ދުނިޔެ
އިސްރާއީލްގެ ހަމަލާތަކުން ލުބުނާން ހަނގުރާމައިގެ ތެރެއަށް ވެއްޓިދާނެކަމުގެ އިންޒާރު

އިސްރާއީލުން ލުބުނާނަށް ދީފައިވާ ހަމަލާއެއް ފޮޓޯ:އިންޓަނެޓް
ލުބުނާންގެ ބޮޑުވަޒީރު ނަވާފް ސަލާމް ވަނީ އެ ޤައުމު އާ ހަނގުރާމައަކަށް ވެއްޓިދާނެކަމުގެ ނުރައްކާ އޮތް ކަމަށް އިންޒާރުދެއްވާފައެވެ. މިފަދައިން ވިދާޅުވެފައިވަނީ އިސްރާއީލުން ލުބުނާންގެ ދެކުނު ސަރަޙައްދަށް ދެމުންދާ ވައިގެ ހަމަލާތަކާ ގުޅިގެންނެވެ. މި ހަމަލާތަކުގައި މިހާތަނަށް މަދުވެގެން ދެ މީހަކު ވަނީ މަރުވެފައެވެ.
ލުބްނާންގެ ބޮޑުވަޒީރު ސަލާމް ވިދާޅުވެފައިވަނީ "ދެކުނު ސަރަޙައްދުގެ ބޯޑަރުގައި އިސްރާއީލުން އަލުން ފަށާފައިވާ ހަނގުރާމަވެރި ޢަމަލުތަކުން ލުބުނާނަށާއި ލުބުނާނުގެ ރައްޔިތުންނަށް ގެއްލުން ލިބޭ" ކަމަށެވެ.
އިސްރާއީލުގެ އާޓިލަރީ އާއި އެއަރ ފޯސްއިން ލުބުނާންގެ ދެކުނު ސަރަޙައްދަށް ހަމަލާދީފައިވަނީ ލުބުނާންގެ ފަރާތުން އިސްރާއީލަށް އަމާޒުކޮށް ތިން ރޮކެޓް ދޫކޮށްލި ކަމަށް ބުނެއެވެ. އިސްރާއީލުގެ މިލިޓަރީން ބުނާ ގޮތުގައި މި ރޮކެޓްތައް ވަނީ އިންޓަރސެޕްޓް ކުރެވިފައެވެ.
އިސްރާއީލުން ބުނާ ގޮތުގައި މި ހަމަލާތަކަކީ ހިޒްބުއްލާއަށް އަމާޒުކޮށް ދެވުނު ހަމަލާތަކެކެވެ. ނަމަވެސް މި ހަމަލާތަކުން ލުބުނާންގެ އާންމު ރައްޔިތުންނަށް ވެސް ބޮޑެތި ގެއްލުންތައް ވަމުންދާ ކަމަށް ޚަބަރުލިބެއެވެ.މި ހާދިސާއާ ގުޅިގެން ބައިނަލްއަޤްވާމީ މުޖުތަމަޢުގެ ކަންބޮޑުވުން ވަނީ ފާޅުކޮށްފައެވެ. އަދި ދެ ޤައުމުގެ ދެމެދުގައި އޮތް ހަނގުރާމަ އިތުރަށް ގޯސްވެ، ސަރަޙައްދީ ހަމަނުޖެހުމަކަށް ވެގެން ހިނގައިދާނެކަމުގެ ބިރު ފާޅުކުރަމުންދެއެވެ.