ދުނިޔެ
އިޒްރާއީލުން ޣައްޒާގެ ދެކުނުގެ އެންމެ ބޮޑު ހޮސްޕިޓަލަށް ހަމަލާދީ ބޮޑެތި ގެއްލުންތަކެއް ދީފި

ނައްސިރް ހޮސްޕިޓަލަށް ދިން ހަމަލާގައި އެތަނުގައި އަލިފާން ރޯވެފައި.
އިޒްރާއިލުން ޣައްޒާގެ ދެކުނުގެ އެންމެ ބޮޑު ހޮސްޕިޓަލަށް ހަމަލާއެއްދީ އެތަނަށް ބޮޑެތި ގެއްލުން ތަކެއްދީފިއެވެ.
ނައްޞިރް ހޮސްޕިޓަލަށް ދިން މިހަމަލާގައި ދެމީހަކު ޝަހީދުވެފައިވެއެވެ. މީގެއިތުރުން އެތައް ބަޔަކު ޒަހަމްވެ، އެހޮސްޕިޓަލްގައި ބޮޑު އަލިފާނުގެ ހާދިސާއެއް ހިނގާފައިވާ ކަމަށް ފަލަސްޠީނުގެ ޞިއްޙީ ވުޒާރާއިން ވަނީ ބުނެފައެވެ.
އާދީއްތަ ދުވަހުގެ ރޭ ދިން ހަމަލާ އަމާޒުކޮށްފައިވަނީ ޚާން ޔޫނިސްގެ ނައްސިރް ހޮސްޕިޓަލްގެ ސާޖިކަލް އިމާރާތަށް ކަމަށް ފަލަސްޠީނުގެ ޞިއްޙީ ވުޒާރާއިން ބުނެފައިވެއެވެ. މި ހަމަލާ ދީފައިވަނީ މިދިޔަ ހަފްތާގައި ވައިގެ ހަމަލާތައް އިޒްރާއިލުން ފަށައި އެހަމަލާތަކުގެ ސަބަބުން ޒަޚަމްވި އެތައް ބަޔަކަށް ފަރުވާދިނުމަށް އެހޮސްޕިޓަލް ތޮއްޖެހިފައިވަނިކޮށެވެ.
މިހަމަލާގެ ސަބަބުން ޝަހީދުވި ދެމީހުންގެ ތެރެއިން އެކަކަކީ މީގެ ދެ ދުވަސް ކުރިން އޮޕަރޭޝަނެއް ކޮށްފައިވާ އުމުރުން 16 އަހަރުގެ ކުއްޖެކެވެ. މީގެ އިތުރުން ހަމާސްގެ ޕޮލިޓިކަލް ބިއުރޯގެ މެމްބަރެއް ކަމަށްވާ އިސްމާއިލް ބަރްހޫމް ވެސް ޝަހީދުވެފައިވަނީ އެ ހޮސްޕިޓަލުގައި ފަރުވާ ހޯދަމުން ދަނިކޮށެވެ.
އިޒްރާއީލުގެ އަސްކަރިއްޔާއިން ވަނީ ހަމާސްގެ މެންބަރަކަށް ހަމަލާ ދީފައިވާ ކަމަށް ބުނެ އެކަން ކަށަވަރުކޮށްދީފަ އެވެ. އިޒްރާއިލްގެ އޮފިޝަލުން ބުނެފައިވަނީ އާންމުން އުޅޭ ތަންތަނަށް ހަމަލާދޭން ޖެހެނީ ހަމާސްގެ ހަނގުރާމަވެރިން އެފަދަ ތަންތަނުގައި ހަރަކާތްތެރިވާތީ ކަމަށް ބުނެފައެވެ.
މުޅި ޣައްޒާގެ އެހެން މެޑިކަލް ފެސިލިޓީތަކެކޭ އެއްފަދައިން ނައްޞިރް ހޮސްޕިޓަލަށް ވެސް ވަނީ ހަނގުރާމައިގެ ތެރޭގައި އިޒްރާއިލްގެ ރެއިޑްތަކާއި ވައިގެ ހަމަލާތަކުގެ ސަބަބުން ގެއްލުންތަކެއް ލިބިފަ އެވެ.
ފަލަސްތީނުގެ ޞިއްޙީ އޮފިޝަލުން ބުނެފައިވަނީ އިޒްރާއިލުން އަލުން ހަމަލާދޭން ފެށި ފަހުން 600 އަށް ވުރެ ގިނަ މީހުން ޝަހީދުވެފައިވާއިރު، އޭގެ ތެރޭގައި ފާއިތުވި 24 ގަޑިއިރުގެ ތެރޭގައި ދިހަވަރަކަށް މީހުން ޝަހީދުވެފައިވާ ކަމަށް ފަލަސްތީނުގެ ޞިއްޙީ އޮފިޝަލުން ބުނެ އެވެ.