އެސްޓީއޯއިން ޕެޓްރޯލްގެ އަގު ހެޔޮކޮށްފި

ސްޓޭޓް ޓްރޭޑިން އޯގަނައިޒޭޝަން، އެސްޓީއޯއިން ވިއްކާ ޕެޓްރޯލްގެ އަގު ހެޔޮކޮށްފިއެވެ.

އެ ކުންފުނިން ހާމަކޮށްފައިވާ ގޮތުގައި، ފެޓްރޯލް ލީޓަރަކުން ވަނީ 48 ލާރި ހެޔޮކޮށްފައެވެ. އެގޮތުން ކުރިން 13.98ރ. އަށް ޕެޓްރޯލް ލީޓަރެއް ވިއްކި ނަމަވެސް، މިހާރު ފެޓްރޯލް ލީޓަރެއްގެ އަގަކީ 13.50 ކަމަށް އެސްޓީއޯއިން ވަނީ ހާމަކޮށްފައެވެ.

އެސްޓީއޯއިން ޕެޓްރޯލްގެ އަގު ހެޔޮކޮށްފައި މިވަނީ، ދުނިޔޭގެ ބާޒާރުގައި ވެސް ފެޓްރޯލްގެ އަގު ދަށަށް ދިއުމާ ގުޅިގެން، އެ ކުންފުންޏަށް ޕެޓްރޯލް ގަންނަން ލިބޭ އަގު މިހާރު ހެޔޮވެފައިވުމާ ގުޅިގެންކަމަށް، އެ ކުންފުނިން ހާމަކޮށްފައިވެއެވެ. 

އެހެންކަމުން، ޕެޓްރޯލްގެ އަގަށް މި އައި ހެޔޮ ބަދަލާއެކު، ފިއުލް ސަޕްލައި މޯލްޑިވްސް، އެފްއެސްއެމްގެ ހުރިހާ ޕެޓްރޯލް ޝެޑަކުން މި އަގުގައި ފެޓްރޯލް ލިބެން ހުންނާނެއެވެ. 

އެސްޓީއޯއިން ފެޓްރޯލްގެ އަގު އެންމެ ފަހުން ހެޔޮކޮށްފައި ވަނީ މިދިޔަ އަހަރުގެ މެއި މަހުގެ ތެރޭގައެވެ. އެ ފަހަރު ޕެޓްރޯލް ލީޓަރަކުން 35 ލާރި ހެޔޮކުރުމަށްފަހު ޕެޓްރޯލް ލީޓަރެއް ވިއްކަން ފެށި 13.98ރ. އަށެވެ. 

އަދި އޭގެ ކުރިން، 2023 ޑިސެންބަރު މަހާ ހިސާބަށް ޕެޓްރޯލް ލީޓަރެއް ވިއްކަމުން އައީ 14.33ރ. އަށެވެ.