ޚަބަރު
ރަމަޟާންމަހުގެ ފަހު ދިހައެއްގައި މާލެ ސަރަޙައްދުގައި ބަހުގެ ޚިދުމަތްދޭ ވަގުތު އިތުރުކުރަން ނިންމަވައިފި

އެމްޓީސީސީ ބަސް/ފޮޓޯ: އަވަސް
ރަމަޟާންމަހުގެ ފަހު ދިހައެއްގައި ގައި ގްރޭޓަރ މާލޭ ސަރަޙައްދުގައި ބަހުގެ ޚިދުމަތްދޭ ވަގުތުތައް އިތުރުކުރުމަށް ނިންމަވާފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީން ވިދާޅުވެއްޖެއެވެ.
އެމްޓީސީސީން ވިދާޅުވީ، އެކުންފުނިން މާލެއާއި ހުޅުމާލެއާ ދެމެދު، އަދި މާލެތެރޭގައި ފޯރުކޮށްދެމުންދާ އާރްޓީއެލް ބަހުގެ ޚިދުމަތްދޭ ގަޑިތައް އިތުރުކުރަން ނިންމަވާފައިވާ ކަމަށެވެ. އަދި މިކަމަކީ އެ ކުންފުނީގެ ބަސްތަކުގައި ދަތުރުކުރައްވާ ފަރާތްތަކަށް އިތުރު ލުއިފަސޭހައެއް ދިނުމަށް ކުރާ މަސައްކަތެއްކަމަށް އެ ކުންފުނިން ވަނީ ވިދާޅުވެފައެވެ.
މިގޮތުން، މާލެއާއި ހުޅުމާލެއާ ދެމެދު ދަތުރުކުރާ 1R، 2R، 6R، 7R އަދި 8R ގެ ދަތުރުތައް ދަންވަރު 1:30 ގެ ނިޔަލަށް އިތުރުކުރުމަށް އެމްޓީސީސީ އިން ވަނީ ހަމަޖައްސަވާފައެވެ. އަދި މާލެ އެތެރޭގައި ދަތުރުކުރާ 10R އަދި 11R ގެ ދަތުރުތަކުގެ ޚިދުމަތް 2:00 އާއި ހަމަޔަށް އިތުރުކުރަން ވެސް އެ ކުންފުނިން ވަނީ ނިންމާފައެވެ. މީގެ ކުރިން ބަސް ދަތުރުތައް ކުރަމުންދިޔައީ ރޭގަނޑު 12:00 ޖެހުމާ ހަމައަށެވެ.
މީގެ އިތުރުން އެމްޓީސީސީ އިން ވިދާޅުވީ، މި ބަދަލުތަކަކީ ރަމަޟާން މަހުގައި ބަސް ދަތުރުކުރާ ފަރާތްތަކުގެ ޑިމާންޑަށް ބެލުމަށްފަހު، ދަތުރުވެރިންގެ ޚިޔާލުތަކަށް ރިޢާޔަތްކޮށް ގެނެސްފައިވާ ބަދަލުތަކެއް ކަމަށެވެ. އަދި މި ބަދަލުތަކާއި އެކު، ރަމަޟާން މަހުގައި އެމްޓީސީސީ ގެ ބަސްތަކުގައި ދަތުރުކުރާ ފަރާތްތަކަށް އިތުރު ލުއިފަސޭހަކަމެއް ލިބިގެންދާނެކަމަށް އުންމީދު ކުރައްވާކަމަށް އެ ކުންފުނިން ވަނީ ވިދާޅުވެފައެވެ.