ކޮރަޕްޝަން މައްސަލައިގައި އިމިގްރޭޝަންގެ އިތުރު މުވައްޒަފަކު ހައްޔަރުކޮށްފި

މޯލްޑިވްސް އިމިގްރޭޝަންގެ މުވައްޒަފުންތަކެއް މަޤާމުގެ ނުފޫޒު ނަހަމަގޮތުގައި ބޭނުންކޮށް، ބިދޭސީ މަސައްކަތްތެރިން އަތުން ނާޖާއިޒު މަންފާ ހޯދަމުންދާކަމަށް ތުހުމަތުކުރެވޭ މައްސަލައިގައި އިތުރު އޮފިސަރަކު އާދީއްތަ ދުވަހުގެރޭ ހައްޔަރުކޮށްފިއެވެ. 

ފުލުހުން ހާމަކޮށްފައިވާ ގޮތުގައި، ކޯޓު އަމުރެއްގެ ދަށުން އެންމެ ފަހުން ހައްޔަރުކުރީ މ. ހަޒާރީވިލާ، މާލެ، އުމުރުން 40 އަހަރުގެ އަޙުމަދު ލައްސާންއެވެ.

މި މައްސަލައިގައި މި މަހުގެ 20 ވަނަ ދުވަހު ހައްޔަރުކޮށްފައިވަނީ ކުރީގެ ކޮންޓްރޯލަރ ޖެނެރަލް، މުޙައްމަދު ޝަމްޢާން ވަޙީދާއި، މޫނިމާގެ، ތ. ބުރުނި، އުމުރުން 21 އަހަރުގެ މުޙައްމަދު އަލްސަން އިސްމާއީލް އާއި ގ. ހެޕީސައިޑް، މާލެ، އުމުރުން 37 އަހަރުގެ އިބްރާޙިމް އަޙުމަދާއި ހަމަ އެގޭ އުމުރުން 47 އަހަރުގެ ޙަސަން ސަހެޝަންއެވެ.

މި މައްސަލައާ ގުޅިގެން ފުލުހުން ކުރިން ނެރުނު ނޫސް ބަޔާނުގައި ވަނީ، ޤަވާއިދާއި ޚިލާފަށް އުޅެމުންދާ ބިދޭސީން ހޯދާ ޑިޓެއިންކުރުމުގެ ޒިންމާ އާންމުކޮށް އަދާކުރަމުންދާ ޓާސްކް ފޯރސް އަދި ރިސްކު މެނޭޖްމަންޓް ސެކްޝަނުގެ މުވައްޒަފުން ނޫން އިމިގްރޭޝަންގެ އެހެން ސެކްޝަންތަކުގައި މަސައްކަތްކުރާ މުވައްޒަފުންތަކެއް އެ މުވައްޒަފުންގެ މަގާމުގެ ނުފޫޒު ނަހަމަގޮތުގައި ބޭނުންކޮށްގެން، ބިދޭސީ މަސައްކަތްތެރިން ދިރިއުޅޭ ގެއެއް ބަލައި ފާސްކޮށް، އަދި އެ ގެއިން ބިދޭސީއަކު ގިނަ އަދަދެއްގެ ނަގުދު ފައިސާއާއެކު އިމިގްރޭޝަންގެ ބެލުމުގެ ދަށަށް ގެންގޮސްފައިވާކަމަށެވެ.

އަދި އޭގެ އެއް ދުވަސް ފަހުން ކުރީގެ ކޮންޓްރޯލަރ ޖެނެރަލް އޮފް އިމިގްރޭޝަންގެ އަމުރަށް އެތަނުން 530،000 ދިވެހި ރުފިޔާއާއެކު އިމިގްރޭޝަނުގެ ޑިޓެންޝަނަށް ގެންދެވުނު ބިދޭސީމީހާ ދަންވަރުގެ ވަގުތެއްގައި ޑިޓެންޝަނުން ދޫކޮށްލާފައިވާކަން ތަޙުޤީޤަށް އެނގިފައިވާކަމަށްވެސް ފުލުހުން ވިދާޅުވިއެވެ. މީގެ އިތުރުން މި ގެ ބަލައި ފާސްކުރުމުގައި އަމަލީގޮތުން ބައިވެރިވި އިމިގްރޭޝަން މުވައްޒަފުން ޑިޓެންޝަނުން ދޫކޮށްލި ބިދޭސީ މީހާއާ މަގުމަތިން ބައްދަލުކޮށް، އޭނާގެ އަތުގައި ހުރި ފައިސާތައް ހޯދައި އެ ފައިސާތައް ހިފައިގެން،  މުޙައްމަދު ޝަމްއާން ވަޙީދު ދިރިއުޅޭ އިމާރާތަށް ވަދެފައިވާކަންވެސް ތަޙުޤީޤަށް އެނގިފައިވާކަމަށް ފުލުހުން ވިދާޅުވިއެވެ.