ރޭންސުރެ އުތުރު ޣައްޒާއިން ގޮވުންތަކުގެ އަޑު ނުކެނޑޭ

ރޭންސުރެ އުތުުރު ޣައްޒާއިން ގޮވުންތަކުގެ އަޑު ނުކެނޑޭ ކަމަށް އަލްޖަޒީރާގައި ބުނެފިއެވެ. 

ހުއްޓާނުލާ ދެމުންދާ ހަމަލާތަކުގެ ތެރެއިން އެންމެ ފަހުން އިޒްރާއީލުން ވައިގެ މަގުން ހަމަލާދީފައިވަނީ ޣައްޒާގެ މެދުތެރޭގައި އޮންނަ އަލްމުޣްރާގާ ސަރަހައްދަށެވެ. އެހަމަލާގެ ސަބަބުން ފަލަސްތީނުގެ ދެ މީހަކު ޝަހީދުވެފައިވެއެވެ.

އާޓިލަރީ ބޮމުގެ ހަމަލާތައް ޣައްޒާގެ އުތުރުގެ ގެތަކަށް އަމާޒުކޮށްފައި ވާއިރު، އޭގެ ތެރޭގައި ބައިތު ލާހިޔާ އާއި ބައިތު ހަނޫން ހިމެނެއެވެ. މަންޒަރު ދުށް މީހުންނާއި ހަވާލާދީ އަލްޖަޒީރާގައި ބުނެފައިވަނީ ރޭ ހަމަލާތައް ދޭން ފެށިފަހުން އެތަނުން ގޮވުންތައް ހުއްޓިފައެއް ނުވެއެވެ.

އިޒްރާއީލުގެ ހަމަލާތައް ދެމުންދަނީ ހަމައެކަނި ޣައްޒާގެ އުތުރުގައެއް ނޫނެވެ. ނެޓްޒާރިމް ކޯރިޑޯގައި ވެސް އިޒްރާއީލުގެ ސިފައިން ދަނީ މީހުން ދިރިއުޅޭ އިމާރާތްތަކާއި އާންމު ވަސީލަތްތައް ހަލާކު ކުރަމުންނެވެ. 

ހަމަލާތައް ހުއްޓާލުމުގެ އެއްބަސްވުމާ ޚިލާފުވެ އަންގާރަ ދުވަހު އިޒްރާއިލުން ފެށި ހަމަލާތަކުގައި ޖުމްލަ 634 މީހުން މަރުވެ 1،172 މީހުން ޒަޚަމްވެފައިވާ ކަމަށް ޣައްޒާގެ ޞިއްޙީ ވުޒާރާއިން ވަނީ ބުނެފައެވެ.