ފުރަތަމަ ހިފުން އެންމެ ރަގަޅީ ޤަޟާ ރޯދަތަ ނޫނީ ޝައްވާލު މަހުގެ ރޯދަތަ؟

ފުރަތަމަ ހިފުން އެންމެ ރަގަޅީ ރަމަޟާން މަހުގެ ޤަޟާ ރޯދަތޯ ނޫނީ ޝައްވާލު މަހުގެ ރޯދަތޯ އެއީ އަޅުގަނޑުމެންގެ ތެރެއިން ގިނަ އަންހެން ބޭކަނބަލުންގެ ހިތުގައި އުފެދޭ ވަރަށް ބޮޑު ސުވާލެކެވެ. 

މި މައްސަލަކީ ޢިލްމުވެރިންގެ މެދުގައި ޚިޔާލުތަފާތުވުން ވެސް އޮތް މައްސަލައެކެވެ. ބައެއް ޢިލްމުވެރިން ވިދާޅުވަނީ ޝައްވާލް މަހުގެ 6 ރޯދަ ހިފޭނީ ރަމަޟާން މަހުގެ ރޯދަތައް ޤަޟާ ކުރުމަށްފަހުގައި ކަމަށެވެ. މި ބޭފުޅުން ދަލީލު ދައްކަވަނީ ރަސޫލާ صـلّى الله علـيـه وسـلّم ގެ ހަދީޘްފުޅަކުންނެވެ. މި ހަދީޘް ބަސްފުޅުގައި ވަނީ ރަމަޟާން މަހުގެ ރޯދަ ހިފާފަ އަދި އެއަށްފަހު ވިދިގެން ޝައްވާލު މަހުގެ 6 ރޯދަ ހިފާ މީހަކަށް މުޅި އަހަރު ދުވަހުގެ ދަރުމަ އާއި ޘަވާބު ލިބޭނެކަމަށެވެ.

ނަމަވެސް މިއާ ޚިލާފަށް ބައެއް ޢިލްމުވެރިން ވިދާޅުވަނީ، ޝައްވާލު މަހުގެ 6 ރޯދަ ކުރިން ހިފިޔަސް ވެސް އެ ދަރުމަ އާއި ޘަވާބު ލިބޭނެ ކަމަށެވެ. އެ ބޭކަލުން ދަލީލު ދައްކަވަނީ ކީރިތި ޤުރުއާނުންނެވެ. އެގޮތުން ޤަޟާ ރޯދައާ ގުޅިގެން މާތްﷲގެ ވަޙީ ބަސްފުޅުގައި ވަނީ، ރަމަޟާން މަހު ގެއްލުނު ރޯދަތައް އެހެން ދުވަސްތަކުގައި ހިފުމަށެވެ. މި ވަޙީ ބަސްފުޅަށް އިޝާރާތްކުރައްވައި ޢިލްމުވެރިން ވިދާޅުވަނީ، ރަމަޟާން މަސް ނިމުމަށްފަހު ޖެހިގެން އަންނަ ރޯދަ މަހާ ހިސާބަށް ޤަޟާ ރޯދަތައް ހިފުމުގެ ފުރުސަތު އޮތް ކަމަށެވެ. އެހެންކަމުން އެމީހަކު ބޭނުން ދުވަހެއްގައި ޤަޟާ ރޯދަ ހިފޭނެ ކަމަށެވެ. 

މި ބޭކަލުން ދައްކަވާ ދެވަނަ ދަލީލަކީ، އާއިޝާ ރަޟިޔަﷲ އަންޙާ ޢަމަލުކުރެއްވި ގޮތެވެ. އެގޮތުން އާއިޝާ ރަޟިޔަﷲ އަންޙާ ރަމަޟާން މަހުގެ ރޯދަ ޤަޟާ ކުރައްވަނީ ޝައުބާން މަހުގައި ކަމަށް ވެފައި، އެ ކަމަނާ ސުންނަތް ރޯދަތައް ދޫކޮށްނުލައްވާނެކަމަށް ޤަބޫލު ކުރެވޭތީ، އެ ކަމަނާ ވެސް ފުރަތަމަ ހިއްޕަވަނީ ޝައްވާލް މަހުގެ ރޯދަތައްކަމަށް ސާބިތުވާ ކަމަށެވެ. އެހެންކަމުން މިކަމުން، ސުންނަތް ރޯދަ ޤަޟާ ރޯދައިގެ ކުރިން ހިފޭނެކަމަށް ދަލީލުކޮށްދޭކަމަށް އެ ބޭކަލުން ވިދާޅުވެއެވެ.

މި ދަލީލުތަކަށް ބުރަވެ ޢިލްމުވެރިން ވިދާޅުވަނީ، ޤަޟާ ރޯދައިގެ ކުރިން ޝައްވާލު މަހުގެ ރޯދަ ހިފުމަކީ ޙުއްދަ ކަމެއް ކަމަށެވެ. ނަމަވެސް މިކަމުގައި އެންމެ ރަގަޅު ގޮތަކީ، އެއްވެސް ދަތިކަމެއް ނެތް މީހުން، ފުރަތަމަ ޤަޟާ ރޯދަ ހިފުމަށްފަހު ދެން ޝައްވާލު މަހުގެ 6 ރޯދަ ހިފުން ކަމަށެވެ.

އެހެންނަމަވެސް، 15 ރޯދަ ނުވަތަ އެއަށްވުރެ ގިނައިން ރަމަޟާން މަހުގެ ރޯދަ ގެއްލޭ މީހުންނަށް، އެ ރޯދަތައް ޤަޟާކުރުމަށްފަހު ޝައްވާލު މަހުގެ ރޯދަތައް ހިފުމަކީ އުނދަގޫ ކަމަކަށް ވާނެތީ، އެމީހުން ފުރަތަމަ އިޚްތިޔާރު ކުރުން ރަގަޅީ ޝައްވާލު މަހުގެ 6 ރޯދަކަމަށް ޢިލްވެރީން ވިދާޅުވެއެވެ.

މަސްދަރު:

1446 ވަނަ އަހަރުގެ ރަމަޟާން މަހަށް ޙާއްސަކޮށް ފަރުދުން މީޑިއާއިން ގެނަސްދިން "ބަރަކާތް" ޕްރޮގްރާމް.

އެޕިސޯޑުގެ ޕްރެޒެންޓަރ: އައްޝައިޙާ މަރްޔަމް ޝަބާނާ