އިންގްލެންޑާއެކު ޓުޗެލްގެ ފުރަތަމަ މެޗު ލެވިސް-ސްކެލީއަށް ވެސް ޚާއްޞަވެއްޖެ

އިންގްލެންޑުގެ ކޯޗުގެ މަޤާމަށް އަލަށް ހަވާލުވި ތޯމަސް ޓުޗެލްގެ ފުރަތަމަ މެޗު، އާސެނަލްއަށް ކުޅެމުން އަންނަ ޒުވާން ކުޅުންތެރިއާ، މައިލްސް ލެވިސް-ސްކެލީއަށް ވެސް ޙާއްސަވެއްޖެއެވެ. 

މިއީ 2026 ވަނަ އަހަރު އެމެރިކާ، މެކްސިކޯ އަދި ކެނަޑާގައި ބޭއްވުމަށް ހަމަޖެހިފައިވާ ވޯލްޑް ކަޕް ކޮލިފައިން މެޗެކެވެ. އަލްބޭނިއާއާ ދެކޮޅަށް ކުޅުނު މި މެޗު އިންގްލެންޑް ކާމިޔާބުކުރީ 2-0 އިންނެވެ.

ވޯލްޑް ކަޕްގެ ޔޫރަޕް ކޮލިފިކޭޝަންގެ ގްރޫޕް-ކޭގައި އިންގްލެންޑާއި އަލްބޭނިއާ ބައްދަލުކުރި މި މެޗަކީ ޓުޗެލް ފަދައިން ލެވިސް-ސްކެލީގެ ވެސް ފުރަތަމަ މެޗެވެ. އެއަށް ވުރެ ބޮޑަށް މި މެޗު ލެވިސް-ސްކެލީއަށް ޙާއްސަވީ، އަލްބޭނިއާ ކޮޅަށް ގޯލުޖަހައި، އިންގްލެންޑުގެ ޖާޒީގައި ގޯލު ޖެހި އެންމެ ޒުވާން ކުޅުންތެރިއާގެ ޝަރަފު އޭނާއަށް ލިބުމެވެ.

އިންގްލެންޑުގެ ފުށުން އާދައިގެ ކުޅުމެއް ފެނުނު މި މެޗުގައި އެ ޓީމަށް ލީޑު ނަގައިދިނީ ލެވިސް-ސްކެލީއެވެ. މެޗުގެ 20ވަނަ މިނެޓުގައި ޖޫޑް ބެލިންގްހަމްގެ ޕާހަކުން އޭނާ މި ގޯލު ކާމިޔާބުކުރިއިރު އޭނާގެ އުމުރަކީ 18 އަހަރާއި 176 ދުވަހެވެ. ކުރިން މި ރެކޯޑު އޮތް މާކަސް ރަޝްފޯޑު އިންގްލެންޑުގެ ޖާޒީގައި 2016 ވަނަ އަހަރު ފުރަތަމަ ގޯލު ކާމިޔާބުކުރިއިރު އޭނާގެ އުމުރަކީ 18 އަހަރާއި 209 ދުވަހެވެ.

ރޭގެ މެޗުގައި އިންގްލެންޑުގެ ދެވަނަ ގޯލު ކާމިޔާބުކޮށްދިނީ މެޗު ނިމެން 13 މިނެޓަށް ވެފައި ވަނިކޮށް އެ ޓީމުގެ ކެޕްޓަން ހެރީ ކޭންއެވެ. މިއީ އިންގްލެންޑް ޖާޒީގައި އޭނާ ކާމިޔާބުކުރި 70 ވަނަ ގޯލެވެ.

ޓުޗުލް އާއި ލެވިސް-ސްކެލީގެ އިތުރުން، ނިއުކާސްލްގެ ބާންސްއަށް ވެސް ރޭގެ މެޗަކީ އިންގްލެންޑު ޓީމުގައި ހިމެނި، ޤައުމީ ތަމްސީލުކޮށްލަން ލިބުނު ފުރަތަމަ ފުރުސަތެވެ. އޭނާ ވަނީ މިދިޔަ ހަފްތާގައި ކުޅުނު ކަރަބޯ ކަޕްގެ ފައިނަލްގައި ލިވަޕޫލް ކޮޅަށް ގޯލު ޖަހާފައެވެ.