ރަމަޟާންމަހުގެ ފަހު 10: މިއީ ހިތްވަރާއިއެކު އަޅުކަމުގައި އިތުރަށް ހީވަގިވާންވީ ވަގުތު

ބަރަކާތްތެރި ރަމަޟާން މަހުގެ ދުވަސްތައް ފާއިތުވަމުން، މިހާރު މި ގުނަމުންދަނީ ފަހު ދިހައިގެ ރޭތަކާއި ދުވަސްތަކެވެ. މި ދުވަސްކޮޅަކީ ރަމަޟާން މަސް ނިމެނީއޭ ހިތާ ފަރުވާކުޑަކޮށްލަންވީ ދުވަސްކޮޅެއް ނޫނެވެ.މިއީ ހިތްވަރު ގަދަކޮށް އަޅުކަމުގައި އިތުރަށް ހީވާގިވާންވީ ދުވަސްކޮޅެކެވެ. އެހެނީ މި ދުވަސްތަކުގެ މަތިވެރިކަން ދަލީލުކޮށްދޭ ގިނަގުނަ ސަބަބުތައް ވެއެވެ. އޭގެ ތެރެއިން އެންމެ މުހިންމު އެއް ސަބަބަކީ އެއްހާސް މަހަށްވުރެ ހެޔޮކަން ބޮޑު ލައިލަތުލް ޤަދުރު ވިލޭރޭ މި ދުވަސްތަކުގެ ތެރޭގައި ހިމެނިގެންވުމެވެ.

ރަސޫލުﷲ ޞައްލަﷲ ޢަލައިހި ވަސައްލަމަގެ ސުންނަތުން އަޅުގަނޑުމެންނަށް އެނގެނީ، އެކަލޭގެފާނު ފަހު ދިހައެއް އައުމުން އަޅުކަމުގައި އިތުރަށް ހީވާގިވެވަޑައިގަންނަވާކަމެވެ. ޢާއިޝާ ރަޟިޔަﷲ ޢަންހާ ރިވާކުރައްވާފައިވާ ޙަދީޘެއްގައި ވެއެވެ: "ރަމަޟާން މަހުގެ ފަހު ދިހައެއް އަންނަ ހިނދު، ނަބިއްޔާ ޞައްލަﷲ ޢަލައިހި ވަސައްލަމަ، އެކަލޭގެފާނުގެ އިޒާރުކޮޅު ބަނދެލައްވައެވެ. އަދި ރޭގަނޑު އިޙްޔާކުރައްވައެވެ. އަދި އެކަލޭގެފާނުގެ އަހުލުވެރިން ރޭ އަޅުކަން ކުރެއްވުމަށް އަވަހާރަފުޅުން ނަންގަވައެވެ." މި ޙަދީޘުން އަޅުގަނޑުމެންނަށް އެނގެނީ، މި ދުވަސްތަކުގައި އަނބިއަނބިކަނބަލުންނާ ދުރުހެލިވެވަޑައިގެން އަޅުކަމުގައި އިތުރަށް ހީވާގިވެވަޑައިގަތްކަމެވެ.

ފަހު ދިހައިގެ މުހިންމުކަން އިތުރަށް ފާހަގަކޮށްލެވެނީ، މި ދުވަސްތަކުގައި ލައިލަތުލް ޤަދުރު ވިލޭރޭ ހޯދުމަށް މަސައްކަތްކުރުމުގެ މުހިންމުކަމެވެ. މި ރެއަކީ އެއްހާސް މަހަށްވުރެ ހެޔޮކަން ބޮޑު ރެއެކެވެ. އެބަހީ، މި ރޭ ކުރާ އަޅުކަމަކާއި އެނޫން އެހެން ރެއެއްގައި ނުވަތަ އެނޫން އެހެން ދުވަހެއްގައި ހަމަ އެ ޢަމަލު އެއްހާސް ފަހަރު ކުރުމާ އެއްފަދައެވެ. މި މަތިވެރި ފުރުޞަތުގެ ބޭނުން ހެޔޮގޮތުގައި ހިފުމަށް ގަދައަަދައަޅައި މަސައްކަތްކުރަންޖެހެއެވެ.

