Ads by Exprox

ޚަބަރު

ނޮވެމްބަރު 3 ގައި ޝަހީދުވި ސިފައިންގެ އާއިލާތަކަށް އިނާޔަތްދޭގޮތަށް ހަމަޖައްސަވައިފި

ނޮވެމްބަރު 3 ގައި ޝަހީދުވި ސިފައިންގެ އާއިލާތަކަށް އިނާޔަތްދޭގޮތަށް ހަމަޖައްސަވައިފި

ރައިސުލްޖުމްހޫރިއްޔާ "ނަޞްރުގެ ދުވަހުގެ" ޖަލްސާގެ ތެރެއިން/ފޮޓޯ: ރައީސް އޮފީސް

19 މާރިޗު 2025، 09:33

ނޮވެމްބަރު، 3، 1988 ގެ އުދުވާނީ ހަމަލާތަކުގައި ޝަހީދުވި ސިފައިންގެ އާއިލާތަކަށް އިނާޔާތްދޭގޮތަށް ހަމަޖައްސަވާފައިވާ ކަމަށް ދިފާޢީ ވުޒާރާއިން ވިދާޅުވެއްޖެއެވެ. 

ދިފާޢީ ވުޒާރާއިން މިއަދު ޢާންމުކުރި އުޞޫލުގައިވާ ގޮތުން ނޮވެމްބަރު 3 ގައި ޝަހީދުވި ސިފައިންގެ އާއިލާގެ މެމްބަރުންގެ ތެރެއިން މައިންބަފައިންނާއި ދަރިން އަދި ހުވަފަތް އަނބިން ހިމެނޭގޮތަށް ކޮންމެ މީހަކަށް މަހަކު 9،000 ރުފިޔާގެ ގެ އިނާޔަތެއް ލިބޭނެ އެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިިއްޒުގެ ވަޢުދުފުޅާއި އެއްގޮތަށް، އެ ދުވަހުގެ އުދުވާނީ ހަމަލާގައި ދިވެހި ސިފައިންނަށް ކާމިޔާބު ހޯދައި ދިނުމަށް ދެއްކެވި އާދަޔާ ޚިލާފު ސާބިތުކަމާއި ހިތްވަރުގެ ސަބަބުން ޝަރަފުގެ ނިޝާން ލިބިފައިވާ ބޭފުޅުންނަށް ވެސް ކޮންމެ މަހަކު އިނާޔަތެއް ލިބޭނެ ކަމަށް އެ އުޞޫލުގައިވެއެވެ. އަދި އެ އެންމެންނަށް ދުނިޔޭގައި ދިރިހުރިހާ ހިނދަކު ކޮންމެ މަހަކު އިނާޔަތް ލިބޭނެ ކަމަށާއި، މި އިނާޔަތް ލިބޭ މީހަކު ނިޔާވެއްޖެ ނަމަ އެ އިނާޔަތް ދިނުން ނިމުމަކަށް އަންނާނެ ކަމަށް އެ އުސޫލުގައި ވަނީ ކަނޑައަޅުއްވާފައެވެ.

އެގޮތުން އަމިއްލަ ފުރާނަ އަށް ބެލުމެއް ނެތި ދެއްކި ހިތްވަރަށްޓަކައި ހުރަވީ ރަން މެޑަލް ލިބިފައިވާ ބޭފުޅުންނަށް މަހަކު 9،000 ރުފިޔާގެ ގެ އިނާޔަތެއް ދޭއިރު، ހުރަވީ ރިހި މެޑަލް ލިބިފައިވާ ފަރާތްތަކަށް މަހަކު 8،000 ރުފިޔާގެ އިނާޔަތެއް ދިނުމަށް ވަނީ ހަމަޖެހިފައެވެ. އަދި ހިތްވަރު ގަދަކަމުގެ ކުލަ ލިބިފައިވާ ބޭފުޅުންނަށް މަހަކު 6،000 ރުފިޔާގެ ގެ އިނާޔަތެއް ދިނުމަށް ވެސް އެ އުޞޫލުގައި ވަނީ ކަނޑައަޅުއްވާފައެވެ.

ނޮވެމްބަރު 3 ގެ ގެ އުދުވާނީ ހަމަލާގައި ސިފައިންނާއި އާންމުން ހިމެނޭހެން 19 ދިވެހިން ވަނީ ޝަހީދުވެފައެވެ. އެހެންކަމުން، ނޮވެމްބަރު 3ގެ ބަޠަލުންގެ އަގުވަޒަންކުރުމަކީ ރާއްޖޭގެ މިނިވަންކަމާއި ސިޔާދަތު ހިމާޔަތްކޮށް ރައްކާތެރިކުރުމަށާއި ޤައުމީ ލޯތްބާއި ޤައުމިއްޔަތު ދިރުވައި އާލާކުރުމަށް މުހިންމު ކަމެއް ކަމުގައި ރައީސް ދެކެވަޑައިގަންނަވާ ކަމަށް އެ ބަޔާނުގައި ވަނީ ފާހަގަކުރައްވާފައެވެ.

މި ލިޔުން ކިޔާލުމުން

Ads by MSS