ދުނިޔެ
ޣައްޒާގައި ހުރި ހަމައެކަނި ކެންސަރުގެ ބަލިމީހުންނަށް ފަރުވާދޭ ހޮސްޕިޓަަލް އިޒްރައިލުން ހަލާކުކޮށްލައިފި

ތުރުކީ ފަލަސްޠީން ފްެރެންޑްޝިޕް ހޮސްޕިޓަލް ހުޅުވިއިރުގެ ފޮޓޯއެއް
ފަލަސްޠީނުގެ ޣައްޒާގައި ކެންސަރު ބަލީގެ މީހުންނަށް ފަރުވާދެމުންދިޔަ ހަމައެކަނި ހޮސްޕިޓަލް ކަމަށްވާ ތުރުކީ ފަލަސްޠީން ފްެރެންޑްޝިޕް ހޮސްޕިޓަލް ހަލާކުކޮށްލައިފިއެވެ.
އަލްޖަޒީރާގެ ނޫސްވެރިޔާ ހާނީ މަޙްމޫދު ބުނެފައިވަނީ ޣައްޒާގެ އުތުރާއި ޣައްޒާ ސިޓީގައި މީހުން ދިރިއުޅޭ ގެތަކަށް ދެމުންދާ ހަމަލާތަކުގެ ސަބަބުން ގިނަ ބަޔަކު ޝަހީދުވުމާއި ޒަޚަމްވެފައިވާ މީހުން ފަރުވާއަށް ހޮސްޕިޓަލަށް ގެނެވެމުންދާތީ ހޮސްޕިޓަލުގެ އެތެރޭގެ ޙާލަތު އޮތީ ވަރަށް އުނދަގޫ ގޮތަކަށް ކަމަށެވެ.
ޣައްޒާގެ އެކި ތަންތަނަށް ހުއްޓުމެއްނެތި ނެދުންދާ ގިނަ އަދަދެއްގެ ވައިގެ ހަމަލާތައް އަމާޒުކޮށްފައި ވަނީ މީހުން ދިރިއުޅޭ ގެތަކާއި އާންމު ވަސީލަތްތަކަށް ކަމަށް ހާނީ މަޙްމޫދު ބުނެފައިވެއެވެ.
މީގެއިތުރުން އިންޒާރުދިނުމެއް ނެތި ވައްޓަމުންދާ ބޮންތަކުން ރައްކާތެރިކަން ހޯދަން ބޭނުންވާ މީހުންނަށް ވަގުތީ ހިޔާތަކަކަށް ހޮސްޕިޓަލްތައް ވަނީ ވެފައެވެ.
އެގޮތުން، ކެންސަރު ބަލިމީހުންނަށް ޚާއްޞަ ހަމައެކަނި ހޮސްޕިޓަލް، ނެޓްޒާރިމް ކޯރިޑޯ ކައިރީގައި އޮންނަ ތުރުކީ ފަލަސްތީނު ފްރެންޑްޝިޕް ހޮސްޕިޓަލަށް އިޒްރާއީލު އަސްކަރިއްޔާއިން ވަނީ ހަމަލާދީ ގޮއްވާލައިފައެވެ.
ތުރުކީ-ފަލަސްތީނުގެ ފްރެންޑްޝިޕް ހޮސްޕިޓަލާއި މެޑިކަލް ސްކޫލަކީ ޔޫއެސްއޭއައިޑީއާ އެއްގޮތް ސަރުކާރުގެ އިދާރާއެއް ކަމަށްވާ ތުރުކީ ކޯޕަރޭޝަން އެންޑް ކޯޑިނޭޝަން އެޖެންސީ (ޓިކާ) އިން ބިނާކޮށް ވަސީލަތްތައް ގާއިމްކޮށްފައިވާ ތަނެކެވެ. 2011 ވަނަ އަހަރު އެ ހޮސްޕިޓަލުގެ މަސައްކަތް ފެށިއިރު، 2017 ވަނަ އަހަރު ނިންމާލާފައިވަނީ 70 މިލިއަން ޑޮލަރު ހަރަދުކޮށްގެނެވެ.
