ޤަވާއިދާ ޚިލާފަށް އިމިގްރޭޝަންގެ ރެއިޑް ހިންގީ ޕްލޭނިން ޔުނިޓުގެ ދެ އޮފިސަރުންނާއި މީޑިއާ ޔުނިޓުގެ އޮފިސަރެއް

މަޤާމުގެ ނުފޫޒު ނަހަމަ ގޮތުގައި ބޭނުންކުރުމުގެ ތުހުމަތުގައި މޯލްޑިވްސް ޕޮލިސް ސާރވިސަސްއިން ހައްޔަރުކުރި އިމިގްރޭޝަން އޮފިސަރުންގެ ތެރޭގައި ހިމެނެނީ އެ އޮފީހުގެ ޕްލޭނިން ޔުނިޓުގެ ދެ އޮފިސަރުންނާއި މީޑިއާ އެންޑް ޕަބްލިކް ރިލޭޝަންސްގެ އޮފިސަރެއްކަން ހާމަވެއްޖެއެވެ.

މި މައްސަލައާ ގުޅީގެން ހައްޔަރު ކުރެވުނު މީހުންގެ ވަނަވަރު ފުލުހުން މިހާރު އާންމުކޮށްފައިވާއިރު، "ފަރުދުން މީޑިއާ"އަށް އެނގިފައިވާ ގޮތުގައި މި އޮފިސަރުންގެ ތެރެއިން އެ އޮފީހުގެ ޕްލޭނިން ޔުނިޓުގައި މަސައްކަތް ކުރަމުންދަނީ މި މަހުގެ 20 ވަނަ ދުވަހު ހައްޔަރު ކުރެވުނު އިބްރާޙިމް އަޙުމަދާއި، އަދި 23 ވަނަ ދުވަހުގެރޭ ހައްޔަރުކުރެވުނު އަޙުމަދު ލައްސާންއެވެ.

އަދި މި މައްސަލައިގައި ދެން ހިމެނޭ މުޙައްމަދު އަލްސަން މަސައްކަތް ކުރަމުން އައީ އެ އޮފީހުގެ މީޑިއާ އެންޑް ޕަބްލިކް ރިލޭޝަންސްގައެވެ.

މިއީ މިފަދަ އޮޕަރޭޝަންތަކުގައި ހަރަކާތްތެރިވުމުގެ ޒިންމާ މަތިކޮށްފައި އޮތް ސެކްޝަނަށް ނިސްބަތްވާ އޮފިސަރުންތަކެއް ނޫނެވެ. އެގޮތުން ޕްލޭނިން ޔުނިޓަކީ، އޮފީހުގެ ދުރުރާސްތާ ޕްލޭނަށް މަސައްކަތްކޮށް، އެކަން ތަންފީޒުކުރުންފަދަ މަސައްކަތްތައް ކުރަމުން އަންނަ ސެކްޝަނެކެވެ. އަދި މީޑިއާއަކީ އިމިގްރޭޝަންގެ މަސައްކަތްތަކާއި ޚިދުމަތްތައް އާންމުންނަށް ފޯރުކޮށްދިނުމުގެ މަސައްކަތްތައް ކުރަމުން އަންނަ ސެކްޝަނެކެވެ. 

މި މައްސަލައާ ގުޅިގެން ފުލުހުން ކުރިން ނެރުނު ނޫސް ބަޔާނުގައި ވަނީ، މި އޮފިސަރުން ހައްޔަރުކުރީ ޤަވާއިދާއި ޚިލާފަށް އުޅެމުންދާ ބިދޭސީން ހޯދާ ޑިޓެއިންކުރުމުގެ ޒިންމާ އަދާކުރަމުންދާ ޓާސްކް ފޯރސް އަދި ރިސްކު މެނޭޖްމަންޓް ސެކްޝަނުގެ މުވައްޒަފުން ނޫން އިމިގްރޭޝަންގެ އެހެން ސެކްޝަންތަކެއްގައި މަސައްކަތްކުރާ މުވައްޒަފުންތަކެއް އެ މުވައްޒަފުންގެ މަގާމުގެ ނުފޫޒު ނަހަމަގޮތުގައި ބޭނުންކޮށްފައިވާތީ ކަމަށެވެ.