މާލޭ ސަރަޙައްދުން ދުވާލަކަށް އުފައްދާ ކުނި 3000 ޓަނުން މައްޗަށް އަރާ

މާލޭ ސަރަޙައްދުން ދުވާލަކަށް އުފައްދާ ކުނި 3000 ޓަނަށް ވުރެ ގިނަކަމަށް ވޭސްޓް މެނޭޖްމަންޓް ކޯޕަރޭޝަން، ވެމްކޯއިން ހާމަކޮށްފިއެވެ.

ވެމްކޯއިން ހާމަކޮށްފައިވާ ތަފާސްހިސާބުތަކަށް ބަލާއިރު، ރޯދަ މަހު މާލެ ސަރަޙައްދުން އެންމެ ގިނަ އަދަދަކަށް ކުނި އުފައްދަނީ މާލެއިންނެވެ. އެގޮތުން މާލެއިން ދުވާލެއްގެ މައްޗަށް 1،980 ޓަނުގެ ކުނި އުފައްދާކަމަށް ވެމްކޯއިން ހާމަކުރެއެވެ. ދެން އެންމެ ގިނައިން ކުނި އުފައްދަނީ ހުޅުމާލެއިންނެވެ. އެ އަވަށުން ދުވާލަކަށް 1،280 ޓަނުގެ ކުނި އުފައްދައެވެ. އަދި އެންމެ އާބާދީ ކުޑަ އަވަށް ކަމުގައިވާ ވިލިމާލެއިން އުފައްދަނީ ދުވާލަކަށް 354 ޓަނުގެ ކުންޏެވެ.

އެހެންކަމުން ދުވާލެއްގެ މައްޗަށް ޖުމްލަ 3،614 ޓަނުގެ ކުނި މާލޭ ސަރަޙައްދުން ނަގާކަމަށް ވެމްކޯއިން ވަނީ ހާމަކޮށްފައެވެ. 

މިހާ ގިނަ އަދަދަކަށް ކުނި އުފެއްދި ކަމުގައިވީ ނަމަވެސް، އެހެން އަހަރުތަކަށް ވުރެ މަގު މައްޗަށް އެއްކޮށްފައި ހުންނަ ކުނި މަދުވުންކަމަށް ވެމްކޯއިން ވަނީ ހާމަކޮށްފައެވެ.

ރަމަޟާންމަހު މާލޭގެ ގޭބިސީތަކުން ކުނި ނެގުމުގެ ޚިދުމަތް ވެމްކޯއިން ފޯރުކޮށްދެނީ ރޭގަނޑުގެ ވަގުތަކުގައެވެ. އެގޮތުން މާލެއިން ރޭގަނޑު 08:30އިން ދަންވަރު 02:30އަށް ކުނި ނެގުމުގެ ޚިދުމަތް ފޯރުކޮށްދެއެވެ. އަދި ހުޅުމާލޭގައި ރަމަޟާން މަހު ކުނި ނެގުމުގެ ޚިދުމަތް ދެނީ ރޭގަނޑު 09:00އިން ދަންވަރު 01:00އާ ހަމައަށެވެ. އަދި ވިލިމާލޭގައި ޚިދުމަތް ދޭނީ ރޭގަނޑު 09:30އިން ދަންވަރު 01:30 އަށެވެ.

ވެމްކޯއިން ވަނީ ކުނި ނެރުމުގައިވެސް، ބިއްލޫރި ނުވަތަ ތޫނު އެއްޗެއް އުކާލާނާމަ، އެއިން ވެށިފާރަވެރިންނަށް ގެއްލުން ނުވާނެހެން ރަނގަޅަށް ބަންދު ކޮށްފައި ވަކިން ބެހެއްޓުމަށް އިލްތިމާސްކުރައްވާފައެވެ.