ށ. މިލަންދޫގައި އިސްލާމީ މަރުކަޒެއް ބިނާކުރުމަށް އެމްޓީސީސީއާއި ހަވާލުކޮށްފި

ށ. މިލަންދޫގައި އިސްލާމީ މަރުކަޒެއް ބިނާކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީއާއި ހަވާލުކޮށްފިއެވެ.

މި މަސައްކަތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްލާމީ ދާއިރާގެ ވަޢުދުތަކުގެ ތެރޭގައި ހިމެނިވަޑައިގެންނަވާ މަސައްކަތެކެވެ. 

މިލަންދޫގައި އިސްލާމީ މަރުކަޒެއް ބިނާކުރުމަށް އެމްޓީސީސީއާއި އެކު ވަނީ އެއްބަސްވުމެއްގައި ސޮއިކޮށްފައެވެ. އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވި ޚާއްޞަ ރަސްމިއްޔާތެއްގައި، އިސްލާމީ ކަންތައްތަކާ ބެހޭ ވުުޒާރާގެ ފަރާތުން މި އެއްބަސްވުމުގައި ސޮއިކުރެއްވީ ވަޒީރު ޑރ. މުޙައްމަދު ޝަހީމް އަލީ ސަޢީދުއެވެ. އަދި އެމްޓީސީސީގެ ފަރާތުން މި އެއްބަސވުމުގައި ސޮއި ކުރެއްވީ އެ ކުންފުނީގެ މެނޭޖިންގ ޑިރެކްޓަރ ޑީސީޕީ (ރޓޑ) އަޙުމަދު ސައުދީއެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، މިލަންދޫގައި ތަރައްޤީކުރާ އިސްލާމީ މަރުކަޒަކީ ނަމާދު ކުރާ ޖާގައިގެ އިތުރުން ކުލާސްރޫމާއި ޖަލްސާކުރާ ހޯލެއްވެސް ހިމެނޭހެން ތަރައްޤީކުރާ ތަނެއް ކަމަށެވެ. މީގެ އިތުރުން އެ ވުޒާރާއިން ވިދާޅުވީ، އަލަށް ޤާއިމްކުރާ އިސްލާމީ މަރުކަޒުތަކުގައި ދީނީ ޢިލްމު ފެތުރުމާއި، އިސްލާމީ ލައިބްރަރީ ޤާއިމްކުރުމަކީ އަދުގެ ސަރުކާރުގެ މުހިންމު އަމާޒެއް ކަމަށެވެ.