އެއީ ކެންސަރު ބަލި މީހުންނަށް ފަރުވާ ދިނުމަށް ޚާއްސަ ކުރެވިފައިވާ ޣައްޒާގެ ހަމައެކަނި ހޮސްޕިޓަލެވެ. އަހަރަކު 30،000 މީހުންނަށް ފަރުވާ ދިނުމުގެ ޤާބިލްކަން އެހޮސްޕިޓަލަށް ލިބިގެންވެއެވެ.
އެހޮސްޕިޓަލުގެ ތިން ވަނަ ފަންގިފިލާއަށް އިޒްރާއީލުގެ ވައިގެ ހަމަލާއެއް ފުރަތަމަ ދީފައިވަނީ 2023 ވަނަ އަހަރުގެ އޮކްޓޯބަރު މަހުގެ 30 ވަނަ ދުވަހު އެވެ.
ތެލުގެ ދަތިކަމުގެ ސަބަބުން ނޮވެމްބަރު 1، 2023 ގައި އެ ހޮސްޕިޓަލް ބަންދުކުރަން މަޖުބޫރުވެފައިވާއިރު، 70 ބަލިމީހުންގެ ފުރާނަ ނުރައްކަލުގެ ތެރެއަށް ވެއްޓިފައިވާ ކަމަށް އދ. އިން ބުނެފައިވެއެވެ. އޭގެ ފަހުން އެހޮސްޕިޓަލުން ހަތަރު ބަލިމީހަކު މަރުވީ ޞިއްޙީ ފަރުވާ ނުލިބިގެންނެވެ.
2024 ވަނަ އަހަރުގެ މެއި މަހުގެ ސެޓެލައިޓް ފޮޓޯތަކުން ފެންނަ ގޮތުގައި އިޒްރާއީލުގެ އަސްކަރިއްޔާއިން އެ ހޮސްޕިޓަލް އަސްކަރީ މަރުކަޒެއްގެ ގޮތުގައި ބޭނުން ކުރަމުން ދިޔަ އެވެ.
އޮންލައިންކޮށް އާންމުކުރި ފޫޓޭޖްތަކުން ފެންނަ ގޮތުގައި ހުކުރު ދުވަހު އިޒްރާއީލުގެ އަސްކަރިއްޔާއިން އެ ހޮސްޕިޓަލް ތަޅާލުމުގެ މަސައްކަތް ކުރިއަށް ގެންގޮސްފައިވެއެވެ. އިޒްރާއީލުން ބުނެފައިވަނީ ކެންސަރު ހޮސްޕިޓަލަކީ ހަމާސްއިން ބޭނުންކުރާ ހޮސްޕިޓަލެއް ކަމަށެވެ. ނަމަވެސް އެއްވެސް ހެއްކެއް ފޯރުކޮށްދީފައެއް ނުވެއެވެ.
އިޒްރާއިލް ސިފައިން އެސަރަހައްދަށް ހަމަލާދީ އެސަރަހައްދުގައި ހުރި ތަންތަން ހަލާކުކުރަމުންދަނީ އެތަނުގައި އެމީހުންގެ މިލިޓަރީ ބޭސްއެއް ގާއިމްކޮށް ބާރުގަދަ ކުރުމަށެވެ.
އެކަން ކުރުމަށް އިޒްރާއީލުގެ އަސްކަރިއްޔާއިން މީހުން ދިރިއުޅޭ އިތުރު އިމާރާތްތައް ހަލާކުކޮށް، އެ ސަރަހައްދުގެ ދަނޑުވެރިކަމުގެ އިތުރު ބިންތަކަށް ބުލްޑޯޒަރުތަކާއި އެކު އަރައި އެތަންތަން ހަލާކުކުރަމުންދާ ކަމަށް އަލްޖަޒީރާގައި ބުނެފައިވެއެވެ.
މިދިޔަ އަންގާރަ ދުވަހު އިޒްރާއިލުން ދޭން ފެށި ހަމަލާތަކުގެ ސަބަބުން މިހާތަނަށް 600 މީހުން ވަނީ ޝަހީދުވެގެން ގޮސްފައެވެ.