ކުރީގެ ކުޅުންތެރިޔަކު މަރުވި ކަމަށްބުނެ ގެނައި ސުކޫތަށްފަހު އޭނާ ދިރިހުރިކަން އެނގުމުން މަޢާފަށް އެދިއްޖެ

ކުރީގެ ފުޓުބޯޅަ ކުޅުންތެރިޔަކު މަރުވިކަމަށްބުނެ ގެނައި ސުކޫތަށްފަހު އޭނާ ދިރިހުރިކަން އެނގުމުން މަޢާފަށް އެދިއްޖެއެވެ. މިކަމަކީ ބަލްގޭރިއާގައި މި ފާއިތުވި ހަފްތާގައި ހިނގައިފައިވާ ކަމެކެވެ. 

ބަލްގޭރިއާގެ ދެކުނުގެ ޓައުން ކާޑްޒާލީއަށް ނިސްބަތްވާ އަދި އެޤައުމުގެ އެއްވަނަ ޑިވިޝަންގައި ކުޅޭ އާޑާ ކާޑްޒާލީ އިން ވަނީ ހުކުރު ދުވަހު ލެވްސްކީ ސޯފިއާއާ ދެކޮޅަށް ކުޅުނު މެޗުގެ ކުރިން ޕެޓްކޯ ގަންޗޭވްގެ ޝަރަފުގައި މިނިޓެއްގެ ސުކޫތެެއް ގެނަސްފައެވެ.

1-1 އިން އެއްވަރުވި މެޗު ފެށުމުގެ ކުރިން ދެ ޓީމު ވެސް ސެންޓަރ ސާކަލް ކައިރީގައި ލައިންގައި ތިބެ، ގަންޗޭވް ވަކިވެ ދިއުމާ ގުޅިގެން ހަމަހިމޭންކަމުގެ ސުކޫތެއް ގެނައެވެ.

އެކަމަކު މެޗު ނިމުމުގެ ކުރިން އާޑާ ވަނީ ގަންޗޭވްގެ މަރާއި ގުޅޭ ގޮތުން ގޯސް މައުލޫމާތެއް ލިބިފައިވާ ކަމަށް ބުނެ އެމީހުންގެ ފޭސްބުކް ޕޭޖުގައި ޕޯސްޓެއް ކޮށްފައެވެ.

އެ ކްލަބުން ބުނީ، އާޑާގެ ކުރީގެ ކުޅުންތެރިޔާ ޕެޓްކޯ ގަންޗޭވް އާއި އޭނާގެ ގާތްތިމާގެ މީހުންގެ ކިބައިން ޕީއެފްސީ އާޑާގެ މެނޭޖުމަންޓުން ވަރަށް ބޮޑަށް މަޢާފަށް އެދެން ބޭނުންވާކަމަށެެވެ. އަދި އޭނާގެ މަރާއި ގުޅޭ ގޮތުން ކްލަބަށް ލިބުނީ ގޯސް މަޢުލޫމާތެއް ކަމަށެވެ.

އަހަރެމެން އެދެނީ ޕެޓްކޯ ގަންޗޭވް އަށް ދިގު އުމުރެއް އަދި ރަނގަޅު ސިއްޙަތެއް އަދި އާޑާއަށް ކާމިޔާބު.

ކްލަބުން ބުނެފައިވެއެވެ.