އިމިގްރޭޝަންގެ ޚިދުމަތަށް 75 އަހަރު ފުރުމުގެ މުނާސަބަތުގައި ރައީސް މުޢިއްޒު ތަހުނިޔާ ވިދާޅުވެއްޖެ

އިމިގްރޭޝަން ޚިދުމަތް ރާއްޖެއަށް ލިބެން ފެށިތާ 75 އަހަރު ފުރުމުގެ މުނާސަބަތުގައި ރައީސް ޑރ މުޙައްމަދު މުޢިއްޒު ތަހުނިޔާ ވިދާޅުވެއްޖެއެވެ. 

ރައީސް ޑރ މުޢިއްޒު އެކްސްގައި ކުރެއްވެވި ޕޯސްޓެއްގައި ވިދާޅުވެފައިވަނީ އިމިގްރޭޝަންގެ ޚިދުމަތް ދިވެހިރާއްޖެއިން ލިބެން ފެށިތާ 75 އަހަރު ފުރޭ އަލިމަަސް ޔޫބީލްގެ މުނާސަބަތުގައި، މި ދާއިރާގައި ކުރީން މަސައްކަތްކޮށްދެއްވި، އަދި މިހާރުވެސް މަސައްކަތުގައި ދެމިތިއްބެވި ހުރިހާ ޚިދުމަތްތެރީންނަށް މަރްޙަބާއާއި ޝުކުރު ދަންނަވާ ކަމަށެވެ.

މޯލްޑިވްސް އިމިގްރޭޝަން އުފައްދައިފައިވަނީ 1950 ވަނަ އަހަރުއެވެ. އެއީ ރާއްޖެއިން އެންމެ ފުރަތަމަ ޓްރެވަލް ޑޮކިޔުމެންޓެއް އިޝޫ ކުރި އަހަރެވެ. އޭރުގެ މިނިސްޓްރީ އޮފް އެކްސްޓަނަލް އެފެއަރޒްގެ ދަށުން އިޝޫ ކުރި ޓްރެވަލް ޑޮކިޔުމެންޓަކީ “މޯލްޑިވިއަން ޕާސް”އެވެ. އެއީ ދިވެހިރާއްޖެއާއި ސްރީލަންކާ އާއި ދެމެދު ދަތުރުކުރުމަށް އިޝޫ ކުރެވުނު ފާހެކެވެ. މި ފާސް ދޫކުރެވެން ފެށި ސަބަބަކީ ރާއްޖެއާއި ސްރީލަންކާ އާއި ދެމެދު ކުރެވޭ މަހުގެ ވިޔަފާރިއަށް ފަހިކުރުމެވެ.