ދީން
ރަމަޟާން މަހުގެ ދަރުމައަށް އެދޭ މީހާ ސަމާލުކަންދޭންޖެހޭ ދެ ކަމެއްވޭ

ރަމަޟާން މަހަކީ އަޅުކަމުގެ މައްސަރު---

ފަރުދުން
19 މާރިޗު 2025، 03:23
19 މާރިޗު 2025، 03:23
ރަމަޟާން މަހަކީ އަޅުކަމުގެ މައްސަރެވެ. ސުވަރުގެ ހޯދުމަށް އެދޭމީހާ، މި މަހުގެ ދަރުމަ ހޯދުމަށް ގަދައަޅާ މަސައްކަތްކުރަން ޖެހެއެވެ.
ރަމަޟާން މަހުގެ މާތް ދުވަސްތައް އަޅުގަނޑުމެން ހޭދަކުރަމުންދާއިރު، މި މާތް މައްސަރުގެ ދަރުމަ އާއި ޘަވާބަށް އެދޭމީހާގެ ހަނދާނުގައި ބަހައްޓަންޖެހޭ ވަރަށް މުހިންމު ދެ ކަމެއް ވެއެވެ.
އޭގެ ތެރެއިން އެއް ކަމަކީ ރަމަޟާން މަސް ފަރުޟުކުރުމުގެ މަޤުސަދެވެ. މި މަހުގެ މަޤުސަދު ބަޔާން ކުރެއްވުމުގެ ގޮތުން މާތް ﷲ ވަޙީކުރެއްވި ބަސްފުޅެއްގެ މާނައިގައި ވަނީ މިފަދައިންނެވެ.
"ﷲ ސުބުޙާނަހޫ ވަތަޢާލާ ކުރީގެ އުއްމަތްތަކަށް ރޯދަ ފަރުޟު ކުރެއްވި ފަދައިން، މި މި އުއްމަތަށް ރޯދަ ފަރުޟުކުރައްވާފައިވަނީ މި އުއްމަތުގެ އަހުލުވެރީން އެ ކަލާނގެއަށް ތަޤުވާވެރިވުމަށްޓަކައެވެ."
ތަޤުވާވެރިވުމަކީ ކޮބައިތޯއެވެ؟ އެއީ ޙައްޤު ގޮތުގައި ﷲ އަށް ބިރުވެތިވުމެވެ. އެކަލާނގެއަށް ބިރުވެތިވުމަކީ އެކަލާނގެއާ ގާތްވުމެވެ. މިއީ މި އިޙުސާސް ކުރެވުމުން އާންމު ގޮތެއްގައި އަޅުގަނޑުމެންނަށް ޢަމަލުކުރެވޭ ގޮތުގެ އިދިކޮޅު ގޮތެވެ. އާންމު ގޮތެއްގައި އެއްޗެއް ނުވަތަ މީހެއްދެކެ ބިރުގަނެވުމުން، އަޅުގަނޑުމެނަށް އެ އެއްޗަކާ ނުވަތަ އެމީހަކާ ދުރަށް ދެވެއެވެ. ނަމަވެސް ﷲ ޞުބުޙާނަހޫ ވަތަޢާލާއަށް ބިރުވެތިވެވިއްޖެނަމަ، އެކަލާންގެއަށް ތަޤުވާވެރިވެ، ފާފަ ފުއްސެވުމަށް އެދި މަސައްކަތް ކުރުމުގައި ދެމިތިބެންޖެހެއެވެ.
އެހެންކަމުން ރަމަޟާން މަހު އަޅުގަނޑުމެން ސަމާލުކަން ދޭންޖެހޭ އެއް ކަމަކީ މާތް ﷲ ޙަރާމްކުރެއްވި ކަންތައްތަކުން ދުރުވެ، އެ ކަލާނގެ ވާޖިބުކުރައްވާފައިވާ ކަންތައްތައް ކުރުމެވެ.
ރަމަޟާން މަހު އަޅުގަނޑުމެން ސަމާލުކަން ދޭނެޖެހޭ ދެވަނަ ކަމަކީ މި މަހުގެ މާނައަށެވެ. "ރަމަޟާން" މި ބަސް ޢަރަބި ބަހުގައި މާނަކޮށްފައިވަނީ ހިފެހެއްޓުމަށެވެ. އަޅުގަނޑުމެން އަޅުގަނޑުމެންގެ ގޮހޮރު މި ހިފަހައްޓަނީ ކާންބޯން ނުދީއެވެ. އެހެންކަމުން ގޮހޮރަށް އެއްޗެއް ނުދޭ ފަދައިން، އަޅުގަނޑުމެންގެ މުޅި ހަށިގަނޑު ރޯދައަށް ބަހައްޓަން ޖެހެއެވެ.
މިގޮތުން އަޅުގަނޑުމެންގެ ލޮލުން ﷲ ނަހީކުރެއްވެވި ތަންތަނާއި މަންޒަރު ނުބެލުމާއި، ކަންފަތުން ﷲ ނަޙީކުރެއްވި ވާހަކަތައް އަޑުތައް ނުއެހުމާއި އަދި ދޫ ރައްކާތެރިކުރުން ހިމެނެއެވެ.
ވީމާ ރަމަޟާން މަހުގެ ހެޔޮ ދަރުމަ އާއި ޘަވާބު ހޯދަން އެދޭ މީހާ މުޅި ރަމަޟާން މަސް ހޭދަކުރަން ޖެހޭނީ، ކުރިން މި ދެންނެވުނު ދެ ކަންތައްތަކަށް ސަމާލުކަންދީގެނެވެ. އެއީ މާތް ﷲ ޙަރާމްކުރެއްވި ކަންތައްތަކުން ދުރުވެ، އެ ކަލާނގެ ވާޖިބުކުރައްވާފައިވާ ކަންތައްތައް ކުރުމާއެކު، މުޅި ހަށިގަނޑުން ރޯދަ ހިފައިގެންނެވެ.
މަސްދަރު:
1446 ވަނަ އަހަރުގެ ރަމަޟާން މަހަށް ޙާއްސަކޮށް ފަރުދުން މީޑިއާއިން ގެނަސްދިން "ބަރަކާތް" ޕްރޮގްރާމް.
އެޕިސޯޑުގެ ޕްރެޒެންޓަރ: އައްޝައިޙާ މަރްޔަމް ޝަބާނާ