މ. މުލީ އެއަރޕޯޓުގައި މިހާރު ކުރިއަށްދަނީ ފިނިޝިންގެ މަސައްކަތްތައް: އެމްޓީސީސީ

މ. މުލީގައި ތަރައްޤީކުރަމުން އަންނަ އެއަރޕޯޓުގައި މިހާރު ކުރިއަށްދަނީ ފިނިޝިންގެ މަސައްކަތްތައް ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީން ވިދާޅުވެއްޖެއެވެ.

އެމްޓީސީސީން ވިދާޅުވީ، އެ ސަރަޙައްދުގައި މިހާރު ކުރިއަށްދަނީ ޓަރމިނަލް ބިލްޑިންގެ ފިނިޝިންގެ މަސައްކަތްތަކާއި، ފަޔާރ ބިލްޑިންގެ ފިނިޝިންގެ މަސައްކަތްތައް ކަަމަށެވެ.

މ. މުލީގައި ތަރައްޤީކުރަމުންދާ އެއަރޕޯޓުގެ މަސައްކަތަކީ އެމްޓީސީސީ އާއި ކޮންޓްރެކްޓް އުޞޫލުން ހަވާލުކޮށްގެން ކުރިއަށްދާ މަސައްކަތެކެވެ. މި މަސައްކަތް އެ ކުންފުންޏާއި ހަވާލުކޮށްފައިވަނީ 2021 ވަނަ އަހަރުގެ ފެބްރުއަރީ މަހުގެ 28 ވަނަ ދުވަހުއެވެ. އެމްޓީސީސީން ވިދާޅުވީ، މި މަސައްކަތް ނުނިމި ލަސްވެފައިވަނީ ފައިސާގެ ދަތިކަމާއި ގުޅިގެން ކަމަށެވެ.

މީގެ އިތުރުން އެމްޓީސީސީ އިން ވިދާޅުވީ، މި މަޝްރޫޢުގެ ޖުމްލަ އަދަދު 212 މިލިއަން ދިވެހި ރުފިޔާއަށް އަރާކަމަށެވެ. އެއީ، އެއަރޕޯޓު ތަރައްޤީކުރާ ސަރަޙައްދުގެ ބިން ހިއްކުމާއި، 1200 މީޓަރުގެ ރަންވޭއެއް އެޅުމާއި އެކު ހޭދަވާ އަދަދުކަމަށް އެ ކުންފުނިން މަޢުލޫމާތުދެއެވެ. 

ރާއްޖޭގެ އެކި ކަންކޮޅުތަކުގައި އިތުރު  އެއަރޕޯޓުތައް ޤާއިމްކުރުމަށް ސަރުކާރުން ގެންދަނީ މަސައްކަތް ކުރައްވަމުންނެވެ. އެގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ އަމާޒަކީ ރާއްޖޭގެ ކޮންމެ ރަށަކުންވެސް 30 މިނެޓު ތެރޭގައި ދެވޭނެ އެއާޕޯޓް ޤާއިމްކުރުމެވެ.