ދިރާސީ އަހަރު ފެށޭއިރު މުދައްރިއްސުންނާއި ފޮތްތައް ހަމަކޮށްދެވޭނެ: ތަޢުލީމީ ވުޒާރާ

2025 ވަނަ އަހަރުގެ ދިރާސީ އަހަރު ފެށޭއިރު ސްކޫލްތަކަށް ބޭނުންވާ މުދައްރިސުންނާއި ދަރިވަރުންނަށް ބޭނުންވާ ފޮތްތައް ހަމަކޮށްދެވޭނެ ކަމަށް ތަޢުލީމާއި ބެހޭ ވުޒާރާއިން ބުނެފިއެވެ.

ތަޢުލީމީ ވުޒާރާއިން މިހެެން ބުނެފައިވަނީ ދައުލަތުގެ ޓީވީގެ ޕްރޮގްރާމެއްގައި ވާހަކަ ދައްކަމުން އެވުޒާރާގެ ޕާމަނަންޓް ސެކްރެޓަރީ ޝިފާޒް މުޙައްމަދެވެ.

އޭނާ ވިދާޅުވީ ނިމިދިޔަ ދިރާސީ އަހަރު ނިމުނުއިރު ސްކޫލްތަކުގައި މުދައްރިސުން ހަމައަށް ތިބިކަމަށެވެ. ނަމަވެސް ތަޢުލީމީ ވުޒާރާއަށް އަބަދުވެސް އޮންނަ އެންމެ ބޮޑު އެއް ގޮންޖެހުމަކީ ބިދޭސީ މުދައްރިސުން ދިރާސީ އަހަރު ނިމި ޗުއްޓީއަށް ދިއުމަށްފަހު ބައެއް މުދައްރިސުން އެނބުރި ނައުންކަމަށް ޝިފާޒް ވިދާޅުވިއެވެ.

ނަމަވެސް އެކަމަށް އަބަދުވެސް އެވުޒާރާއިން ތައްޔާރަށް އޮންނަކަމަށާއި، އެނބުރިި ނާންނަ މުދައްރިސުންގެ ބަދަލުގައި އައު މުދައްރިސުން އަބަދުވެސް ރެކްރޫޓްކުރުމަށް ޚާއްޞަ ބެކަޕް ޓީޗަރުން ތިބޭކަމަށާއި ވުމާއެކު ވަރަށް އަވަހަށް އެކަންވެސް ހަމަޖެހިގެންދާކަން ޝިފާޒް ފާހަގަކުރެއްވިއެވެ.އިތުރަށް ޝިފާޒް ވިދާޅުވީ  ވޯކް ފޯސްގައި މިއަހަރު ނިމުނުއިރުގައި ޓީޗަރުން ހަމަވެފައި ތިބުމާއެކު އިރާދަކުރެއްވިޔާ 2025 ވަނަ އަހަރުގެ ދިރާސީ އަހަރު ފެށިގެންދާއިރު ޓީޗަރުންވެސް ހަމަވެފައިވާނެ ކަމަށެވެ.

ދަރިވަރުންގެ ފޮތްތައް ހަވާލުކުރުމާއި ގުޅޭ ގޮތުން ސްކޫލް އެޑްމިނިސްޓްރޭޝަން ހިންގުމާ ޙަވާލުވެހުންނެވި ޢަލީ މުފީދު ވިދާޅުވީ، މިހާރު ރާއްޖޭގެ ހުރިހާ ސްކޫލްތަކަށްވެސް ފޮތްތައް ޙަވާލުކުރުމުގެ މަސައްކަތްތައް ކުރިއަށްދާކަމަށެވެ. ނަމަވެސް ގްރޭޑް 4 އަދި 5ގެ ފޮތްތައް ޙަވާލުކުރުމަށް ކުޑަ ލަސްކަމެއް އައީ އެ ދެގްރޭޑުގެ މަންހަޖަށް އައި ބަދަލާއި ގުޅިގެން ފޮތްތައް ޕްރިންޓު ކުރުމަށް ލަސްކަމެއްގެ އައުމުގެ ސަބަބުންކަމަށެވެ. 

ނަމަވެސް މިހާރު އެފޮތްތައްވެސް ސްކޫލްތަކަށް ފޮނުވުމުގެ މަސައްކަތްކުރިއަށްދާކަމަށާއި، ދިރާސީ އައު އަހަރު ފެށޭއިރު ހުރިހާ ދަރިވަރުންނަށްވެސް ފޮތްތައް ލިބޭނެކަމުގެ ޔަޤީންކަން ދެއްވާކަމަށް މުފީދު ވިދާޅުވިއެވެ.

ދިރާސީ އައު އަހަރުގެ ކިޔެވުން ފެށޭނީ އަންނަ އޭޕްރީލް މަހުގެ 6 ވަނަ ދުވަހުއެވެ. ދިރާސީ އަހަރު ނިމޭނީ ޑިސެމްބަރު 28ވަނަ ދުވަހުއެވެ.