ޓީބީ ނައްތާލުމަށް ކުރަމުން އަންނަ މަސައްކަތުގައި ސަރުކާރުން ދަނީ ސާބިތުކަމާއެކު ކުރިއަށް: ރައީސް މުޢިއްޒު

ރާއްޖެއިން ޓިއުބަރކިއުލޯސިސް ނުވަތަ ޓީބީ ނައްތާލުމަށް ކުރާ މަސައްކަތް އިތުރަށް ހަރުދަނާކުރަމުން ގެންދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. މިއަދު ފާހަގަކުރާ ދުނިޔޭގެ ޓީބީ ދުވަހާ ގުޅިގެން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ރައީސް މި ވާހަކަ ވިދާޅުވެފައިވެއެވެ.

ރައީސް މުޢިއްޒު ވިދާޅުވި ގޮތުގައި، ޓީބީ ނައްތާލުމަށް ކުރަމުން އަންނަ މަސައްކަތުގައި ސަރުކާރުން ދަނީ ސާބިތުކަމާއެކު ކުރިއަށެވެ. މި ގޮތުން، ޓިއުބަރކިއުލޯސިސް ޕްރިވެންޓިވް ޓްރީޓްމަންޓް (ޓީޕީޓީ) ހިލޭ ދިނުން ފަދަ ފިޔަވަޅުތަކާއެކު ރާއްޖެއިން ޓީބީ ނައްތާލުމަށް ކުރާ މަސައްކަތް އިތުރަށް ހަރުދަނާކުރަމުން ގެންދާ ކަމަށް އެމަނިކުފާނު ވިދާޅުވިއެވެ.

މީގެ އިތުރުން، އަވަހަށް ބަލި ދެނެގަނެވޭނެ އިންތިޒާމުތައް ހަމަޖެއްސުމާއި ފުރިހަމަ ފަރުވާ ކަށަވަރުކުރުމަށްވެސް ސާބިތުކަމާއެކު މަސައްކަތް ކުރަމުންދާ ކަމަށް ރައީސް މުޢިއްޒު ފާހަގަކުރެއްވިއެވެ.

On #WorldTuberculosisDay, we reaffirm our commitment to ending TB. We are among one of the five nations to achieve 70% case detection & 85% cure rates since 1998. Today, we are dedicated to strengthening our efforts with free Tuberculosis Preventive Treatment (TPT) and renewed… pic.twitter.com/9GXJMRMqe2

— Dr Mohamed Muizzu (@MMuizzu) March 24, 2025

ރައީސް މުޢިއްޒުގެ ޕޯސްޓުގައި ފާހަގަކުރައްވާފައިވާ ގޮތުގައި، ދިވެހިރާއްޖެއަކީ 1998 ވަނަ އަހަރުން ފެށިގެން ޓީބީ ކޭސްތައް ދެނެގަތުމުގެ 70 އިންސައްތަ އާއި ބަލިން ފަރުވާ ހޯދުމުގައި 85 އިންސައްތަ ހާސިލްކޮށްފައިވާ ފަސް ޤައުމުގެ ތެރެއިން އެއް ޤައުމެވެ. މިއީ ރާއްޖެއިން ޓީބީ ނައްތާލުމަށް ކުރަމުންދާ މަސައްކަތުގެ ކާމިޔާބީގެ ހެއްކެކެވެ.

ދުނިޔޭގެ ޓީބީ ދުވަސް ފާހަގަކުރަނީ ކޮންމެ އަހަރެއްގެ މާރޗް 24 ވަނަ ދުވަހުއެވެ. މި ދުވަހުގެ މަޤްޞަދަކީ ޓީބީ އާ ދެކޮޅަށް ކުރެވޭ މަސައްކަތްތަކަށް އާންމުންގެ ސަމާލުކަން ހޯދުމާއި، މި ބަލި ނައްތާލުމަށް ކުރެވޭ މަސައްކަތްތައް އިތުރަށް ހަރުދަނާކުރުމެވެ.