ޚަބަރު
ރަމަޟާން މަހުގެ ފުރަތަމަ ދިހައެއްގައި ފުލުހުންނަށް 692 މައްސަލަ ހުށައަޅައި 148 މީހުން ހައްޔަރު ކުރި

ފުލުހުން މަގުމަތީގައި ޙަރަކާތްތެރިވަނީ/ފޮޓޯ: ދަ ޓައިމްސް އޮފް އައްޑޫ
މި އަހަރުގެ ރަމަޟާން މަހުގެ ފުރަތަމަ ދިހައެއްގައި ފުލުހުންނަށް ޖުމްލަ 692 މައްސަލަ ހުށައަޅައި، މި މައްސަލަތަކުގައި 148 މީހުން ހައްޔަރުކޮށްފައިވާ ކަމަށް ދިވެހި ފުލުހުން ޚިދުމަތުން ޢާންމުކުރި ތަފާސްހިސާބުތަކުން ދައްކައިފިއެވެ.
ދިވެހި ފުލުހުންގެ ޚިދުމަތުން ޢާންމުކޮށްފައިވާ ތަފާސްހިސާބުތަކުން ދައްކާ ގޮތުގައި، ރޯދަ މަހުގެ ފުރަތަމަ ދިހަ ދުވަހު ފުލުހުންނަށް އެންމެ ގިނައިން ރިޕޯޓުކޮށްފައިވަނީ މަގުމަތީގައި ހިނގާފައިވާ އެކްސިޑެންޓުތަކުގެ މައްސަލައެވެ. އެގޮތުން، އެކްސިޑެންޓުގެ ޖުމްލަ 153 މައްސަލަ ވަނީ ފުލުހުންނަށް ހުށައަޅައިފައެވެ. ދެވަނައަށް އެންމެ ގިނައިން ހުށައަޅާފައިވަނީ، ވައްކަމާއި މަސްތުވާތަކެތީގެ މައްސަލައެވެ. އެގޮތުން، ވައްކަމުގެ 147 މައްސަލަ ރިޕޯޓުކޮށްފާވާއިރު މަސްތުވާތަކެއްޗާ ގުޅޭ 110 މައްސަލައެއް ހުށައަޅާފައިވާ ކަމަށް ފުލުހުން އާންމުކުރި ތަފާސްހިސާބުތަކުން ދައްކައެވެ.
ރަމޟާން މަހުގެ ފުރަތަމަ ދިހައެއްގައިި ފުލުހުންނަށް ހުށައަޅާފައިވާ މައްސަލަތައް:
- އަނިޔާކުރުން - 40 މައްސަލަ
- މުދަލަށް ގެއްލުންދިނުން - 48 މައްސަލަ
- މަސްތުވާތަކެތި - 110 މައްސަލަ
- ވައްކަންކުރުން - 147 މައްސަލަ
- ފޭރުން - 8 މައްސަލަ
- އެކްސިޑެންޓު - 153 މައްސަލަ
- ފޯރޖަރީ - 8 މައްސަލަ
- މަކަރާއި ހީލަތް ހެދުން - 13 މައްސަލަ
- ގެވެށި އަނިޔާ - 19 މައްސަލަ
- އިންޒާރު ދިނުން - 38 މައްސަލަ
- ސައިބާ ކްރައިމް - 7 މައްސަލަ
- ސްކޭމް - 70 މައްސަލަ
- ޖިންސީ ފުރައްސާރަ - 15 މައްސަލަ
- ކުޑަކުދިިންނަށް އަނިޔާކުރުން - 16 މައްސަލަ
ކޮންމެ މަހަކު ވެސް ފުލުހުންގެ ތަފާސްހިސާބުތައް ޢާންމުކުރާއިރު އެންމެ ގިނައީ ވައްކަމާއި، މަސްތުވާތަކެއްޗާއި، އެކްސިޑެންޓުތަކާއި ގުޅޭ މައްސަލަތައްކަން ފާހަގަވެއެވެ. މިފަދަ މައްސަލަތައް ހުއްޓުވުމަށް ފުލުހުން ގިނަ މަސައްކަތްތަކެއް ކުރަމުން އަންނައިރު މިކަމަށް އެދެވޭ ޙައްލެއް އަދިވެސް ނުލިބެއެވެ.