ރޮނާލްޑޯއަށް ވޯލްޑް ރެކޯޑު ފޮތުން އަނެއްކާވެސް ޖާގައެއް ލިބިއްޖެ

ޕޯޗުގަލްގެ ކްރިސްޓިއާނޯ ރޮނާލްޑޯއަށް ޖިނަސް ވޯލްޑް ރެކޯޑު ފޮތުން އަނެއްކާވެސް ޖާގައެއް ލިބިއްޖެއެވެ.

ޖިނަސް ވޯލްޑް ރެކޯޑުން ރޮނާލްޑޯ ހާސިލްކުރި އެންމެ ފަހުގެ އެވޯޑު އޭނާއަށް އަރުވާފައިވަނީ، ޔޫއެފާ ނޭޝަންސް ލީގުގެ ކުއާޓާ ފައިނަލްގައި ރޭ ޕޯޗުގަލްއާ ޑެންމާކް ކުޅުނު މެޗު ފެށުމުގެ ކުރިންނެވެ. 

ފަސް ފަހަރު ބެލަން ޑިއޯރ ހޯދާފައިވާ ރޮނާލްޑޯ، ޖިނަސް ވޯލްޑް ރެކޯޑު ފޮތުން މި ފަހަރު ހާސިލްކުރީ ގައުމީ ފުޓުބޯޅަ ޓީމާއެކު އެންމެ ގިނަ ފަހަރަށް މޮޅުވެފައިވާ ކުޅުންތެރިޔާގެ މަޤާމެވެ. އެގޮތުން ޕޯޗުގަލްގެ ޤައުމީ ޖާޒީގައި މިހާތަނަށް އޭނާ ވަނީ 132 މެޗުން މޮޅުވެފައެވެ. 

Cristiano Ronaldo and world records go hand-in-hand 🐐

The Portuguese legend receives his Guinness World Record for the most wins in an international career (132).

Watch the #NationsLeague on Optus Sport. pic.twitter.com/PHlF2IdBvh

— Optus Sport (@OptusSport) March 23, 2025

ސާޖިއޯ ރާމޯސްގެ އަތުގައި ކުރިން އޮތް މި ރެކޯޑު އޭނާއަށް ކަށަވަރުވީ މިދިޔަ އަހަރުގެ ނޮވެންބަރު މަހުގެ ތެރޭގައި ޕޮލަންޑާ ބައްދަލުކުރި މެޗުން މޮޅުވުމުންނެވެ. އެ މެޗު 5-1 އިން ޕޯޗުގަލް ކާމިޔާބުކުރިއިރު ރޮނާލްޑޯ ވަނީ ދެ ގޯލު ޖަހާފައެވެ. 

2003 ވަނަ އަހަރުގެ އޯގަސްޓު މަހު ޕޯޗުގަލްގެ ޤައުމީ ޓީމަށް ރޮނާލްޑޯ ކުޅެން ފަށާފައިވާއިރު، ކުޅުންތެރިއެއްގެ ގޮތުގައި އޭނާ ޕޯޗުގަލް ތަމްސީލް ކުރަމުންއަންނަތާ މިހާރު 20 އަހަރަށް ވުރެ ގިނަ ދުވަސްވެއްޖެއެވެ. 

މި ރެކޯޑުގެ އިތުރުން، އިންޓަނޭޝަނަލް ފުޓުބޯޅައިގައި އެންމެ ގިނަ ގޯލުޖެހި ކުޅުންތެރިޔާގެ ރެކޯޑާއި، ޔޫއެފާ ޗެމްޕިއަންސް ލީގުގައި އެންމެ ފުރަތަމަ 100 ގޯލު ހަމަކުރި ކުޅުންތެރިޔާގެ ރެކޯޑާއި އަދި އިންސްޓްގްރާމުން އެންމެ ގިނަ ބަޔަކު ފޮލޯކުރާ ފިރިހެނާގެ ރެކޯޑު ވެސް އޮތީ ރޮނާލްޑޯގެ އަތުގައެވެ.