މަންދީ ރައީސް މުޢިއްޒުގެ ދަރިކަލުންގެ ކަރާމަތައް އަރައިގަތް މައްސަލަ ސިވިލް ކޯޓަށް ހުށައަޅައިފި

އެމްޑީޕީއިން މިހާރު ކުރިއަށްގެންދާ މަގުމަތީ ހަރަކާތްތަކުގައި އެޕާޓީގެ މެމްބަރު މަރިޔަމް ޒުބައިރް (މަންދީ) ރައީސް ޑރ މުޙައްމަދު މުޢިއްޒުގެ ދަރިކަލުން ޢުމައިރް މުޙައްމަދު މުޢިއްޒުގެ ކަރާމަތައް އަރައިގަތް މައްސަލަ ސިވިލް ކޯޓަށް ހުށައަޅައިފިއެވެ.

ޢުމައިރްގެ މަންމަ އަދި ރާއްޖޭގެ ފަސްޓް ލޭޑީ ސާޖިދާ މުޙައްމަދުގެ ފަރާތުން މިމައްސަލަ ސިވިލް ކޯޓަށް ހުށައަޅުއްވިކަން އެކަމަނާގެ ޤާނޫނީ ވަކީލު އަލްއުސްތާޒާ ޢާއިޝަތު ޢާޒިމާ ޝުކޫރު ވަނީ ހާމަކުރައްވައިފައެވެ. 

ޢާޒިމާ ނެރުއްވައިފައިވާ ސްޓޭޓްމަންޓެއްގައި ބުނެފައިވަނީ ރައީސްގެ ދަރިކަލުން ޢުމައިރަށް ނިސްބަތްކޮށް ދައްކާފައިވާ ވާހަކަތަކުގެ ސަބަބުން އޭނާގެ ނަފްސަށާއި ފުރާނައަށް ނުރައްކާވާނެ ޙާލަތެއް މެދުވެރިކުރުވައިފައިވާކަމަށެވެ.

އަދި ޢުމައިރްގެ ކިޔެވުމާއި މުސްތަޤްބަލަށް ބޮޑެތި ގެއްލުންތަކެއް ކުރިމަތިވާނޭ ޙާލަތެއް މެދުވެރިކޮށްފައިވީ ހިނދު، މިވާހަކަތަކުގެ ސަބަބުން ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނާއި ކުޑަކުދިންގެ ހައްޤުތައް ރައްކާތެރިކުރުމާއި ބެހޭ ބައިނަލްއަޤްވާމީ މުޢާހަދާ އިން ކަށަވަރުކޮށްދީފައިވާ ރައްކާތެރިކަމާއި ކަރާމާތް ނަގާލައިފައިވާތިއްޔާ، ޤާނޫނުއަސާސީން ކަށަވަރުކޮށްދީފައިވާ ނަމާއި އަބުރު ރައްކާތެރިކުރުމުގެ ޙައްޤު ނިގުޅައިގެންފައިވާތީ ޢުމައިރްގެ މަންމަ ސާޖިދާ މުޙައްމަދުގެ ފަރާތްޕުޅުން ސިވިލް ކޯޓަށް މައްސަލަ ހުށައަޅަފައިވާކަމަށެވެ.