އޮޕަރޭޝަން ކުރަނގީގެ ދަށުން 1 ލައްކައަށް ވުރެ ގިނަ ބިދޭސީންގެ މަޢުލޫމާތު އެއްކޮށްފި

ރާއްޖޭގައި ޤަވާއިދާ ޚިލާފަށް އުޅެމުންދާ ބިދޭސީންގެ މައްސަލައަށް ޙައްލެއް ހޯދުމަށް ފެށި "އޮޕަރޭޝަން ކުރަނގި" ގެ ދަށުން މިހާތަނަށް 1 ލައްކައަށްވުރެ ގިނަ ބިދޭސީންގެ މަޢުލޫމާތު އެއްކުރެވިފައިވާ ކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން ވިދާޅުވެއްޖެއެވެ. 

އެ ވުޒާރާއިން ވިދާޅުވީ، ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލައަށް ޙައްލެއް ގެނައުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްޞަ އިރުޝާދުގެ ދަށުން މިދިޔަ އަހަރުގެ މެއި މަހުގެ 2 ވަނަ ދުވަހު ފެށި މި މަސައްކަތަށް ބޮޑު ކުރިއެރުންތަކެއް ލިބިފައިވާ ކަމަށެވެ. އެގޮތުން، ވޭތުވެދިޔަ 10 މަސް ދުވަހުގެ ތެރޭގައި 100،000 އަށް ވުރެ ގިނަ ބިދޭސީންގެ މަޢުލޫމާތު އެއްކުރެވިފައިވާ ކަމަށް އެ ވުޒާރާއިން ވިދާޅުވެއެވެ. އަދި މީގެ ތެރެއިން، ގްރޭޓަރ މާލެ ސަރަހައްދުން ވެސް ހަމަ އެކަނި 65،000 އަށް ވުރެ ގިނަ ބިދޭސީންގެ މަޢުލޫމާތު ވަނީ އެއްކޮށްފައެވެ.

މީގެ އިތުރުން ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން ވިދާޅުވީ، ރާއްޖޭގައި ނުުޤަވާއިދުން އުޅޭ ބިދޭސީންގެ މައްސަލަ އެހާ ބޮޑުވެފައިވަނީ ކުރީގެ ސަރުކާރުތަކުން މި މައްސަލައަށް މާ ބޮޑު އަހަންމިއްޔަތުކަމެއް ދެއްވާފައި ނެތުމުން ކަމަށެވެ. އެގޮތުން މިދިޔަ ސަރުކާރުގެ 5 އަހަރުގެ ތެރޭގައި އެބޭފުޅުން ކުރައްވާފައިވާ ޢަމަލީ މަސައްކަތްތަކުން އެއްކުރެވިފައިވަނީ ޖުމްލަ 40،000 ބިދޭސީންގެ މަޢުލޫމާތުތައް ކަމަށް އެ ވުޒާރާއިން ވަނީ ވިދާޅުވެފައެވެ. ނަމަވެސް، މި ސަރުކާރުން ފަށާފައިވާ "އޮޕަރޭޝަން ކުރަނގި" ނިންމާލާއިރު ރާއްޖޭގައި ޤަވާއިދާ ޚިލާފަށް އުޅެމުންދާ ބިދޭސީންގެ މައްސަލައަށް ދާއިމީ ޙައްލެއް ލިބިގެންދާނެ ކަމަށް އެ ވުޒާރާއިން މަޢުލޫމާތުދެއެވެ. 

އެ ވުޒާރާއިން ވިދާޅުވީ، ބިދޭސީ މަސައްކަތްތެރިން ގެނައުމަށް މިހާރު އޮތް ހަރުކަށި އުސޫލުތަކަށް އޮޕަރޭޝަން ކުރަނގި ނިމުމުން، ބޭރުމީހުން ގެނައުމުގައި މިހާރު އޮތް ދަތިކަން ފިލައިދާނެ ކަމަށެވެ. އަދި ރާއްޖޭގައި އުޅޭ ބިދޭސީންގެ ތެރެއިން މިއަދާ ހަމައަށް އެފަރާތްތަކުގެ މަޢުލޫމާތު ނުދެއްވާތިބި ފަރާތްތަކުން އަންނަ އޭޕްރިލް މަހުގެ 30 ވަނަ ދުވަހުގެ ކުރިން ފޮރިންލޭބަރ ޑިޕާޓްމެންޓާއި ހިއްސާ ކުރުމަށް އެ ވުޒާރާއިން ވަނީ އެދިފައި ވެއެވެ. ހަމަ އެހެންމެ، މި ތާރީޚަށް ފަހުން ރާއްޖޭގައި ޤަވާއިދާ ޚިލާފަށް އުޅޭމުންދާ ބިދޭސީން ޑިޕޯރޓް ކުރާނެކަމަށް އެ ވުޒާރާއިން ވަނީ ވިދާޅުވެފައެވެ.