ޚަބަރު
މިރޭގެ އިޙްޔާ ފޯރަމް މާލޭގައި: ތަޤުރީރު ކުރައްވާނީ އައްޝައިޚް މުޙައްމަދު ލަޠީފް

އައްޝައިޚް މުޙައްމަދު ލަޠީފް/ފޮޓޯ: ފޭސްބުކް
މި އަހަރުގެ ރަމަޟާން މަހުގެ ރޭތައް އިޙްޔާކުރުމަށް ބާއްވާ އިޙްޔާ ފޯރަމް ސިލްސިލާގެ ފޯރަމެއް މިރޭ ބޭއްވުމަށް ހަމަޖެހިފައިވާކަމަށް އިސްލާމީ ކަންތައްތަކާ ބެހޭ ވުޒާރައިން ވިދާޅެވެއްޖެއެވެ.
އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، މިރޭގެ އިޙްޔާ ފޯރަމް އޮންނާނީ އިސްލާމީ މަރުކަޒުގެ ޖަލްސާ ކުރާ މާލަމުގައި ކަމަށެވެ.
މިރޭގެ ފޯރަމްގައި ތަޤުރީރު ކުރައްވާނީ އިސްލާމީ މަރުކަޒުގެ އިސް އިމާމު ފަޟީލަތުއްޝައިޚް މުޙައްމަދު ލަޠީފްއެވެ. އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، އިޙްޔާ ފޯރަމް ފެށުމަށް ހަމަޖެހިފައިވަނީ މިރޭ 21:30 ގައި ކަމަށެވެ. އަދި މިރޭގެ ފޯރަމްގައި ތަޤުރީރު ކުރައްވާނީ "ނަމާދުގެ މާތްކަން" މި މަޢުޟޫގެ މައްޗަށް ކަމަށް އެ ވުޒާރާއިން މަޢުލޫމާތުދެއެވެ.
ފާއިތުވި އަހަރުތަކެކޭ އެއްގޮތަށް މިއަހަރު ވެސް އިޙްޔާ ފޯރަމްއަށް ވަޑައިގަންނަވާ ބޭފުޅުންގެ ތެރެއިން ގުރުއަތުން ހޮވޭ ބޭފުޅުންނަށް ހާއްސަ އިނާމުތަކެއް ދިނުމަށް ވަނީ ހަމަޖެހިފައެވެ. އެގޮތުން 1 ވަނައަށްދާ ފަރާތަކަށް ބީއެމްއެލް އިސްލާމިކްއިން ވަނީ 1,500 ރުފިޔާގެ ގިފްޓު ކާޑެއް ހުށައަޅައިފައެވެ. އަދި ދެވަނައަށްދާ ފަރާތަކަށް ބީއެމްއެލް އިސްލާމިކް އިން 1,000 ރުފިޔާގެ ގިފްޓު ކާޑެއް ދިނުމަށް ހަމަޖެހިފައިވާއިރު، ތިންވަނައަށް ދާ ފަރާތަކަށް ހުށައަޅާފައިވަނީ 700 ރުފިޔާގެ ގިފްޓު ކާޑެކެވެ. އަދި 4 ވަނައަށް ދާ ފަރާތަކަށް ވަނީ 500 ރުފިޔާގެ ގިފްޓު ކާޑެއް ހުށައަޅައިފައެވެ. މީގެ އިތުރުން، އިސްލާމީ ކަންތައްތަކާ ބެހޭ ވުޒާރާއިން ވަނީ އިނާމެއްގެ ގޮތުގައި ރިޔާޟުއްޞާލިޙީން އަދި ފިޤުޙުއްސުންނާ ދިނުމަށް ހަމަޖެހިފައެވެ.
މިއަހަރުގެ ރަމަޟާން މަހު މާލޭގައި 8 އިޙްޔާ ފޯރަމް ބޭއްވުމަށް ވަނީ ހަމަޖެހިފައެވެ. މީގެ އިތުރުން، އަތޮޅުތެރޭގެ 7 ރަށެއްގައި އިޙްޔާ ފޯރަމް ކުރިއަށް ގެންދިޔުމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ނިންމަވާފައެވެ. އަދި 6 ސްކޫލަކާއި އެކު ދަރިވަރުންގެ އިޙްޔާ ފޯރަމެއް ވެސް މި ރަމަޟާން މަހު އޮންނާނެ ކަމަށް އެ ވުޒާރާއިން ވިދާޅުވެއެވެ.