ދުނިޔެ
ސުޙޫރުގެ ވަގުތުގައި އިޒްރާއިލުން ދިން ހަމަލާތަކުގައި 71 މީހަކު ޝަހީދުކޮށްލައިފި

ހަމަލާތަކުގައި ޝަހީދުވި މީހެއްގެ ހަށިގަނޑު ވެއްޓުނު އިމާރާތެއްގެ ދަށުން ނަގައިގެން ގެންދަނީ.
ސުޙޫރުގެ ވަގުތުގައި އިޒްރާއިލުން ދިން ހަމަލާތަކުގައި ފަލަސްޠީނުގެ 71 މީހަކު ޝަހީދުކޮށްލައިފިއެވެ.
ޣައްޒާގެ އުތުރާއި ދެކުނަށް ދެމުންދާ މި ހަމަލާތަކުގައި ގިނައިން ޝަހީދުވެފައިވަނީ އަންހެނުންނާއި ކުޑަކުދިންނެވެ. ފަލަސްޠީނުގެ ޞިއްޙަތާއި ބެހޭ ވުޒާރާއިން ބުނެފައިވަނީ ރޭގެ އެ ހަމަލާތަކުގައި ޝަހީދުވި މީހުންނާއި އެކު ޝަހީދުންގެ ޢަދަދު 436 އަކަށް އަރައިފައިވާކަމަށާއި އޭގެ ތެރޭގައި 183 ކުޑަކުދިން ހިމެނޭކަމަށެވެ.
ރޭގެ ހަމަލާތައް އިޒްރާއިލުން އަމާޒުކޮށްފައިވަނީ ޣައްޒާގައި މީހުން ދިރިއުޅޭ ގޭގެއަށެވެ. އެގޮތުން މިހަމަލާތައް 6 ގެއަކަށް އަމާޒުކޮށް ގިނަ ބަޔަކު ޝަހީދުކޮށްލައިފައިވެއެވެ.
އިޒްރާއިލްގެ ބޮޑުވަޒީރު ބެންޖަމިން ނަތަންޔާހޫ ބުނެފައިވަނީ އެމީހުން ހިފައިފައިވާ ދެކުނު އައްސޭރީގައި ތިބި ހަމާސްގެ މީހުންނާއި ދެކޮޅަށް ދޭ ހަމަލާތައް ވަރުގަދަކޮށް އިތުރުކުރާނެ ކަމަށެވެ.
އިޒްރާއިލުން ހުއްޓުމެއް ނެތި ޣައްޒާގެ އެކިދިމަދިމާއަށް ވައިގެ މަގުން ހަމަލާތައް ދެމުންދާއިރު ފަލަސްޠީނުގެ ރައްޔިތުން ދިރުއުޅެމުންދާ ސަރަހައްދުތަކުގެ ބިމަށް ހަނގުރާމަމަތީ ހަތިޔާރުތަކާއި އެކު ދަނީ އަރަމުންނެވެ.
އޮކްޓޯބަރު 2023 ގައި އިޒްރާއިލުން ޣައްޒާއަށް ދޭން ފެށި ހަމަލާތަކުގައި މިހާތަނަށް 49،500 އަށްވުރެ ގިނަ މީހުން ޝަހީދުވެފައިވެއެވެ. ރަމަޟާން މަސް ފެށުމުގެ ކުރިން ހަމަލާތައް ހުއްޓާލުމަށް އިޒްރާއިލުން އެއްބަސްވެ ދެބައިމީހުންގެ ދެމެދުގައި ޞުލްޙަ ގާއިމް ކުރުމުގެ ވާހަކަތައް ދިޔައީ ދެކެވެމުންނެވެ.
ނަމަވެސް ޞުލްޙައިގެ ވާހަކަތަކުގެ ދެވަނަ ފިޔަވަހީގައި ބައިވެރިވުމަށް އިޒްރާއިލުން ވަނީ ދެކޮޅުހަދައިފައެވެ. އަދި މިހަފްތާތެރޭގައި އިޒްރާއިލުން މިވަނީ ހަމަލާތައް ހުއްޓާލުމުގެ އެއްބަސްވުމާ ޚިލާފުވެ ވަރުގަފަ ހަމަލާތަކެއް ދޭން ފަށައިފައެވެ.