ޚަބަރު
ހއ. ތަކަންދޫގައި ބީއެމްއެލްގެ އޭޓީއެމް ޚިދުމަތް ފަށައިފި

ހއ ތަކަންދޫގައި ބެހެއްޓުނު ބީއެމްއެލް އޭޓީއެމް ފޮޓޯ: ޕީއެސްއެމް
ހއ. ތަކަންދޫގައި ބޭންކް އޮފް މޯލްޑިވްސް (ބީއެމްއެލް)ގެ އޭޓީއެމްއެއްގެ ޚިދުމަތް ފަށައިފިއެވެ. މި ޚިދުމަތް ރަސްމީކޮށް ފައްޓަވައިދެއްވީ ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިގް އިބްރާހީމެވެ.
ރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓީއެމް ބެހެއްޓުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތެއްކަން ފާހަގަކުރެވެއެވެ. މި ސިޔާސަތުގެ ދަށުން، ބީއެމްއެލުން ވަނީ ދ. އަތޮޅުގެ މީހުން ދިރިއުޅޭ ހުރިހާ ރަށެއްގައި އެންމެ ފުރަތަމަ އޭޓީއެމްގެ ޚިދުމަތް ފަށާފައެވެ. އަދި ހއ. އަތޮޅަކީ މި ޚިދުމަތް ފޯރުކޮށްދޭ ދެވަނަ އަތޮޅު ކަމުގައި ވާނެއެވެ.
ބީއެމްއެލުން މަޢުލޫމާތު ދެއްވާފައިވާ ގޮތުގައި، މި އޭޓީއެމްތަކުން 24 ގަޑިއިރު ތެރޭގައި ފައިސާ ޖަމާކުރުމާއި، ފައިސާ ނެގުމާއި، ޓްރާންސްފަރ ކުރުމާއި، ލޯނަށް ފައިސާ ދެއްކުމާއި، ކްރެޑިޓް ކާޑަށް ފައިސާ ދެއްކުމުގެ ޚިދުމަތް ލިބޭނެއެވެ. މިއީ ބޭންކުގެ ޚިދުމަތްތައް ޑިޖިޓަލްކޮށް، ރައްޔިތުންނަށް ވީހާވެސް ގާތުން އަދި ފަސޭހައިން ފޯރުކޮށްދިނުމަށް ބީއެމްއެލުން ކުރަމުންދާ މަސައްކަތުގެ ބައެކެވެ.