ފަހުދިހަ ބަންދަސް އިމިގްރޭޝަންގެ ޚިދުމަތްތައް ދެމުންދާނެ

ރަމަޟާން މަހުގެ ފަހުދިހައިގެ ދުވަސްތައް ބަންދު ކަމުގައި ވިޔަސް އިމިގްރޭޝަންގެ ޚިދުމަތްތައް ދެމުންދާނެ ކަމަށާއި ޚިދުމަތް ދޭނެ ގަޑިތައް އިމިގްރޭޝަނުން ހާމަކޮށްފިއެވެ.

އެގޮތުން މާލެ ސަރަޙައްދުން ދިވެހި ޕާސްޕޯޓަށް އިމުގަ މެދުވެރިކޮށް 24 ގަޑިއިރުވެސް އޮންލައިންކޮށް ހުށައެޅޭނެއެވެ. އަދި 65 އަހަރުން މަތީގެ ބޭފުޅުންނާއި އެހެންވެސް ޚާއްސަ ބޭފުޅުންނަށް އިމިގްރޭޝަން އޮފީހަށް ހާޒިރުވެ އޮންލައިންކޮށް ޕާސްޕޯޓަށް އެދުމުގެ ޚިދުމަތް އިމިގްރޭޝަންގެ މާލޭ އޮފީހުން ހެނދުނު 9:15 އިން މެންދުރު 13:00 އަށް ދޭނެއެވެ.

ޕާސްޕޯޓާއި ހަވާލުވުމަށް ކިޔުބީ މެދުވެރިކޮށް ހަފްތާބަންދުނޫން ކޮންމެ ދުވަހެއްގެވެސް 9:15 އިން 12:00 އަށް ނަންބަރު ދޫކުރާނެއެވެ. އަދި ހުޅުމާލެ ފުރަތަމަ ފޭސް އޮފީސް ހުޅުމާލެ ދެވަނަ ފޭސް އޮފީސް އަދި ވިލިމާލެ އޮފީހުން ހެނދުނު 9:00 އިން 14:00 އަށް ނަންބަރު ދޫކުރަމުންދާނެއެވެ.

އިމިގްރޭޝަންގެ އަތޮޅު ތަކުގެ އޮފީސްތަކުންވެސް ޕާސްޕޯޓާއި ހަވާލުވުމަށް ފަހުދިހައިގެ ދުވަސްތަކުގައި ނަންބަރު ދޫކުރަމުންދާނެއެވެ. އެކި އޮފީސްތަކުން ނަންބަރު ދޫކުރުމަށް ހަމަޖެހިފައިވަނީ އެކި ދުވަސްތަކުގައެވެ. އެއީ:

• ހއ.ދިއްދޫ އޮފީސް: 24، 27 މާރޗް
• ކުޅުދުއްފުށީ ސިޓީ އޮފީސް: 23،25، 27 އަދި 30 މާރޗް
• ފުވައްމުލަކު ސިޓީ އޮފީސް: 24، 25 މާރޗް
• އައްޑޫ ސިޓީ އޮފީސް: 23،25،27 އަދި 30 މާރޗް
• ހއ.އިހަވަންދޫ: 27 މާރޗް
• ށ.ފުނަދޫ: 25 މާރޗް
• ދ.ކުޑަހުވަދޫ: 24 މާރޗް
• ލ.ފޮނަދޫ: 25،27 މާރޗް
• ތިނަދޫ ސިޓީ: 25،27 އަދި 30 މާރޗް
• ރ.އުނގޫފާރު: 27 މާރޗް

އިމިގްރޭޝަނުން ބުނެފައިވަނީ އެމަޖެންސީ ޙާލަތެއްގައި ޕާސްޕޯޓު ހެއްދުމަށް ބޭނުންވެއްޖެނަމަ 9555333އަށް ގުޅުމަށެވެ.

މީގެއިތުރުން ވޯކް ވިސާއަށް އެދި އިމުގަ އަދި އެކްސްޕެޓް ޕޯޓަލް މެދުވެރިކޮށް ހެނދުނު 9:00 އިން 17:00 އަށް ހުށައެޅޭނެ ކަމަށެވެ. އަދި ވޯކްވިސާއަށް އެދި ޕާސްޕޯޓު ހުށައެޅުމުގެ ޚިދުމަތް ދެވޭނީ ހެނދުނު 9:05 އިން 10:45 އަކާއި ހަމައަށް ކަމަށް އިމިގްރޭޝަނުން ބުނެއެވެ.

ވޯކްވިސާ އަށް އެދި ހުށައަޅާ ޕާސްޕޯޓް ދޫކުރާނީ 11:00ން 12:30 އަށެވެ. ވޯކް ވިސާގެ ޚިދުމަތް ފޯރުކޮށްދޭނީ “އެންޓްކިއު” ނަމަކަށް ކިޔާ އޮންލިން ޕޯޓަލް އެއް މެދުވެރިކޮށެވެ.

ވޯކް ވިސާ ފިޔަވައި އެހެނިހެން ވިސާއަށް އެދި ހުށައަޅާ ޕާސްޕޯޓް ބަލައިގަތުމާއި ވިސާ ޖަހަިއދިނުމުގެ ޚިދުމަތް ދެމުންދާނީ އިމުގަ އަދި އެކްސްޕެޓް އެޕް މެދުވެރިކޮށް 9:00ން 17:00 އަށެވެ.

ވިސާއަށް އެދި ޕާސްޕޯޓް ބަލައިގަނެ ވިސާޖަހައިދިނުން ކުރިއަށްދާނީ އޮޕައިންޓްމެންޓް އުސޫލުން ހެނދުނު 9:00 ން 12:00އަށެވެ.

ވޯކް ވިސާ ފިޔަވައި އެހެން ވިސާގެ ޚިދުމަތް ދިނުމަށް ހަމަޖެހިފައިވަނީ 20،23،25 އަދި 27 މާރޗް ގައެވެ.

އިމިގްރޭޝަންގެ އެންފޯސްމެންޓް އެންޑް ކޮމްޕަލަޔަންސް ޑިވިޝަންގެ ޚިދުމަތް ދޭނީ ހުކުރުދުވަސް ފިޔަވައި ކޮންމެ ދުވަހަކު 9:00އިން 13:00 އަށެވެ.

ސީޕޯޓުގެ ޚިދުމަތް ހުކުރު ދުވަސް ފިޔަވައި އެހެނިހެން ދުވަސްތަކުގެ 8:00އިން 17:00 އަށް އަދި 21:30ން 00:00އަށެވެ.

ހުކުރު ދުވަހު މިޚިދުމަތް ދޭނީ 14:30 ން 17:00 އަށް އަދި 21:30ން 00:00އަަށެވެ.