ޚަބަރު
2025 ވަނަ އަހަރުގެ ތަޢުލީމީ އައު އަހަރު 5700 ކުދިން އަލަށް ގްރޭޑް 1ގައި ކިޔަވަން ފަށާނެ

ޢަރަބިއްޔާ ސްކޫލްގެ އޮރިއަންޓޭޝަން ޕްރޮގްރާމްގެ ތެރެއިން. ފޮޓޯ: ޢަރަބިއްޔާ ސްކޫލް
2025 ވަނަ އަހަރުގެ ތަޢުލީމީ އައު އަހަރު 5700 ކުދިން އަަލަށް ގްރޭޑް 1ގައި ކިޔަވަން ފަށާނެ ކަމަށް ތަޢުލީމީ ވުޒާރާއިން ބުނެފިއެވެ.
ތަޢުލީމީ ވުޒާރާގެ ސްކޫލް އެޑްމިނިސްޓްރޭޝަން ހިންގުމާ ހަވާލުވެހުންނެވި ޢަލީ މުފީދު ޕީއެސްއެމްއަށް ވިދާޅުވެފައިވަނީ ގްރޭޑް 1އަށް ކުދިން ވެއްދުމުގެ ކަންކަން ކުރިއަށް ގެންގޮސްފައިވަނީ 2 މަރުހަލާއަކަށް ބަހާލައިގެންކަމަށެވެ. އެގޮތުން ފުރަތަމަ މަރުހަލާ ކުރިއަށް ގެންގޮސްފައިވަނީ އަލަށް ގްރޭޑް އެކަކަށް ވަންނަ ކުދިންނަށްކަމަށާއި ދެވަނަ މަރުހަލާ ކުރިއަށްގެންގޮސްފައިވަނީ އެއްރަށުން އަނެއްރަށަށް ކުދިން ބަދަލުކުރުމަށްކަމަށެވެ.
ގްރޭޑް 1އަށް އަލަށް 5700އަށްވުރެ ގިނަ ދަރިވަރުން ވައްދާފައިވާކަމަށް މުފީދު ވިދާޅުވިއެވެ. އަދި މާލެ ސަރަޙައްދުގެ ސްކޫލްތަކަށް އެކަނިވެސް 2000އެއްހާ ދަރިވަރުންނަށް ފުރުޞަތު ދީފައިވާކަމަށް މުފީދު ވިދާޅުވިއެވެ. ގްރޭޑް 1އަށް ވަނުމަށް ޖާގަ ދިނުމުގެ ކަންކަން މިދިޔަ ޑިސެމްބަރު މަހުގެ ތެރޭގައި ނިންމާލާފައިވާކަމަށާއި ބައެއް ސްކޫލްތަކުގައި އޮރިއެންޓޭޝަންތައްވެސް ބާއްވާފައިވާކަމަށް އޭނާ ވިދާޅުވިއެވެ.
މުފީދު އިތުރަށް ވިދާޅުވީ ކުއްޖާގެ ކްލާހާއި އިންޑެކްސް ނަންބަރު ފަދަ މަޢުލޫމާތުތައް ސްކޫލްތައް މެދުވެރިކޮށް މިހާރު ހަވާލުކުރެވިފައިވާނެ ކަމަށާއި އަދި ގިނަ ސްކޫލްތަކުން މިހާރު އޮރިއަންޓޭޝަން ޕްރޮގްރާމްތައް ވެސް ބާއްވައިފައިވާ ކަމަށެވެ.
މީގެއިތުރުން މުފީދު ވިދާޅުވީ ބައެއް ދަރިވަރުންގެ އުމުރާ ގުޅިގެން ގްރޭޑް 1 ނުވަތަ އެލްކޭޖީގައި ރިޕީޓު ކުރުމަށްވެސް ވަރަށް މަދުންނަމަވެސް އެދިފައިވާކަމަށެވެ. އަދި އެގޮތަށް އެދިފައިވާ ބެލެނިވެރިންނަށްވެސް މިދިޔަމަހުގެ 20 ވަނަ ދުވަހާހަމައަށް ކުރަންޖެހޭ ކަންކަން ނިންމުމަށްފަހު ބެލެނިވެރިންނަށް އަންގާފައިވާކަމަށްވެސް އޭނާ ވިދާޅުވިއެވެ.
އޭޕްރީލްމަހު ފަށާ ދިރާސީ އަހަރު ސަރުކާރު ސްކޫލުތަކުގެ އެލް.ކޭ.ޖީ، ޔޫ.ކޭ.ޖީ އަދި ގްރޭޑް 1 އަށް ދަރިވަރުން ވެއްދުމަށް ތައުލީމީ ވުޒާރާއިން މިދިޔަ އަހަރުގެ އޮކްޓޫބަރު މަހުއެވެ.