އަނިޔާގެ ސަބަބުން އުރުގުއޭ އާއި ބްރެޒިލް މެޗުގައި މެސީއަށް ނުކުޅެވޭނެ

އަނިޔާގެ ސަބަބުން ވޯލްޑް ކަޕް ކޮލިފައިންގައި އުރުގުއޭ އާއި ބްރެޒިލްއާ ދެކޮޅަށް އާޖެންޓީނާ ކުޅުމަށް ހަމަޖެހިފައިވާ މެޗުތަކުގައި، އެ ޓީމުގެ ކެޕްޓަން ލިއޮނެލް މެސީއަށް ނުކުޅެވޭނެކަމަށް އިންޓަ މިއާމީއިން ހާމަކޮށްފިއެވެ.

މެސީއަށް ލިބުނު އަނިޔާއާ ގުޅިގެން އެ ކްލަބުން ނެރުނު ބަޔާނެއްގައި ބުނީ، އާދީއްތަ ދުވަހު އެޓުލާންޓާއާ ދެކޮޅަށް ކުޅެ 2-1 އިން މޮޅުވި މެޗުގައި މެސީގެ އުކުޅުވަޅަށް "ލޯ-ގްރޭޑް" އަނިޔާއެއް ލިބިފައިވާކަމަށެވެ. އަދި އެނާއަށް އަނބުރާ ދަނޑަށް ނިކުމެވޭނެ ދުވަހެއް އެނގޭނީ ފަރުވާ ކުރިޔަށްދާގޮތް ބެލުމަށްފަހު ކަމުގައި ވެސް އެ ބަޔާނުގައި ބުނެފައިވެއެވެ.

އުމުރުން 37 އަހަރުގެ މެސީއަށް ލިބުނު އެހެން އަނިޔާއެއްގައި، މި މަހުގެ ކުރީކޮޅު އޭނާއަށް އިންޓަ މިއާމީގެ ތިން މެޗެއް ވެސް ވަނީ ގެއްލިފައެވެ. އަދި އޭގެ ފަހުން ކޮންކަކަފް ޗެމްޕިއަންޝިޕް މެޗުގައި ބެންޗުން އަރާ އޭނާ ވަނީ ޓީމު މޮޅުކޮށްދީފައެވެ.

ވޯލްޑް ކަޕް ކޮލިފައިންގައި ހުކުރު ދުވަހު އާޖެންޓީނާ ބައްދަލުކުރާނީ އުރުގުއޭއާއެވެ. އަދި އެ ޓީމުން ބްރެޒިލްއާ ކުޅޭ މެޗު އޮންނާނީ މި މަހުގެ 25 ގައެވެ.

10 ޓީމު ހިމެނޭ ސައުތު އެމެރިކާގެ ކޮލިފައިން ގްރޫޕްގެ އެއްވަނައިގައި މިވަގުތު، 5 ޕޮއިންޓުގެ ލީޑެއްގައި އޮތީ އާޖެންޓީނާއެވެ. އެހެންކަމުން، ބްރެޒިލްއާ އުރުގުއޭއާ ދެކޮޅަށް ކުޅުމަށް ހަމަޖެހިފައިވާ މެޗުތަކުގައި އެ ޓީމަށް ވޯލްޑް ކަޕް ޔަގީން ކުރެވިދާނެއެވެ. 

މި ގްރޫޕުގެ ފުރަތަމަ ހަ ޓީމަށް، އެމެރިކާ މެކްސިކޯ އަދި ކެނެޑާގައި މިއަންނަ އަހަރު ބާއްވާ ވޯލްޑް ކަޕުން ފުރުސަތު ލިބޭނެއެވެ. 

ސައުތު އެމެރިކާގެ ކޮލިފައިންގައި މިހާރު 12 ބުރު ކުޅެފައިވާއިރު، މިހާތަނަށް އެންމެ ގިނަ ގޯލު ކާމިޔާބުކޮށްފައިވަނީ މެސީއެވެ. އޭނާ ވަނީ 6 ގޯލު ކާމިޔާބުކޮށްފައެވެ.