ސްޓެލްކޯ މެެރިޓް ބޭސްޑް އިންޖިނިއަރިންގ ސްކޮލަރޝިޕް އަށް ކުރިމަތިލުމުގެ ފުރުޞަތު ހުޅުވާލައިފި

ސްޓޭޓް އިލެކްޓްރިކް ކޮމްޕެނީ ލިމިޓެޑް، ސްޓެލްކޯ އިން ޔުނައިޓެޑް ކިންގްޑަމްގައި މެރިޓް ބޭސްޑް އިންޖިނިއަރިންގ އިން ބެޗްލަރސް ޑިގްރީ ހެދުމަށް ސްކޮލަރޝިޕްގެ ފުރުޞަތު ހުޅުވާލައިފިއެވެ.

ސްޓޭޓް އިލެކްޓްރިކް ކޮމްޕެނީ ލިމިޓެޑް އިން ވިދާޅުވީ، މި ސްކޮލަރޝިޕް އަށް އެދި ކުރިމަތިލެވޭނީ ޢުމުރުން 24 އަހަރުން ދަށުގެ ފަރާތްތަކަށް ކަމަށެވެ. އެގޮތުން، މި ސްކޮލަރޝިޕްގެ ދަށުން ހުޅުވާލާފައިވަނީ، މެކެނިކަލް އިންޖިނިއަރިންގކަން ކިޔެވުމުގެ 2 ޖާގައާއި އިލެކްޓްރިކަލް އެންޑް އިލެކްޓްރޯނިކް އިންޖިނިއަރިންގކަން ކިޔެވުމުގެ 1 ޖާގައެވެ. މި ސްކޮލަރޝިޕްއަށް ހޮވޭ ދަރިވަރުން ކިޔަވާނީ ދަ ޔުނިވަރސިޓީ އޮފް މެންޗެސްޓަރ، ޔުނިވަރސިޓީ އޮފް ލީޑްސް، ނުވަތަ ޔުނިވަރސިޓީ އޮފް ސައުތަމްޕްޓަންގައެވެ.

ސްޓެލްކޯ އިން ވިދާޅުވީ، ޔޫކޭގެ މި ސްކޮލަރޝިޕްގެ ދަށުން ދެކޮޅު ޓިކެޓާއި، ޓިއުޝަން ފީ، ވިސާ ފީ، އެސްޓެބްލިޝްމެންޓް އެލޮވެންސް، އަދި ފަސްޓް ޑިޕާޗާރ އެލޮވެންސް ލިބިގެންދާނެ ކަމަށެވެ. ހަމަ އެހެންމެ، މި ސްކޮލަރޝިޕަށް ހޮވޭ ދަރިވަރުން ފުރިހަމަ ކުރަންޖެހޭ އިތުރު ޓްރެއިނިންތަކާއި، ލެންގުއޭޖް ކޯސްތަކުގެ ފީ މި ސްކީމްގެ ދަށުން ނުލިބޭނެ ކަމަށް ވެސް ސްޓެލްކޯ އިން ވަނީ ވިދާޅުވެފައެވެ.

މި ސްކޮލަރޝިޕް އަށް ކުރިމަތިލުމަށް ޝައުގުވެރިވާ އަދި ޝަރުތުހަމަވާ ފަރާތްތަކުން އޭޕްރިލް މަހުގެ 30 ވަނަ ދުވަހުގެ ކުރިން އެކަމަށް އެދި ހުށައަޅަންޖެހޭ އެންމެހާ ލިޔެކިތުންތަކާއެކު އެޕްލިކޭޝަން ހުށައެޅުމަށް ސްޓެލްކޯއިން ވަނީ އަންގަވާފައެވެ. އެގޮތުން، ސްކޮލަރޝިޕަށް އެދި ހުށައަޅާއިރު، އެ ފަރާތެއްގެ އައިޑީކާޑު ކޮޕީ، ޕާސްޕޯޓް ސައިޒް ފޮޓޯ، ސްކޫލް ލީވިންގ ސެޓިފިކެޓް، އެކަޑެމިކް ސެޓިފިކެޓް، އަދި ހުށައަޅާ ފަރާތުން އިނގިރޭސި ބަހުން ލިޔެފައިވާ އަމިއްލަ ސްޓޭޓްމެންޓެއް ހިމަނަންޖެހޭނެ ކަމަށް ސްޓެލްކޯ އިން ވަނީ ވިދާޅުވެފައެވެ. އަދި މި ސްޓޭޓްމެންޓުގައި 550-1000 ބަސް ހަމަވާންޖެހެނޭކަމަށް ވެސް އެ ކުންފުނިން ވަނީ ވިދާޅުވެފައެވެ.

މި ސްކޮލަރޝިޕް އަށް އެދި ހުށައަޅުއްވާ ފަރާތްތަކުގެ ތެރެއިން ޝަރުތުހަމަވާ ފަރާތްތަކަށް އިންޓަރވިއުގަިއ ބައިވެރިވުމުގެ ފުރުޞަތު ހުޅުވާލައްވާނެކަމަށް ސްޓެލްކޯ އިން ވަނީ ވިދާޅުވެފައެވެ. މިގެ އިތުރުން، ސްކޮލަރޝިޕަށް ހޮވޭ ދަރިވަރުން އެ ކުންފުންޏާއި އެކު އެއްބަސްވުމެއްގައި ސޮއިކުރަން ޖެހޭނެ ކަމަށް އެ ކުންފުނިން މަޢުލޫމަތުދެއެވެ. 

މެރިޓް ބޭސްޑް އިންޖިނިއަރިންގ ސްކޮލަރޝިޕް ސްކީމްhttps://t.co/62lWsXkL6d pic.twitter.com/4QXqrRbVE5

— Hussain Fahmy (@HussainFahmy09) March 19, 2025