ކާބޯތަކެތީގެ ޚިދުމަތް ފޯރުކޮށްދޭ ތަންތަން ދަފްތަރުކޮށް ރަޖިސްޓްރީކުރުމަށް އެމްއެފްޑީއޭ އިން އަންގައިފި

ކާބޯތަކެތީގެ ޚިދުމަތް ފޯރުކޮށްދޭ ތަންތަން ދަފްތަރުކޮށް ރަޖިސްޓްރީކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ، އެމްއެފްޑީއޭ އިން އަންގައިފިއެވެ.

މޯލްޑިވްސް ފުޑް އެންޑް ޑްރަގް އޮތޯރިޓީ އިން މިގޮތަށް އަންގާފައި މިވަނީ ކާބޯތަކެތީގެ ރައްކާތެރިކަމުގެ ޤާނޫނަށް ޢަމަލުކުރަން ފެށުމާއި ގުޅިގެންނެވެ.

އެމްއެފްޑީއޭ އިން ނެރުނު އިޢުލާނެއްގައި ވަނީ، މާލޭގައި ހިންގާ ކާބޯތަކެތީގެ ޚިދުމަތްދޭ ތަންތަން ރަޖިސްޓްރީ ކުރަންޖެހޭނީ އެ އޮތޯރިޓީގައިކަމަށް ބުނެފައެވެ. ހަމަ އެހެންމެ، އަތޮޅުތެރޭގައި ހިންގާ ތަންތަން ރަޖިސްޓްރީ ކުރަންޖެހޭނީ އެ ރަށެއްގެ ޞިއްޙީ ޚިދުމަތްދޭ މަރުކަޒެއްގައި ކަމަށް ވެސް އެ އިޢުލާނުގައި ވަނީ ބަޔާންކުރައްވާފައެވެ.

ކާބޯތަކެތީގެ ޚިދުމަތްދޭ ހުރިހާ ތަންތަނާއި ފަރާތްތަކުން ރަޖިސްޓްރީވާން ޖެހޭނެ ކަމަށް ކާބޯތަކެތީގެ ޚިދުމަތްދޭ ތަންތަނާއި ފަރާތްތައް ރަޖިސްޓަރީކޮށް ލައިސަންސް ދޫކުރުމުގައި އަމަލުކުރާނެ އުސޫލު ބަޔާންކުރާ ގަވާއިދުގައި ވަނީ ބުނެފައެވެ. އަދި މި ޤަވާއިދުގެ ދަށުން ދައުލަތުގެ އެހެން އިދާރާއެއްގައި ރަޖިސްޓްރީކޮށްފައިވާ ކާބޯތަކެތީގެ ޚިދުމަތްދޭ ތަންތަނާއި އެތަންތަނުގައި އުޅޭ މީހުން ލައިސަންސް ހޯދުމަށް އެމްއެފްޑީއޭ އަށް ގިނަވެގެން ހަ މަސް ދުވަހުގެ ތެރޭގައި ހުށަހަޅަން ޖެހޭނެއެވެ.

މީގެ އިތުރުން، މި ޤަވާއިދުގައިވާ ގޮތުން ރަޖިސްޓްރީ ނުކޮށް ކާބޯތަކެތީގެ ޚިދުމަތް ދިނުމުގެ ވިޔަފާރި ކުރުމަކީ މަނާކަމެކެވެ. އަދި ރަޖިސްޓްރީ ނުކޮށް ވިޔަފާރިކޮށްފިނަމަ 10،000 ރުފިޔާ އާއި 500،000ރ. އާއި ދެމެދުގެ އަދަދަކުން ޖޫރިމަނާ ކުރެވޭނެއެވެ.