އެޕްރީލް މަހުން ފެށިގެން ފިޔާއިން ނަގާ އެކްސްޕޯޓް ޑިއުޓީ ކަނޑާލުމަށް އިންޑިއާއިން ނިންމައިފި

އެޕްރީލް މަހުގެ 1 ވަނަ ދުވަހުން ފެށިގެން ފިޔާއިން ނަގާ އެކްސްޕޯޓް ޑިއުޓީގެ %20 ކަނޑާލުމަށް އިންޑިއާއިން ނިންމައިފިއެވެ. 

އިންޑިއާގެ ސަރުކާރުން މިކަން އިޢުލާންކޮށްފައި ވަނީ އިއްޔެއެވެ. މިކަން އެންގުމުގެ ގޮތުން އިންޑިއާއިން ނެރުނު ބަޔާނެއްގައި ބުނީ، ދަނޑުވެރިންގެ އެދުމުގެ މަތީން، އިންޑިއާގެ ކޮންޒިއުމާ އެފެއާޒްއިން، ޑިޕާޓްމެންޓް އޮފް ރެވެނިއުއަށް ދީފައިވާ ލަފާގެ މަތިން، އެ ޤައުމުން ބޭރުކުރާ ފިޔާއިން އެކްސްޕޯޓު ޑިއުޓީ ކަނޑާލަން ނިންމާފައިވާކަމަށެވެ.

މިދިޔަ އަހަރުގެ ސެޕްޓެންބަރު މަހުން ފެށިގެން އިންޑިއާއިން ބޭރުކުރާ ފިޔާއަށް އެކްސްޕޯޓް ޑިއުޓީ ނަގަން ފެށީ، އެ ޤައުމުގައި ބޭނުންކުރުމަށް އެކަށޭނަ މިންވަރަށް ފިޔައި ލިބޭނެ އިންތިޒާމު ހަމަޖެއްސުމުގެ ގޮތުންނެވެ. ނަމަވެސް އިންޑިއާއިން އެކްސްޕޯޓުކުރާ ފިޔާގެ އަދަދު ދިޔައީ ދުވަހެއް ދުވަހަކަށް އިތުރުވަމުންނެވެ.

ފިޔާ އެކްސްޕޯޓް ކުރުމަށް ޑިއުޓީ ނަގަން ނިންމި ނަމަވެސް، 2023/24 މާލީ އަހަރު 17.17 ލައްކަ މެޓްރިކް ޓަނުގެ ފިޔާ، އަދި 2024/25 މާލީ އަހަރުގެ މިހާތަނަށް 11.65 ލައްކަ މެޓްރިކް ޓަނުގެ ފިޔާ އެ ޤައުމުން އެކްސްޕޯޓުކޮށްފައި ވެއެވެ. 

އަދި މަހެއްގެ މައްޗަށް ފިޔާ ބޭރުކުރާ މިންވަރު، އެކްސްޕޯޓު ޑިއުޓީ ނެގުމަށް ކަނޑައެޅި ސެޕްޓެންބަރު މަހު 0.72 ލައްކަ މެޓްރިކް ޓަނުގައި ހުރިއިރު، މި އަދަދު މި އަހަރުގެ ޖެނުއަރީގައި ހުރީ 1.85 ލައްކަ މެޓްރިކް ޓަނުގައެވެ.