މީގެ އިތުރުން، ރޭގަނޑުގެ ތިންބައިކުޅަ އެއްބައިގައި ﷲ ސުބުޙާނަހޫ ވަތަޢާލާ ދުނިޔޭގެ އުޑަށް ވަޑައިގަންނަވާކަމަށް ޙަދީޘްގައި ވާރިދުވެފައިވެއެވެ. މިއީ ދުޢާ އިޖާބަވާ ވަގުތެކެވެ. އެހެންކަމުން، މި ދުވަސްތަކުގައި ރޭއަޅުކަން ކުރުމާއި، ކީރިތި ޤުރުއާން ކިޔެވުމާއި، ޛިކުރު ކުރުމާއި، ތިމާއަށް ކުރެވިފައިވާ ފާފަތަކުން ތައުބާވެ، އިސްތިޣްފާރުކޮށް، ﷲގެ ޙަޟްރަތަށް ދުޢާކޮށް ދެންނެވުމުގައި މި ދުވަސްކޮޅު ހޭދަކުރުމަކީ ވަރަށް މުހިންމު ކަމެކެވެ.

ލައިލަތުލް ޤަދުރު ވިލޭރޭ ދިމާވެއްޖެނަމަ ކިޔަން ރަނގަޅު ދުޢާއެއް އުންމުލް މުއުމިނީން ޢާއިޝާ ރަޟިޔަﷲ ޢަންހާ އަށް ރަސޫލުﷲ ޞައްލަﷲ ޢަލައިހި ވަސައްލަމަ ދަސްކޮށްދެއްވިއެވެ. 

اللَّهُمَّ إِنَّكَ عَفُوٌّ تُحِبُّ الْعَفْوَ فَاعْفُ عَنِّي

މާނައީ:

 "އޭ ﷲ! އިބަރަސްކަލާނގެއީ ޢަފޫކުރައްވާ، ޢަފޫކުރެއްވުމަށް ލޯބިވެވޮޑިގަންނަވާ ރަސްކަލާނގެއެވެ. އަޅުގެ ފާފަ ފުއްސަވާންދޭވެ!"

ރަމަޟާން މަހުގެ ފަހު ދިހައިގެ ދުވަސްތަކަކީ އަހަރުގެ އެންމެ މާތް ދުވަސްތަކުގެ ތެރެއިން ހިމެނޭ ދުވަސްތަކެކެވެ. މި ދުވަސްތަކުގައި މާތްﷲ ލައްވާފައިވަނީ ހެޔޮކަމާއި، އަމާންކަމާއި، އީމާންކަމާއި، ސަލާމަތްތެރިކަމާއި، އިސްލާމްކަމާއި، އޯގާތެރިކަމާއި، ހަމްދަރުދީއާއި، އެހީތެރިކަމާއި، ފުއްސެވުމާއި ރުއްސެވުމެވެ. މި ދުވަސްތަކުގެ ބޭނުން އެންމެ ފުރިހަމަ ގޮތުގައި ހިފުމަށް މަސައްކަތްކުރުމަކީ ކޮންމެ މުސްލިމެއްގެ ވާޖިބެކެވެ.

 މި މަތިވެރި ދުވަސްތަކުގައި އަޅުގަނޑުމެން ކުރަމުން އައި ހުރިހާ ހެޔޮ ޢަމަލުތަކެއް ދެގުނައަށް އިތުރުކޮށް، ހެޔޮ ޢަމަލުތަކުގައި ފަރުވާކުޑަވެފައިވާނަމަ މި ވަގުތުކޮޅު ޣަނީމާކޮށް، ﷲ ސުބުޙާނަހޫ ވަތަޢާލާގެ ރުއްސެވުން ހޯދުމަށް މަސައްކަތްކުރަމާ ހިނގާށެވެ. އަޅަމެންނަށް ލައިލަތުލް ޤަދުރު ލިބުމުގެ ހެޔޮ ތައުފީޤު ދެއްވައި، ފަހު ދިހައިގެ ރޭތަކުގެ ބޭނުން އެންމެ ފުރިހަމަ ގޮތުގައި ހިފާ ބައެއްގެ ގޮތުގައި ލައްވާށިއެވެ! އާމީން!