ގޮވާމުން ފިޠުރުޒަކާތް ބަލައިގަތުން އިސްކަންދަރު ސްކޫލަށް ބަދަލުވެއްޖެ

މާލޭ ސިޓީގައި ގޮވާމުން ފިޠުރުޒަކާތް ބަލައިގަތުމަށް ހަމަޖެހިފައިވާ ތަން އިސްކަންދަރު ސްކޫލަށް ބަދަލު ވެއްޖެއެވެ.

ދިވެހި ރާއްޖޭގެ ޒަކާތު ހައުސްއިން ވިދާޅުވީ ގޮވާމުން ޒަކާތް ބަލައިގަތުން ކުރިން ހަމަޖެހިފައިވަނީ މަޖީދިއްޔާ ސްކޫލުގެ ޞަލާހުއްދީން ހޯލުގައި ކަމަށެވެ. ނަމަވެސް މިހާރުވަނީ އިސްކަންދުރު ސްކޫލަށް ބަދަލުކުރެވިފައެވެ. އެގޮތުން 13:00 ން 16:00 ޒަކާތް ބަލައިގަތުން ކުރިއަށް ގެންދާނެ ކަމަށް ޒަކާތު ހައުސްއިން މައުލޫމާތު ދެއެވެ.

އެހެން އަހަރުތަކެކޭ ވެސް އެއްފަދައިން މި އަހަރުވެސް ގޮވާމުގެ ބާވަތްތަކުން ފިޠުރުޒަކާތް ދެއްކުމަށް ބޭނުންވާފަރާތްތަކަށް އެ ފުރުޞަތު ވަނީ ހުޅުވާލާފައެވެ. އެގޮތުން 22 ރަމަޟާން 1446 (22 މާރިޗު 2025) ވާ ހޮނިހިރު ދުވަހުން ފެށިގެން، 27 ރަމަޟާން 1446 (27 މާރިޗު 2025) ވާ ބުރާސްފަތި ދުވަހުގެ ނިޔަލަށް ގޮވާމުން ފިތުރު ޒަކާތް ދެއްކޭނެއެވެ. މފިޠުރުޒަކާތުގެ ގޮތުގައި ދައްކާނީ އެބަޔަކު ޢާންމު ގޮތެއްގައި އަހަރުތެރޭ ކެއުމަށް ބޭނުންކުރާ ގޮވާމުގެ ބާވަތަކުން ބޮލަކަށް، 2.4 ކިލޯގެ މިންވަރެވެ. 

ފިތުރު ޒަކާތުގެ ގޮތުގައި ބަލައިގަންނަ ތަކެތި:

– އާދައިގެ ހަނޑޫ

– ތައިލެންޑް ހަނޑޫ

– ބާސްމަތީ ހަނޑޫ

– ރަތް ހަނޑޫ

– ގޮދަން ފުށް

– އާޓާ ފުށް

އަތޮޅުތެރޭގައި ގޮވާމުން ފިޠުރުޒަކާތް ބަލައިގަތުން އެ ރަށެއްގެ ކައުންސިލް އިދާރާއިން ހަމަޖައްސާ ގޮތެއްގެ މަތިން ބަލައިގަނެ ފަޤީރުންނާއި މިސްކީނުންގެ ދަފްތަރުގައިވާ ފަރާތްތަކަށް ބެހުމަށް ހުއްދަ ދީފައިވާކަމަށް ޒަކާތު ހައުސްއިން ވިދާޅުވިއެވެ.