އޭޝިއަން ކަޕް ކޮލިފައިންގައި ފިލިޕީންސްއާ ދެކޮޅަށް ކުޅޭ މެޗަށް ރާއްޖެ ފުރައިފި

އޭޝިއަން ކަޕް ކޮލިފައިންގައި ފިލިޕީންސްއާ ދެކޮޅަށް ކުޅެން ހަމަޖެހިފައިވާ މެޗަށް ދިވެހިރާއްޖޭގެ ފުޓުބޯޅަ ޓީމު މިއަދު ފުރައިފިއެވެ.

ސައުދީ އަރަބިއްޔާގައި 2027 ވަނަ އަހަރު ބާއްވާ އޭޝިއަން ކަޕަށް ކޮލިފައިވުމަށް ރާއްޖެއާ ފިލިޕީންސް ކުޅޭ މެޗު އޮންނާނީ މި މަހުގެ 25 ވަނަ ދުވަހެވެ.

މި މެޗަށް ތައްޔާރުވުމުގެ ގޮތުން ރާއްޖޭގެ ޓީމާއި ސަރަޙައްދީ ގަދަ ބާރު، އިންޑިއާއާ ވަނީ މިދިޔަ ބުދަ ދުވަހު އެކުވެރިކަމުގެ މެޗެއް ކުޅެފައެވެ. އިންޑިއާގެ ޝިލޮންގްގައި ކުޅުނު މި މެޗު 3-0 އިން ކާމިޔާބުކުރީ އިންޑިއާއެވެ.

ޕިލިޕީންސްގެ ޓީމު އެންމެ ފަހުން ކުޅެފައިވަނީ އޭސިއާން ޗެމްޕިއަންޝިޕްގެ މެޗުތަކެވެ. ޑިސެންބަރު މަހު ކުޅުނު މި މުބާރާތުގެ ގްރޫޕް-ބީގެ ދެވަނަ ޓީމެއްގެ ގޮތުގައި ފިލިޕީންސްއިން ސެމީފައިނަލަށް ދަތުރުކޮށްފައިވާއިރު، ސެމީފައިނަލްގައި ބައްދަލުކުރަން ޖެހުނީ ތައިލެންޑާއެވެ. ތައިލެންޑާއެކު ކުޅުނު ފުރަތަމަ ލެގު 2-1 އިން ކާމިޔާބުކުރި ނަމަވެސް، ރަށުން ބޭރުގައި ކުޅުނު މެޗުން 3-1 އިން ބަލިވުމުން، މި މުބާރާތުގެ ފައިނަލަށް ފިލިޕީންސް ދަތުރުކޮށްފައެއް ނުވެއެވެ. 

އޭޝިއަން ކަޕް ކޮލިފައިންގެ މި ބުރުގައި ހިމެނޭ 24 ޓީމު 6 ގްރޫޕަކަށް ބަހާފައިވާއިރު، މި ބުރުން އޭޝިއަން ކަޕަށް ކޮލިފައިވާނީ ގްރޫޕްގެ އެއްވަނަ ހޯދާ ޓީމެވެ. ރާއްޖެ ހިނެމޭ ގްރޫޕް-އޭ ގައި ދެން ހިމެނެނީ ތަޖިކިސްތާން، ފިލިޕީންސް އަދި ޓީމޯރ ލާސްޓޭއެވެ.

މި ބުރުގައި ރާއްޖެއިން ކުޅޭ ފުރަތަމަ ތިން މެޗު އޮތީ ރާއްޖެއިން ބޭރުގައެވެ. ފިލިޕީންސް މެޗަށްފަހު ޖޫން 10ގައި ޓީމޯރ ލާސްޓޭއާ ކުޅެން ހަމަޖެހިފައިވާއިރު، އޮކްޓޯބަރު 9 ގައި ތަޖިކިސްތާންއާ ބައްދަލުކުރާ މެޗު ވެސް އޮންނާނީ ރަށުން ބޭރުގައެވެ. 

މި ބުރުގައި ރާއްޖޭގައި ކުޅެން ހަމަޖެހިފައިވާ ފުރަތަމަ މެޗު އޮތީ އޮކްޓޯބަރު 14 ގައި ތަޖިކިސްތާނާ ދެކޮޅަށެވެ. އަދި އޭގެ ފަހުން ނޮވެންބަރު 18 ގައި ފިލިޕީންސްއާ ދެކޮޅަށް މާލޭގައި ކުޅޭ މެޗު އޮންނާނެއެވެ.

ރާއްޖޭގެ ފަހު މެޗު އޮތީ މި އަންނަ އަހަރުގެ މާރޗު 31ގައި ޓީމޯރ ލާސްޓޭއާ ދެކޮޅަށެވެ.

މި މުބާރާތުގައި ރާއްޖެ ހިމެނޭ ގްރޫޕުގެ ހުރިހާ ޓީމަކާއި ވެސް ކުރިން މެޗުތައް ކުޅެފައިވެއެވެ. އެގޮތުން ފިލިޕީންސްއާ ދެކޮޅަށް އޭއެފްސީ ޗެލެންޖު ކަޕުގެ ސެމީ ފައިނަލުގައި 2014 ވަނަ އަހަރު ކުޅުނުއިރު، އެ މެޗުން ރާއްޖެ ބަލިވީ 3-2 އިންނެވެ. 

އޭޝިއަން ކަޕް ކޮލިފައިންގައި ރާއްޖެ ހިމެނޭ ގްރޫޕްގެ އެންމެ ރޭންކިން ރަގަޅު ތަޖިކިސްތާނާ މީގެ ކުރިން ތިން ފަހަރެއްގެ މަތިން ކުރިމަތިލާފައިވެއެވެ. އެގޮތުން 1998 ވަނަ އަހަރު އޮތް އޭޝިއަން ގޭމްސްގެ މެޗަކާއި 2011 ވަނަ އަހަރާއި 2015 ވަނަ އަހަރު ކުޅުނު އެކުވެރިކަމުގެ މެޗު ހިމެނެއެވެ. އޭޝިއަން ގޭމްސް މެޗުގައި ރާއްޖެ 3-0 އިން ބަލިވިއިރު، 2011 ވަނަ އަހަރު ކުޅުނު މެޗު އެއްވަރުވެފައި ވަނީ 0-0 އިންނެވެ. އަދި 2015 ގައި ކުޅުން މެޗުން ރާއްޖެ ބަލިވީ 2-0 އިންނެވެ.

ޓީމޯރ ލާސްޓޭއާ ރާއްޖެއިން ބައްދަލުކޮށްފައިވަނީ އެންމެ ފަހަރަކުއެވެ. އެގޮތުން 2014 ވަނަ އަހަރުގެ އޭޝިއަން ގޭމްސްގައި މި ދެ ޓީމު ބައްދަލުކުރި މެޗު 3-2 އިން ކާމިޔާބުކުރީ ރާއްޖެއެވެ.