައި ބުނެފައިވެއެވެ.

ޤައުމުގެ ވަޙްދަތާއި ސިޔާދަތު ދެމެހެއްޓުމީ، އެންމެންގެ މަސްއޫލިއްޔަތެއް ކަމަށާއި، އެއީ އެންމެންގެ ވާޖިބެއް ކަމަށް ޚުޠުބާގައި ބުނެފައިވެއެވެ.

 މި ކަންކަން ދެމެހެއްޓޭނީ އަހަރެމެންގެ ތެރޭގައި މަސްޢޫލިއްޔަތު އުފުލުމުގެ ތެދުވެރި ރޫޙެއް ހުރެގެން ކަމަށާއި، މުޖުތަމަޢުގެ ކޮންމެ ފަރުދަކުމެ އޭނާގެ ޒިއްމާތަކާއި މަސްއޫލިއްޔަތުތައް އަދާކޮށްގެން ކަމަށް ޚުޠުބާގައި ބުނެފައިވެއެވެ.