އިސްރާއިލުން ޣައްޒާއަށް ދެމުންދާ ޙަމަލާތައް ހުއްޓާލުމަށް ޔޫރަޕުގެ ބޮޑު ތިން ޤައުމުން ގޮވާލައިފި

ޔަހޫދީ އިސްރާއިލުން ފަލަސްޠީނުގެ ޣައްޒާއަށް ދެމުންދާ ޙަމަލާތައް ވަޤުތުން ހުއްޓާލުމަށް ޔޫރަޕުގެ ބޮޑު ތިން ޤައުމުން ގޮވާލައިފިއެވެ.

އިސްރާއިލުން ޣައްޒާގައި ހިންގަމުންދާ ޤަތުލު ޢާންމު ހުއްޓާލުމަށް ގޮވާލާފައިވަނީ، އިނގިރޭސިވިލާތް، ފްރާންސް، އަދި ޖަރުމަނުވިލާތުންނެވެ. މިކަމާއި ގުޅިގެން މި 3 ޤައުމުގެ ވެސް ޚާރިޖީ ވުޒާރާއިން ވަނީ ޖޮއިންޓު ބަޔާނެއް ނެރެފައެވެ. މި ބަޔާނުގައި، އިސްރާއިލުން އަލުން ހަމަލާތައް ފެށުމަކީ ނުރައްކާތެރި ކަމެއް ގޮތުގައި ފާހަގަކޮށްފައިވެއެވެ.

 މި ޖޮއިންޓު ބަޔާން ނެރުއްވުމަށް ސޮއިކުރައްވާފައި ވަނީ، އިނގިރޭސިވިލާތުގެ ޚާރިޖީ ވަޒީރު ޑޭވިޑް ލެމީ، ޖަރުމަނުވިލާތުގެ ޚާރިޖީ ވަޒީރު އަންނަލީނާ ބެއަރބޮކް، އަދި ފްރާންސްގެ ޚާރިޖީ ވަޒީރު ޖީން-ނޯއެލް ބެރޮޓްއެވެ. މި ބަޔާނުގައި 3 ޤައުމުގެ ޚާރިޖީ ވަޒީރުން ވެސް ވަނީ ޣައްޒާގައި ޢާންމު ރައްޔިތުންނަށް ލިބެމުންދާ ގެއްލުންތަކާއި މެދު ކަންބޮޑުވުން ފާޅުކުރައްވާފައެވެ.

މި ބަޔާނުގައި ތިން ޤައުމުގެ ޚާރިޖީ ވަޒީރުން ވިދާޅުވީ، ޣައްޒާގައި އިސްރާއީލުން އަލުން ހަމަލާތައް ފެށުމަކީ ޣައްޒާގެ ރައްޔިތުންނަށާއި، އަސީރުންނަށާއި، އެމީހުންގެ އާއިލާތަކަށާއި، މުޅި ސަރަޙައްދަށް ލިބޭ ބޮޑު ގެއްލުމެއް ކަމަށެވެ. އަދި މިކަމުގެ ސަބަބުން ކަންކަމުން އަރައިގަތުމަށް ކުރިއަށް ދިޔުމުގެ މަގު ބަންދުވެގެންދާކަން ވެސް ބަޔާނުގައި ވަނީ ފާހަގަކުރައްވާފައެވެ. މީގެ އިތުރުން، ޣައްޒާގެ ހަމާސް ޖަމާޢަތުން ހިފަހައްޓާފައިވާ އިސްރާއިލުގެ އަސީރުން ދޫކޮށްލުމަށްވެސް މި ބަޔާނުގައި ވަނީ ގޮވާލައިފައެވެ.

މި ބަޔާނުގައި ތިން ޤައުމުގެ ޚާރިޖީ ވަޒީރުން ވަނީ، ޣައްޒާއަށް އިންސާނީ އެހީ ފޯރުކޮށްދިނުމުގެ މަގު ތަނަވަސްކޮށްދިނުމަށް އިސްރާއިލަށް ގޮވާލައިފައެވެ. ހަމަ އެހެންމެ، ޣައްޒާއަށް ފެނާއި ކަރަންޓު ބިލު ލިބޭނެ ގޮތް ތަނަވަސްކޮށްދީ، ބައިނަލްއަޤްވާމީ އިންސާނީ ޤާނޫނާ އެއްގޮތްވާ ގޮތުގެ މަތިން ޞިއްހީ ފަރުވާ ލިބޭނެ ގޮތް ހަދައިދިނުމަށް ވެސް މި ބަޔާނުގައި ވަނީ ގޮވައިލާފައެވެ. މީގެ އިތުރުން، އިސްރާއިލުން ބައިނަލްއަޤްވާމީ ޤާނޫނުތަކަށް ފުރިހަމައަށް ޙުރުމަތްތެރިކޮށް ހިތުމަށް މި ތިން ޤައުމުގެ ޚާރިޖީ ވަޒީރުން ވެސް ވަނީ ނަޞޭޙަތްތެރިވެފައެވެ.

ފަލަސްޠީނުގެ ޣައްޒާގައި އިތުރު ލޭއޮހޮރުވުމެއް ހިންގައި، ޤަތުލު ޢާންމު ކުރިއަށް ގެންދިޔުމަކީ އެއްވެސް ބަޔަކަށް ފައިދާހުރި ކަމެއް ނޫންކަމަށް ވެސް މި ބަޔާނުގައި ބުނެފައިވެއެވެ.