މިއަހަރުގެ ފިޠުރު ޢީދުގައި މާލޭގެ 4 ސަރަޙައްދެއްގައި ބޮޑު ޖަމާޢަތުގައި ޢީދު ނަމާދު ކުރާނެ

މިއަހަރުގެ ފިޠުރު ޢިދުގައި މާލޭގެ 4 ސަރަޙައްދެއްގައި ބޮޑު ޖަމާޢަތުގައި ޢީދު ނަމާދު ކުރާނެ ކަމަށް އިސްލާމީ ކަންތައްތަކާއި ބެހޭ ވުޒާރާއިން ބުނެފިއެވެ.

އެގޮތުން ބޮޑު ޖަމާޢަތުގައި ޢީދު ނަމާދު ކުރުމަށް ހަމަޖެހިފައިވާ 4 ތަނަކީ މާފަންނު ސްޓޭޑިއަމް ، ވިލިގިލި ބޯޅަދަނޑު، ހުޅުމާލެ ފުރަތަމަ ފިޔަވަހީގެ ބޮޑުޖަމާޢަތް ހަދާނީ ސިންތަޓިކް ޓްރެކްގައެވެ. އަދި ހުޅުމާލެ ދެވަނަ ފިޔަވަހީގެ ބޮޑުޖަމާޢަތް ހަދާނީ ކުރިކެޓް ސްޓޭޑިއަމްގައެވެ.

 މައިދާނުގައި ހަތަރު ތަނެއްގައި ބޮޑު ޖަމާޢަތް ހަދައިގެން ޢީދު ނަމާދު ކުރުމަށް ހަމަޖެހިފައިވާއިރު އޭގެ އިތުރުން 23 މިސްކިތެއްގައި ޢީދު ނަމާދު ކުރުމަށް ވަނީ ހަމަޖެހިފައެވެ.

އިސްލާމީ ކަންތައްތަކާއި ބެހޭ ވުޒާރާއިން ބުނެފައިވަނީ ވިއްސާރަވުމުގެ ސަބަބުން މައިދާންތަކުގައި ކުރުމަށް ހަމަޖެހިފައިވާ ޢީދު ނަމާދުގެ ބޮޑުޖަމާޢަތް ކެންސަލްވެއްޖެނަމަ ޢީދު ނަމާދު ކުރާނީ މާލެ ސިޓީގެ ހުކުރު ނަމާދުކުރާ ހުރިހާ މިސްކިތްތަކެއްގައި ކަމަށެވެ. 

ޢީދު ނަމާދު ކުރުމަށް ހަމަޖެހިފައިވާ މިސްކިތްތަކަކީ:.

•  މަސްޖިދުއްސުލްޠާން މުޙައްމަދު ތަކުރުފާނުލްއަޢްޡަމް (އިސްލާމީ މަރުކަޒު)
• މަސްޖިދުލްމަލިކި ސަލްމާން (ކިންގް ސަލްމާން މިސްކިތް)
• މަސްޖިދުލްފުރުޤާން
• މަސްޖިދުއްނޫރު
• މަސްޖިދުއް ޝަޙީދު ޢަލީ
• މަސްޖިދުއްސުލްޠާން ޙަސަން ޢިއްޒުއްދީން (ޠައިބާ މިސްކިތް)
• މަސްޖިދުއްސުލްޠާނު މުޙައްމަދު ފަރީދުލްއައްވަލު (ދުބުރި މިސްކިތް)
• މަސްޖިދު ޝަހީދު ޢަބްދުއްރަޙްމާން (ފަނޑިޔާރު މިސްކިތް)
• މަސްޖިދުއްސުލްޠާން މުޙައްމަދު ޝަމްސުއްދީން (ބަންޑާރަ މިސްކިތް)
•  މަސްޖިދު ޞަލާޙުއްދީން
• މަސްޖިދު ޖަލާލުއްދީން
• މަސްޖިދު އިބްރާހީމް
• މަސްޖިދު އިސްކަންދަރު
• ވަގުތީ މިސްކިތް ( ބޮޑުގެ )
•  މަސްޖިދުއްސުލްޠާނު މުޙައްމަދު ޢިމާދުއްދީން (ރަންމިސްކިތް)
•  މަސްޖިދުއްޝައިޚް މުޙައްމަދު ޖަމީލް ދީދީ (ފައިފުހޭ މިސްކިތް)
• މާފަންނު އާމިސްކިތް
• މަސްޖިދުއްސަލާމް
• މަސްޖިދުއްޝައިޚް ޤާސިމް ބިން މުޙައްމަދު އާލް ޘާނީ (ހުޅުމާލެ ފޭސް 1)
• މަސްޖިދު ރަޝީދު (ހުޅުމާލެ ފޭސް 1)
•  މަސްޖިދު ޢަޒީޒާ މޫސާ (ހުޅުމާލެ ފޭސް 1)
•  މަސްޖިދު ޙަސަން އާދަމް (ހުޅުމާލެ ފޭސް 2)
• މަސްޖިދު އަބީބަކުރިނިއްޞިއްދީޤް (ފޭސް 2 ހުޅުމާލެ)

ޢީދު ނަމާދު ކުރަން ފަށާގަޑިއަކީ ހެނދުނު 7.00 އެވެ. ކުރިންނ ރާއްޖޭގައި ޢީދު ނަމާދުގެ ޖަމާޢަތް ފަށާ ގަޑިއަކީ 7:30 އެވެ. ނަމަވެސް ރައީސް ޑރ މުޙައްމަދު މުޢިއްޒުގެ ވެރިކަން ފެށުމާއިއެކު ޢީދު ނަމާދުގެ ޖަމާޢަތް ފަށާ ގަޑި ހެނދުނުގެ 7:00އަށް ވަނީ ބަދަލުކޮށްފައެވެ.  

މާލޭގެ އިތުރުން ރާއްޖޭގެ ރަށްރަށުގައިވެސް  ޢީދު ނަމަދު ކުރަނީ ރަށްރަށުގެ ބޮޑެތި މައިދާން ތަކުގައި ބޮޑު ޖަމާޢަތް ހަދައިގެނެވެ.