ކުޅިވަރު
އެކުވެރިކަމުގެ މެޗުގައި ރާއްޖޭގެ މައްޗަށް އިންޑިއާއިން ކުރިހޯދައިފި

ގޯލު ކާމިޔާބު ކުރުމަށްފަހު ޗެތުރީ އުފާފާޅުކުރަނީ---
ސައުދީ އަރަބިއްޔާގައި 2027 ވަނަ އަހަރު ބާއްވާ އޭޝިއަން ކަޕް ކޮލިފައިންއަށް ތައްޔާރުވުމުގެ ގޮތުން މިރޭ އިންޑިއާ އާއި ރާއްޖެ ބައްދަލުކުރި މެޗު 3-0 އިން އިންޑިއާ ކާމިޔާބުކޮށްފިއެވެ.
އިންޑިއާގެ ޝިލޮންގްގައި ކުޅުނު މި މެޗުގައި އެ ޤައުމުން މި ހޯދި މޮޅަކީ، 2023 ވަނަ އަހަރުގެ ނޮވެމްބަރު މަހަށްފަހު އެ ޓީމަށް ކާމިޔާބުކުރެވުނު ފުރަތަމަ މެޗެވެ. މިދިޔަ އަހަރު އެ ޓީމުން 11 މެޗު ކުޅެފައިވާއިރު، ފަސް މެޗުން އެއްވަރުވެ، ހަ މެޗުން ވަނީ ބަލިވެފައެވެ.
އިންޑިއާއިން މި މެޗަށް ނިކުތީ، އުމުރުން 40 އަހަރުގެ ޗެތުރީ ވެސް ގޮވައިގެނެވެ. އޭނާ އިންޑިއާގެ ޤައުމީ ޖާޒީގައި މި ފެނުނީ، ޤައުމީ ޓީމުން މިދިޔަ އަހަރު ރިޓަޔާކުރުމަށްފަހު، ޤައުމީ ޓީމުގެ ކޯޗު، މަނޯލޯ މާކޭޒް އާއި އިންޑިއާގެ އެހެން ކުޅުންތެރިންގެ ވެސް އެދުމުގެ މަތިންނެވެ.
މިރޭގެ މެޗުގައި އިންޑިއާއިން ލީޑު ނެގީ އެ ޓީމަށް ލިބުނު ކޯނަރެއްގައި ފުރަތަމަ ހާފުގައެވެ. މެޗުގެ 34 ވަނަ މިނެޓުގައި މި ގޯލު ކާމިޔާބުކޮށްދިނީ އެ ޓީމުގެ ޑިފެންޑަރު ރާހުލް ބޭކޭއެވެ.
އިންޑިއާއިން އެ ޓީމުގެ ދެވަނަ ގޯލު ވެސް ކާމިޔާބުކުރީ ކޯނަރަކުންނެވެ. މި ގޯލު މެޗުގެ 65 ވަނަ މިނެޓުގައި ކާމިޔާބުކޮށްދިނީ ވާތްފަރާތުން ކުޅޭ ލިސްޓަންއެވެ.
އިންޑިއާގެ ފަހު ގޯލު ކާމިޔާބުކޮށްދިނީ، ރިޓަޔާމެންޓުން އެނބުރި އައި ސުނިތް ޗެތުރީއެވެ. ރާއްޖޭގެ ގޯލުގެ ކުރިމައްޗަށް ލިސްޓަން ހުރަސްކޮށްދިން ބޯޅަ ޗެތުރީ ގޯލުގެ ތެރެއަށް ފޮނުވާލީ ބޮލުންނެވެ.
އޭޝިއަން ކަޕް ކޮލިފައިން ފުރަތަމަ މެޗުގައި އިންޑިއާ އިން މި މަހު 25 ވަނަ ދުވަހު އަމިއްލަ ދަނޑުގައި ބަންގްލަދޭޝްއާ ކުޅޭއިރު، އެ ދުވަހު ރަށުންބޭރުގައި ރާއްޖޭގެ ޓީމު ބައްދަލުކުރާނީ ފިލިޕީންސްއާއެވެ.