ރައީސްގެ އިރުޝާދަކީ، ކިތަންމެ ކުޑަ ރަށެއްނަމަވެސް އެރަށުގައި ތިބެގެން ބޭންކުގެ ޚިދުމަތް ލިބޭނެގޮތް ހަމަޖައްސައިދިނުން: ބީއެމްއެލް ސީއީއޯ

މިއަހަރު ނިމޭއިރު ރާއްޖޭގެ ހުރިހާ ރަށެއްގައި 250 އަށްވުރެ ގިނަ ސެލްފް ސަރވިސް އޭޓީއެމް ޤާއިމްކުރެވޭނެކަމަށް ބޭންކް އޮފް މޯލްޑިވްސް (ބީއެމްއެލް)ގެ ސީއީއޯ މުޙައްމަދު ޝަރީފް ވިދާޅުވެއްޖެއެވެ.

ޝަރީފް މިހެން ވިދާޅުވީ ހއ. އުތީމުގައި އޭޓީއެމްގެ ޚިދުމަތް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. މިއީ ހއ. އަތޮޅުގެ މީހުން ދިރިއުޅޭ ހުރިހާ ރަށެއްގައި އޭޓީއެމް ގާއިމްކުރުމަށް ކުރިއަށްގެންދިޔަ މަޝްރޫއުގެ ދަށުން ހިންގުނު ހަރަކާތެކެވެ.

ސަރުކާރުން ވަނީ "މުޅި ރާއްޖެއަށް ބީއެމްއެލް އޭޓީއެމް" ގެ ނަމުގައި މަޝްރޫއެއް ފައްޓަވައިފައެވެ. މި މަޝްރޫއުގެ ދަށުން ރާއްޖޭގެ މީހުން ދިރިއުޅޭ ހުރިހާ ރަށެއްގައި ބީއެމްއެލްގެ އޭޓީއެމް ބެހެއްޓުމަށް ވަނީ ރޭވިފައެވެ.

ރައީސުލްޖުމްހޫރިއްޔާގެ އިރުޝާދަކީ، ކިތަންމެ ކުޑަ އާބާދީއެއް ދިރިއުޅޭ ރަށެއްނަމަވެސް ހުރިހާ ދިވެހިންނަށްވެސް، އެރަށުގައި ތިބެގެން ބޭންކުގެ ޚިދުމަތް ލިބޭނެގޮތް ހަމަޖައްސައިދިނުން

 ބީއެމްއެލް ސީއީއޯ ޝަރީފް

ރަށްތަކުގައި ގާއިމުކުރާ އޭޓީއެމްތަކުން 24 ގަޑިއިރު ފައިސާ ޖަމާކުރުމާއި، ފައިސާ ނެގުމާއި، ޓްރާންސްފަރ ކުރުމާއި، ލޯނަށް ފައިސާ ދެއްކުމާއި، ކްރެޑިޓް ކާޑަށް ފައިސާ ދެއްކުމުގެ ޚިދުމަތް ލިބިގެންދާނެކަމަށް ޝަރީފް ވިދާޅުވިއެވެ. މިއީ އަމިއްލަ ފަރުދުންނާއި ވިޔަފާރިތަކުގެ ކުރިއެރުމަށް މުހިންމުކަމެއް ކަމަށްވެސް އެމަނިކުފާނު ފާހަގަކުރެއްވިއެވެ.

ބޭންކުގެ ފިޒިކަލް ނެޓްވޯކް ފުޅާކުރަމުގެ އިތުރުން ޑިޖިޓަލް ބޭންކިން ހައްލުތައް ހަރުދަނާ ކުރުމަށްވެސް ގިނަ މަސައްކަތްތަކެއް ކުރަމުންދާކަމަށް ޝަރީފް ވިދާޅުވިއެވެ. އެގޮތުން ބޭންކުގެ ބްރާންޗުތަކަށް ނުގޮސް ގޭގައި ތިބެގެން ބޭންކުގެ ހުރިހާ ޚިދުމަތެއް ލިބޭނެ މަގު ތަނަވަސްކޮށްދޭން މަސައްކަތް ކުރަމުންދާ ވާހަކަވެސް އެމަނިކުފާނު ހާމަކުރެއްވިއެވެ.

ޝަރީފް ވަނީ ރަށްރަށުގައި ޤާއިމުކުރާ އޭޓީއެމްތަކަކީ އެ ރަށެއްގެ ހަރުމުދަލެއްގެ ގޮތުގައި ދެކިގެން، މުޅި މުޖުތަމަޢުގެ ކުރިމަގަށް އެހީތެރިވާ މިފަދަ ވަސީލަތްތައް ރައްކާތެރިކޮށް ބެލެހެއްޓުމަށް ރައްޔިތުންގެކިބައިން އެދިވަޑައިގެންފައެވެ.