ފެރީ ޓާމިނަލްތައް ކައުންސިލްތަކާއި ހަވާލުކުރުމުގެ މަސައްކަތް އާންމު މަސައްކަތްތަކާ ބެހޭ ވުޒާރާއިން ފަށައިފި

އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވަރކް މަޝްރޫޢުގެ ދަށުން ހއ، ހދ އަދި ށ އަތޮޅުގައި ޤާއިމްކުރެވިފައިވާ ފެރީ ޓާމިނަލްތައް ކައުންސިލްތަކާއި ޙަވާލުކުރުމުގެ މަސައްކަތް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާބެހޭ ވުޒާރާއިން ފަށައިފިއެވެ.

އެ ގޮތުން ރަށްރަށުގައި ޤާއިމްކުރެވިފައިވާ ފެރީ ޓާމިނަލްތަކާއި، ފެރީ ސްޕޮޓްތައް ރަށު ކައުންސިލްތަކާއި، ޙަވާލުކުރުމަށް އެ ވުޒާރާއާއި، ކައުންސިލްތަކާ ދެމެދު ވެވޭ ފަހުމުނާމާއާ ބެހޭ މަޢުލޫމާތު، އެ ވުޒާރާއިން އިއްޔެ އޮންލައިންކޮށް ކުރިއަށް ގެންދިޔަ ބައްދަލުވުމުގައި ވަނީ ހިއްސާ ކޮށްފައެވެ. 

އޮންލައިންކޮށް އިއްޔެ ބޭއްވި މި ބައްދަލުވުމުގައި އާރްޓީއެލްގެ ޒޯން 1ގައި ހިމެނޭ ހއ، ހދ އަދި ށ އަތޮޅުގެ ކައުންސިލްތަކުން ބައިވެރިވިއެވެ. މި ބައްދަލުވުމުގައި ވަޒީރު އާދަމް ޝަރީފު ޢުމަރުގެ އިތުރުން ވުޒާރާގެ ލޯކަލް ގަވަރމެންޓް ޑިޕާރޓްމެންޓް ހިންގުމާއި ޙަވާލުވެ ހުންނެވި ސްޓޭޓް މިނިސްޓަރ މުޙައްމަދު މާހިރާއި، ޕްލޭނިންގ ޑިޕާޓްމަންޓް ހިންގެވުމާއި ޙަވާލުވެ ހުންނެވި ސްޓޭޓް މިނިސްޓަރ އަލްއުސްތާޛު މޫސާ ފަތުޙީގެ އިތުރުން ވުޒާރާގެ އިސްވެރިންނާއި، ޕާރމަނަންޓް ސެކްރެޓަރީ ޑރ. ފާޠިމަތު މުނާ ބައިވެރިވެވަޑައިގެންނެވިއެވެ.

މި ބައްދަލުވުމުގައި ކައުންސިލްތަކުން ކުރެއްވި ސުވާލުތަކަށް ވެސް ވަޒީރު އާދަމް ޝަރީފު ޢުމަރު ޖަވާބުދެއްވިއެވެ. 

އިއްޔެ ވަނީ ހއ، ހދ އަދި ށ އަތޮޅުގެ ހުރިހައި ކައުންސިލްތަކަށް ފަހުމުނާމާ ފޮނުވާފައި ކަމަށާއި، އުންމީދު ކުރެވެނީ ވަރަށް އަވަހަށް މި ފަހުމުނާމާތަކުގައި ސޮއިކުރެވި އެ ތަންތަނުގެ ޚިދުމަތް ރައްޔިތުންނަށް ލިބިގެންދިއުން ކަމުގައި އާންމު މަސައްކަތްތަކާބެހޭ ވުޒާރާއިން ހާމަކޮށްފައިވެއެވެ.