އަމިއްލަ މަސައްކަތް ކުރާ ފަރާތްތަކުގެ ދަފްތަރެއް އެކުލަވައިލުމަށް ހުޅުވާލައިފި!

ދިވެހިރާއްޖޭގައި އަމިއްލަ މަސައްކަތް ކުރާ ފަރާތްތަކުގެ ދަފްތަރެއް އެކުލައިވަލުމަށް ހުޅުވާލައިފިއެވެ. 

ބިޒްނަސް ސެންޓަރ ކޯޕަރޭޝަނުން އެކުލަވައިލުމަށް މަސައްކަތް ކުރާ މި ދަފުތަރުގައި ރަޖިސްޓަރ ވުމަށް މިހާރު ވަނީ ހުޅުވާލައިފައެވެ. 

މިކަމާ ގުޅޭގޮތުން ބީސީސީން ބުނެފައިވަނީ މިއީ ރާއްޖޭގައި ވިޔަފާރިކުރާ އެންމެކުދި، ކުދި އަދި މެދުފަންތީގެ ވިޔަފާރި މަރުކަޒީކޮށް ރަޖިސްޓަރީ ކުރުމުގެ ނިޒާމެއް ޤާއިމް ކުރުމުގެ ތެރެއިން، އެކުލަވައިލާ ދަފްތަރެއް ކަމަށެވެ.

އަދި އަމިއްލަ މަސައްކަތްކުރައްވާ ފަރާތްތަކާއި، އެފަރާތްތައް މަސައްކަތް ކުރައްވާ ދާއިރާތައް ދެނެގަނެ އެފަރާތްތަކަށް ވިޔަފާރީގެ ފަހި މާހައުލެއް ކަށަވަރުކޮށް، އެފަދަ ވިޔަފާރިތައް ތަރައްޤީ ކުރުމަށް ބޭނުންވާ އެހީތެރިކަން ފޯރުކޮށްދިނުމުގެ މަޤުޞަދުގައި އެކުލަވާލެވޭ ދަފުތަރެކެވެ.

މި ދަފުތަރުގައި އަމިއްލަ މަސައްކަތް ކުރައްވާ ފަރާތްތައް ދަފުތަރު ކުރުމުގައި ޢަމަލުކުރާނެ އުޞޫލެއް ބީސީސީން ވަނީ ކަނޑައަޅާފައެވެ.

ބީސީސީން ވަނީ ދަފުތަރުގައި ރަޖިސްޓަރީވުމުގެ ފުރުޞަޠު މިއަދުން ފެށިގެން އެކަމަށް ޚާއްޞަ އޮންލައިން ޕޯޓަލް މެދުވެރިކޮށް ހުޅުވާލާފައެވެ. މި ޕޯޓަލްގެ ލިންކު ބީސީސީގެ މީސްމީޑިޔާ މަންސަތަކުންނާއި ބީސީސީގެ

ވެބްސައިޓު މެދުވެރިކޮށް ފެންނަން ހުންނާނެކަމަށް ބުނެފައިވެއެވެ.

ދަފްތަރުގައި ރަޖިސްޓަރީވާން ފުރަންޖެހޭ ފޯމު ފުރުމުގައި އެހީތެރިކަން ބޭނުންވާ ފަރާތްތަކަށް މާލޭގައި ހުންނަ ބީސީސީގެ މައި އޮފީހުންނާއި، އަތޮޅުތަކުގައި ޤާއިމްކުރެވިފައިވާ ބިޒްނަސް ސެންޓަރުތަކުން އެހީތެރިކަން ފޯރުކޮށްދެވޭނޭކަމަށް ބީސީސީން ބުނެއެވެ.

ރާއްޖޭގެ އެކިކަންކޮޅުތަކުގައި ތިއްބެވި، ވިޔަފާރީގެ ގޮތުގައި އަމިއްލަ މަސައްކަތްކުރައްވާ ފަރާތްތައް މި ދަފްތަރުގައި ރަޖިސްޓަރީ ވުމަކީ އެފަރާތްތަށް ވިޔަފާރީގައި ކުރިއަށް ދިއުމަށް ބޭނުންވާ ވަރަށްގިނަ ކަންކަމުގައި ލުއިފަސޭހަތައް ލިބޭނެ ކަމެއްކަމުން، އެފަދަ ހުރިހާ ފަރާތްތަކެއްވެސް މި ފުރުޞަޠުގެ ބޭނުން ހިއްޕެވުމަކީ ވަރަށް މުހިންމު ކަމެއްކަމަށް ބީސީސީން ބުނެއެވެ.