ފުރަތަމަ ސާފް ޗެމްޕިއަންޝިޕް ކާމިޔާބުކުރި ޓީމުގެ އެސިސްޓެންޓު ކޯޗު ސާންތީ ނިޔާވެއްޖެ

ދިވެހިރާއްޖެއިން ފުރަތަމަ ފަހަރަށް ސާފް ޗެމްޕިއަންޝިޕް ކާމިޔާބުކުރިއިރު، ޓީމުގެ އެސިސްޓެންޓު ކޯޗެއްގެ ގޮތުގައި މަސައްކަތްކުރެއްވި އިޙްސާން އަބްދުލް ޣަނީ (ސާންތީ) ނިޔާވެއްޖެއެވެ.

ސާންތީ ނިޔާވީ ކެންސަރު ބައްޔަށް ފަރުވާ ހޯއްދަވަމުން ދަނިކޮށް، ރޭގެ ވަގުތެއްގައި ޓްރީ ޓޮޕް ހޮސްޕިޓަލްގައެވެ. މަޢުލޫމާތު ލިބިފައިވާ ގޮތުގައި އޭނާ ކެންސަރު ބައްޔަށް ފަރުވާ ހޯދާތާ މިހާރު އަހަރަކަށް ވުރެ ގިނަދުވަސް ވެއްޖެއެވެ.

ސާންތީ ފުރަތަމަ ފެނުނީ ފުޓުބޯޅަ ކުޅުންތެރިއެއްގެ ގޮތުގައެވެ. އަދި އޭގެ ފަހުން ކޯޗިން ދާއިރާގައި އޭނާ ވަނީ ދިވެހި ފުޓްބޯޅައަށް ގިނަ ޚިދުމަތްތަކެއް ކުރައްވާފައެވެ. ހާއްސަކޮށް އެފްއޭއެމުގެ ޔޫތު ޑިވެލޮޕްމަންޓް ޕްރޮގްރާމް ފައްޓައި އެ ޕްރޮގްރާމް ކުރިއަށް ގެންދިއުމުގައި އޭނާގެ މަސައްކަތް ފާހަގަކުރެވެއެވެ.

ޤައުމީ ޓީމުގެ އެސިސްޓެންޓު ކޯޗެއްގެ ގޮތުގައި ސާންތީ ވަނީ 2001 އިން ފެށިގެން 2008 ވަނަ އަހަރާ ހަމައަށް މަސައްކަތްކުރައްވާފައެވެ. އެގޮތުން 2008ގައި ދިވެހި ޓީމުން ސާފް ޗެމްޕިއަންޝިޕް ކާމިޔާބުކުރިއިރު، އޭނާއަކީ ޓީމަށް މުހިންމު މަސައްކަތްކޮށްދެއްވި ބޭފުޅެކެވެ.

ކްލަބް ލެވެލްގައި ސާންތީ ވަނީ ކްލަބް އީގަލްސް އާއި ޔުނައިޓެޑް ވިކްޓަރީގައި މަސައްކަތް ކުރައްވާފައެވެ. އެގޮތުން ކްލަބް އީގަލްސްއާ އެކު އޭނާ ޤައުމީ ފުޓުބޯޅަ މުބާރާތް ވެސް ކާމިޔާބުކުރިއެވެ.

ފުޓްބޯޅަ އެސޯސިއޭޝަން އޮފް މޯލްޑިވްސްގެ ޓެކްނިކަލް ޑައިރެކްޓަރުކަންވެސް އަދާކުރި ސާންތީ ވަނީ ކުޅިވަރަށް ޚިދުމަތް ކުރުމުގެ ދާއިރާއިން ޒުވާނުންގެ ޤައުމީ އިނާމް ހާޞިލުކުރައްވާފައެވެ.