ރަސްދޫގައި ހިނގި އަލިފާނުގެ ހާދިސާއެއްގައި ދެމަފިރިއަކު ވަރަށް ބޮޑަށް ފިހިއްޖެ

އއ. ރަސްދޫގައި ހިނގި އަލިފާނުގެ ހާދިސާއެއްގައި ދެމަފިރިއަކު ވަރަށް ބޮޑަށް ފިހިއްޖެއެވެ.

އެރަށުގެ އެޕާޓްމެންޓެއްގެ ކޮޓަރިއެއްގެ ތެރޭގައި ހިނގި މި ހާދިސާ ހިނގަން މެދުވެރިވި ސަބަބެއް އަދި އެނގިފައެއް ނުވެއެވެ.

މި ހާދިސާ ހިނގާފައިވަނީ މިރޭގެ 11:00 ހާއިރެވެ. 

ރަސްދޫ ކައުންސިލުން ހާމަކޮށްފައިވާ ގޮތުގައި، ފިހުނު ދެ މީހުން މިހާރު ވަނީ މާލެ ގެނަސް އިންދިރާ ގާންދީ މެމޯރިއަލް ހޮސްޕިޓަލްގައި ފާރުވާދޭން ފަށާފައެވެ.

މި އެޕާޓްމެންޓުގައި އަންހެން މީހާގެ މަންމަ އާއި ބައްޕަ ވެސް ދިރިއުޅޭކަމަށް ވަނީ މަޢުލޫމާތު ލިބިފައެވެ. ނަމަވެސް އެމީހުންނަށް މި ހާދިސާގެ ސަބަބުން އަނިޔާއެއް ވެފައެއް ނުވެއެވެ.

މަޢުލޫމާތު ލިބިފައިވާ ގޮތުގައި އެ ދެ މީހުންގެ ހަށިގަނޑުގެ %90 ވަނީ އަނދާފައެވެ. ނަމަވެސް މިކަން އަދި ކަށަވަރުވެފައެއް ނުވެއެވެ. 

މީގެ އިތުރުން، މި ހާދިސާ ހިނގި ތަނަށް ލިބުނު ގެއްލުމުގެ ތަފްސީލެއް ވެސް އަދި ލިބިފައެއް ނުވެއެވެ.