ނިމިދިޔަ އަހަރު ސްޓެލްކޯއަށް 138 މިލިއަން ރުފިޔާގެ ފައިދާއެއް

ނިމިދިޔަ އަހަރު ސްޓޭޓް އިލެކްޓްރިކް ކޮމްޕެނީ، ސްޓެލްކޯއަށް 138 މިލިއަން ރުފިޔާގެ ފައިދާއެއް ލިބިފައިވާ ކަމަށް އެ ކުންފުނީގެ މެނޭޖިންގ ޑިރެކްޓަރު ހުސެއިން ފަހުމީ ވިދާޅުވެއްޖެއެވެ.

ހުސެއިން ފަހުމީ މިފަދައިން ވިދާޅުވީ، މިދިޔަ 7 އަހަރު އެ ކުންފުނީގެ މާލީ ހިސާބުތައް އާންމުކުރައްވާ، އެކްސްގައި ހިއްސާކުރެއްވި ޕޯސްޓެއްގައެވެ.

އެ ތަފާސް ހިސާބުތަކުން ދައްކާ ގޮތުގައި، 2023 ވަނަ އަހަރު އެ ކުންފުންޏަށް ވަނީ 172 މިލިއަން ރުފިޔާގެ ގެއްލުން ވެފައެވެ. ނަމަވެސް، މިދިޔަ އަހަރު އެ ގެއްލުމުން އަރައިގަނެ، 138 މިލިއަން ރުފިޔާގެ ފައިދާއެއް އެ ކުންފުންޏަށް ވެފައިވާކަމަށް ފަހުމީ ވަނީ ވިދާޅުވެފައެވެ. މީގެ އިތުރުން ފަހުމީ ވިދާޅުވީ، މިއީ މިދިޔަ 7 އަހަރުގެ ތެރޭގައި މި ކުންފުންޏަށް ލިބުނު އެންމެ ބޮޑު ފައިދާ ކަމަށެވެ.

ފަހުމީ ހާމަކުރެއްވި ތަފާސް ހިސާބުގައި ފައިދާ ލިބުނު އަހަރުތަކާއި، ލިބުނު މިންވަރު:

2018 ވަނަ އަހަރު: 105 މިލިއަން ރުފިޔާ
2019 ވަނަ އަހަރު: 109 މިލިއަން ރުފިޔާ
2020 ވަނަ އަހަރު: 130 މިލިއަން ރުފިޔާ
2021 ވަނަ އަހަރު: 105 މިލިއަން ރުފިޔާ
2022 ވަނަ އަހަރު: 107 މިލިއަން ރުފިޔާ

ސްޓެލްކޯގެ އެމްޑީ ފަހުމީ ވިދާޅުވީ، މި ގެއްލުމުން އަރައިގަނެ މިދިޔަ އަހަރު ކުންފުނިން ފައިދާ ހޯދީ ވަޞީލަތްތައް ހަރުދަނާގޮތުގައި ބޭނުންކުރުމާއި، އިސްރާފު ކުޑަކުރުން، އަދި ހިންގުމުގެ ނިޒާމު ހަރުދަނާކޮށްގެންކަމަށެވެ.