ދަރިވަރުންގެ އިޙްޔާ: މިރޭގެ ފޯރަމް ހުށައަޅައިދިނީ ހުޅުމާލެ ސީއެޗްއެސްސީގެ ދަރިވަރުން!

1446 ވަނަ އަހަރުގެ ރަމަޟާން މަހުގެ ރޭތައް އިޙްޔާ ކުރުމަށް ބާއްވާ ދަރިވަރުންގެ އިޙްޔާގެ ހަވަނަ ފޯރަމް މިރޭ ބާއްވައިފިއެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، ދަރިވަރުންގެ އިޙްޔާ ފޯރަމް ސިލްސިލާގެ ހަވަނަ ފޯރަމް ބާއްވާފައިވަނީ އިސްލާމީ މަރުކަޒުގެ ޖަލްސާ ކުރާ މާލަމުގައި ކަމަށެވެ. 
 
މިރޭގެ ފޯރަމް ހުށައަޅައިދެއްވީ ސެންޓަރ ފޯ ހަޔާ ސެކަންޑަރީ އެޑިއުކޭޝަން (ހުޅުމާލެ) ގެ ދަރިވަރުންނެވެ. މިރޭގެ އިޙްޔާ ފޯރަމް  21:30 ގައި ފަށާފައިވާއިރު، މި ފޯރަމް ވަނީ އިސްލާމީ ކަންތައްތަކާ ބެހޭ ވުޒާރާގެ ފޭސްބުކް ޕޭޖް މެދުވެރިކޮށް ލައިވް ކޮށްފައެވެ.

 މިރޭގެ ފޯރަމްގައި ދަރިވަރުން އަލިއަޅުއްވާލާފައިވަނީ، "އިސްލާމީ އުސޫލުތަކާއި އެއްގޮތަށް ފުދުންތެރި މުޖުތަމަޢުއެއް ބިނާ ކުރުން" މި މަޢުޟޫގެ މައްޗަށެވެ. އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، ދަރިވަރުންގެ އިޙްޔާ ފޯރަމަކީ އެ ވުޒާރާއިން ދީނީ ހޭލުންތެރިކަން އިތުރުކުރުމުގެ މަޤްޞަދުގައި މާލެ ސަރަޙައްދުގެ މަތީޘާނަވީ ސްކޫލްތަކުގެ ދަރިވަރުންނާއެކު، އެދަރިވަރުން ހުށަހަޅައިދޭ ގޮތަށް ބާއްވާ ފޯރަމެއްކަމަށެވެ. މިޕްރޮގުރާމް ކުރިއަށް ގެންދަން ހަމަޖެހިފައިވަނީ މަތީޘާނަވީ ސްކޫލްތަކުގެ ދަރިވަރުން މައުޟޫޢުތަކަށް ތައްޔާރުވެ، ހުށަހަޅާ ޕްރޮގުރާމެއްގެ ގޮތުގައެވެ.

މިއަހަރުގެ ދަރިވަރުންގެ އިޙްޔާ ފޯރަމްގައި 6 ސްކޫލަކުން ހުށައަޅައިދިނުމަށް ވަނީ ހަމަޖެހިފައެވެ. އެގޮތުން، ދަރިވަރުންގެ އިޙްޔާ ފޯރަމް ހުށައަޅައިދޭނީ، އަޙްމަދިއްޔާ އިންޓަރނޭޝަނަލް ސްކޫލް، މަދްރަސަތުލް ޢަރަބިއްޔަތުލް އިސްލާމިއްޔާ، ވިލާ އިންޓަރނޭޝަނަލް ހައި ސްކޫލް، ސެންޓަރ ފޮރ ހަޔަރ ސެކަންޑަރި އެޑިޔުކޭޝަން (މާލެ) ، ސެންޓަރ ފޮރ ހަޔަރ ސެކަންޑަރި އެޑިޔުކޭޝަން (ހުޅުމާލެ) އަދި ބިލަބޮންގ ހައި އިންޓަނޭޝަނަލް ސްކޫލް އިންނެވެ.

ދަރިވަރުންގެ އިޙްޔާ ފޯރަމްތައް އޮންނާނީ ކޮންމެ ހަފްތާއެއްގެ ހޯމަ އަދި ބުދަ ދުވަހުގެ ރޭގައިކަމަށް އިސްލާމީ ކަންތައްތަކާ ބެހޭ ވުޒާރާއިން މަޢުލޫމާތުދެއެވެ.