ޚަބަރު
އިމިގްރޭޝަންގެ ކޮރަޕްޝަންގެ މައްސަލައިގައި ހައްޔަރުކުރި މީހުންގެ ވަނަވަރު އާންމުކޮށްފި

އިމިގްރޭޝަނާ ގުޅުންހުރި ކޮރަޕްޝަން މައްސަލައިގައި ހައްޔަރުކުރި މީހުން ---

ފަރުދުން
24 މާރިޗު 2025، 04:14
24 މާރިޗު 2025، 04:14
މޯލްޑިވްސް އިމިގްރޭޝަނާ ގުޅުންހުރި ކޮރަޕްޝަންގެ މައްސަލައިގައި ހައްޔަރުކުރި މީހުންގެ ވަނަވަރު މޯލްޑިވްސް ޕޮލިސް ސާރވިސަސްއިން އާންމުކޮށްފިއެވެ.
މިއީ މަޤާމުގެ ނުފޫޒު ނަހަމަގޮތުގައި ބޭނުންކޮށް، ބިދޭސީ މަސައްކަތްތެރިން އަތުން ނާޖާއިޒު މަންފާ ހޯދަމުންދާކަމަށް ތުހުމަތުކުރެވޭ މައްސަލައިގައި ފުލުހުން ހައްޔަރުކޮށްފައިވާ ފަރާތްތަކެކެވެ. މި މީހުންގެ ތެރޭގައި ކުރީގެ ކޮންޓްރޯލަރ ޖެނެރަލް، މުޙައްމަދު ޝަމްޢާން ވަޙީދާއި، އިމިގްރޭޝަންގެ 3 އޮފިސަރަކާއި އަދި އިމިގްރޭޝަނަށް ނިސްބަތްނުވާ މީހެއް ހިމެނެއެވެ.
މި މައްސަލާގައި މި މަހުގެ 20 ވަނަ ދުވަހުގެރޭ ކުރީގެ ކޮންޓްރޯލަރ ޖެނެރަލްގެ އިތުރުން ހައްޔަރުކޮށްފައިވަނީ، މޫނިމާގެ، ތ. ބުރުނި، އުމުރުން 21 އަހަރުގެ މުޙައްމަދު އަލްސަން އިސްމާއީލް އާއި ގ. ހެޕީސައިޑް، މާލެ، އުމުރުން 37 އަހަރުގެ އިބްރާޙިމް އަޙުމަދާއި ހަމަ އެގޭ އުމުރުން 47 އަހަރުގެ ޙަސަން ސަހެޝަންއެވެ. މީގެ އިތުރުން، މި މައްސަލާގައި އާދިއްތަ ދުވަހުގެރޭ ހައްޔަރުކޮށްފައިވަނީ އިމިގްރޭޝަންގައި މަސައްކަތް ކުރަމުން އަންނަ މ. ހަޒާރީވިލާ، މާލެ، އުމުރުން 40 އަހަރުގެ އަޙުމަދު ލައްސާންއެވެ.
މި މީހުންގެ ތެރެއިން ކުރީގެ ކޮންޓްރޯލަރ ޖެނެރަލް 15 ދުވަހަށް ބަންދުކުރުމަށް ކޯޓުން ވަނީ އަމުރުކޮށްފައެވެ. އަދި ދެންތިބި މީހުންގެ ތެރެއިން 2 މީހަކު 10 ދުވަހަށް ބަންދު ކުރުމަށް، އަދި އެކަކު 3 ދުވަހަށް ބަންދުކުރުމަށް ކޯޓުން އަމުރުކޮށްފައިވެއެވެ.
މި މައްސަލާގައި ދެން ހިމެނޭ ލައްސާން ފުލުހުންގެ ބެލުމުގެ ދަށަށް ގެންގޮސްފައިވަނީ އާދީއްތަ ދުވަހުގެރޭ ކަމުން، އޭނާގެ ބަންދާއިމެދު ގޮތެއް ނިންމުމަށް އަދި ކޯޓަށް ހާޒިރުކޮށްފައެއް ނުވެއެވެ.