ދުނިޔޭގެ އެހެން ޤައުމުތަކާއި ރާއްޖެއާއި ގުޅުވައިދޭ މައިގަނޑު ތަނބަކީ ފަތުރުވެރިކަން!

ދުނިޔޭގެ އެހެން ޤައުމުތަކާއި ރާއްޖެއާ ގުޅުވައިދޭ މައިގަނޑު ތަނބަކީ ފަތުރުވެރިކަން ކަމަށް ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ. 

ވަޒީރު ޒަމީރު މިހެން ވިދާޅުވީ ދުނިޔޭގެ ފަތުރުވެރިކަމާއި ބެހޭ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ.

ވަޒީރު ޒަމީރު ވިދާޅުވީ ރާއްޖެއާއި ދުނިޔޭގެ އެހެން ޤައުމުތަކާ ގުޅުވައިދޭ އެންމެ މުހިންމު ތަނބަކީ ފަތުރުވެރިކަމުގެ ސިނާޢަތް ކަމަށެވެ. ފަތުރުވެރިކަން ހަމައެކަނި މުހިންމުވަނީ ރާއްޖޭގެ އިޤްތިޞާދަށް އެކަނި ނޫން ކަމަށެވެ. އަދި ބައިނަލްއަޤްވާމީ މައިދާނުގައި ޤައުމުތަކާ ގުޅުން ބަދަހި ކުރުމަށް ވެސް އެއީ ވަރަށް މުހިންމު ވަސީލަތެއް ކަމަށް ވިދާޅުވިއެވެ.

ތަފާތު ސަގާފަތްތަކުގެ ޤައުމުތައް އެއްބައި ކުރުމަގައާއި އަމާންކަން ފެތުރުމުގައި ފަތުރުވެރިކަން ވަރަށް މުހިންމު ދައުރެއް އަދާކުރާ ކަމަށް ވެސް ވަޒީރު ޒަމީރު ވިދާޅުވިއެވެ.

 އަދި ރާއްޖޭން މަސައްކަތް ކުރަނީ ހުރިހާ އެންމެނަށް ވެސް ފައިދާވާނެ ގޮތަށް ފަތުރުވެރިކަން ކުރިއެރުވުމަށް ކަމަށް ވެސް ޚާރިޖީ ވަޒީރު ޒަމީރު ވިދާޅުވިއެވެ.