Ads by Exprox

ޚަބަރު

ފިޠުރު ޢީދަށް މާލެ ސަރަޙައްދު ދިއްލާލުމުގެ މަސައްކަތް ފަށައިފި

ފިޠުރު ޢީދަށް މާލެ ސަރަޙައްދު ދިއްލާލުމުގެ މަސައްކަތް ފަށައިފި

މިދިޔަ އަހަރުގެ ފިޠުރު ޢީދަށް މާލެ ސަރަޙައްދު ދިއްލާފަ/ފޮޓޯ: އެޑިޝަން އެމްވީ

20 މާރިޗު 2025، 11:39

މިއަހަރުގެ ފިޠުރު ޢީދާއި  ދިމާކޮށް ގްރޭޓަރ މާލެ ސަރަޙައްދު ކުލަ ބޮކިތަކާއި ގިޑިގެތަކުން ދިއްލާލުމުގެ މަސައްކަތް ފަށައިފިއެވެ.

މި މަސައްކަތަކީ މާލެ ސިޓީ ކައުންސިލާއި، ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވުޒާރާ އާއި، ސްޓެލްކޯ އިން ގުޅިގެން ކުރިއަށްގެންދާ މަސައްކަތެކެވެ.

މި މަސައްކަތް ފެށުމާއި ގުޅޭގޮތުން ބޭއްވި ބައްދަލުވުމެއްގައި މާލެ ސިޓީގެ މޭޔަރ އާދަމް ޢާޒިމް ވިދާޅުވީ، ފިޠުރު ޢީދުގައި ގްރޭޓަރ މާލެ ސަރަޙައްދު ރީތި ކުލަ ބޮކިތަކުން ދިއްލާ، ތަފާތު ގޮތަކަށް ޒީނަތްތެރިކުރުމަށް ކުރަމުންދާ މަސައްކަތުގައި އެ ކައުންސިލްގެ ފުރިހަމަ އެއްބާރުލުން ލިބޭނެކަމަށެވެ. އަދި މިކަމުގައި މާލެ ސިޓީ ކައުންސިލުން ކޮށްދެވެން ހުރި ހުރިހާ މަސައްކަތެއް ކޮށްދެއްވާނެކަމުގެ ޔަޤީންކަން މޭޔަރ ޢާޒިމް ވަނީ ދެއްވާފައެވެ.

މި ބައްދަލުކުރެއްވުމުގައި ވާހަކަފުޅު ދައްކަވަމުން ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވުޒާރާގެ ސްޓޭޓް މިނިސްޓަރ މޫސާ ފަތުޙީ އާދަމް ވިދާޅުވީ، މިދިޔަ އަހަރާއި ޚިލާފަށް މިއަހަރު މިފަހަރުގެ ޢީދުގައި ސެންޓްރަލް ތަނެއްގެ ގޮތުގައި ދިއްލުމަށް ހަމަޖެހިފައިވަނީ، ހުޅުމާލެ ސެންޓްރަލް ޕާކު ކަމަށެވެ. އަދި ފިޠުރު ޢީދާއި ގުޅިގެން ބާއްވާ ރަސްމިއްޔާތުވެސް މިއަހަރު ބޭއްވުމަށް ހަމަޖެހިފައިވަނީ ސެންޓްރަލް ޕާކުގައި ކަމަށް އޭނާ ވަނީ ވިދާޅުވެފައެވެ. މިިދިޔަ އަހަރު މާލެ ސަރަޙައްދުގައި ސެންޓްރަލް ތަނެއްގެ ގޮތުގައި ދިއްލާފައިވަނީ ޖުމްހޫރީ މައިދާނެވެ.

މީގެ އިތުރުން މި ބައްދަލުވުމުގައި މާލެ ސިޓީ ކައުންސިލް ގެ އެގްޒެކެޓިވް ޝަމްހޫޒާ އަހުމަދު ވިދާޅުވީ، ފިޠުރު ޢީދަށް މާލެ ދިއްލުމުގެ އިތުރުން ވިލިމާލެ އާއި ހުޅުމާލޭގައި ވެސް  ޢީދު ރަމްޒުކޮށްދޭ މަސައްކަތްތަކެއް ކުރާނެ ކަމަށެވެ. އެގޮތުން، މި ސަރަހައްދުތަކުގައި ވެސް ކުލަ ބޮކި ދިއްލުމާއި ރީތި ގިޑިގެތަކެއް ހެދުމުގެ މަސައްކަތް ކުރިއަށްދާނެ ކަމަށް އޭނާ ވަނީ ވިދާޅުވެފައެވެ.

މި ބައްދަލުވުމުގައި މާލެ ސިޓީގެ ޑެޕިއުޓީ މޭޔަރ މުޙައްމަދު އަރީޝް އަދި ސިތީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވުޒާރާގެ ބައެއް އިސްވެރިން ވަނީ ބައިވެރިވެވަޑައިގެންފައެވެ. މި ވުޒާރާއިން ވިދާޅުވީ، ނިމިދިޔަ އަހަރުގެ ފިޠުރު ޢީދަށް ވުރެ  މިއަހަރުގެ  ޢީދަށް މާލެ ދިއްލާ ޒީނަތްތެރިކުރުމަށް، ޚާއްޞަ ސަމާލުކަމެއްދީ، އިތުރު މަސައްކަތްތަކެއް ކުރައްވަން ނިންމަވާފައިވާ ކަމަށެވެ.

މި ލިޔުން ކިޔާލުމުން

Ads by MSS